IIV rahbariyati Surxondaryo viloyatida oʻrganish ishlarini olib bordi
2025-12-12 11:00:00 / Yangiliklar
Tashrif davomida Yoʻl harakati xavfsizligi xizmati rahbari Surxondaryo viloyat IIB Jamoat xavfsizligi xizmati Yoʻl harakati xavfsizligi boshqarmasi Maʼmuriy amaliyot markazi, Roʻyxatdan oʻtkazish va imtihon olish boʻlimi binolaridagi xizmat jarayonlari va moddiy-texnika bazasi bilan tanishdi.
Shuningdek, Termiz tumanidagi “Yangi Oʻzbekiston” massivida barpo etilayotgan amfiteatr maydoni va Yangi yil archasi oʻrnatilishi rejalashtirilgan hudud koʻrib chiqilib, piyodalar yoʻlaklari va avtoturargohlarning tayyorgarligi baholandi.
Termiz shahridagi “Manguzar” YPX maskanida xodimlar bilan suhbat oʻtkazilib, xizmat jarayonlari va muammolari tinglandi. Maskandagi dam olish xonalari, tibbiy punkt, oʻquv xonalari va kuzatuv kameralari koʻrikdan oʻtkazilib, kamchiliklarni bartaraf etish boʻyicha topshiriqlar berildi.
Surxondaryo viloyati hokimi raisligida barcha tashkilot va korxonalar rahbarlari hamda shahar-tuman hokimlari ishtirokida videoselektor oʻtkazilib, joriy yilning 11 oyida sodir boʻlgan YTHlar muhokama qilindi. YHXX rahbarining maʼruzasi tinglanib, avariyalarning oldini olish, harakat xavfsizligini taʼminlash va yoʻl infratuzilmasini yaxshilash borasidagi kamchiliklar koʻrsatib oʻtildi. Ayrim masʼullarga intizomiy choralar koʻrildi.
Temir yoʻl kesishmalarini xavfsizlashtirish, svetofor hamda tezlikni aniqlovchi radarlarni oʻrnatish va taʼmirtalab koʻpriklarni taʼmirlash boʻyicha aniq vazifalar yuklatildi.
Shuningdek, voyaga yetmaganlar ishtirokidagi YTHlari ham tanqidiy muhokama qilinib, maktab va MTTlardagi yoʻl harakati sinfxonalari va maydonchalaridan samarali foydalanish, targʻibot ishlarini kuchaytirish boʻyicha topshiriqlar berildi.
Ichki ishlar vazirligi Jamoat xavfsizligi departamenti Yoʻl harakati xavfsizligi xizmati Axborot xizmati