O‘zbеkiston Rеspublikаsi Ichki ishlаr vаzirligi

Hozirgi globallashuv va bozor iqtisodiyoti sharoitida yuksak salohiyatli, bilimli, masʼuliyatli kadrlarni yetishtirish, kasbiy bilim va koʻnikmalarni berish dolzarb masalaga aylangan. Bu borada bilan Ichki ishlar vazirligi Malaka oshirish instituti Kasbiy tayyorgarlik fakulteti vazirlik sohaviy xizmatlari bilan hamkorlikda tizimli ishlarni yoʻlga qoʻygan. Ayni kunlarda Institutning Olmaliq shahridagi oʻquv bazasida Kasbiy tayyorgarlik fakulteti tinglovchilarining navbatdagi oʻquv kurslari boʻlib oʻtmoqda. Oʻquv bazasida tinglovchilar uchun barcha shart-sharoitlar yaratilgan.

Bugungi kunda institutda “Yoʻl-patrul faoliyati”, “Patrul-post xizmati faoliyati”, “Pasport tizimini taʼminlash faoliyati”, “Maxsus operatsiyalarni amalga oshirish faoliyati”, “Jazoni ijro etish faoliyati” yoʻnalishlarida maxsus besh oylik dastur asosida belgilangan qabul kvotasi boʻyicha kadrlar tayyorlanmoqda.

Oʻquv mashgʻulotlari vazirlik sohaviy xizmatlari bilan hamkorlikda ishlab chiqilgan oʻquv dasturlari asosida tashkil etildi. Nazariy va amaliy mashgʻulotlar Ichki ishlar vazirligi Malaka oshirish instituti professor-oʻqituvchilari va sohaviy xizmatlarning tajribali amaliyot xodimlari tomonidan nafaqat anʼanaviy usullarda, balki zamonaviy axborot kommunikatsiya texnologiyalarini qoʻllagan holda interfaol usullarni qoʻllagan holda davra suhbati, bahs, munozara, seminar-trening, amaliy mashgʻulot shakllarida olib borilyapti.

Oʻqish davomida tinglovchilarning kasbiy, huquqiy, ijtimoiy-siyosiy, jangovar, jismoniy, saf, ruhiy, tibbiy tayyorgarligini taʼminlashga alohida eʼtibor qaratilmoqda.

Mashgʻulotlar boshlanganiga hali koʻp vaqt boʻlmagan boʻlsa-da malakali ustozlar koʻmagida tinglovchilar yuqori natijalarni qoʻlga kiritib kelayotganiligi quvonarlidir. Xususan, oʻquv mashgʻulotlarini aʼloga oʻzlashtirgan, turli tanlovlarda, musobaqalarda munosib ishtirok etib, faxrli oʻrinlarni egallagan tinglovchilar borligi institutning ham faxridir.

Jumladan, joriy yilning 21-26 aprel kunlari Andijon shahrida sportning “Erkin kurash” turi boʻyicha yoshlar oʻrtasida oʻtkazilgan Oʻzbekiston kubogida IIV Malaka oshirish instituti Kasbiy tayyorgarlik fakulteti tinglovchilari safdor Abbosjon Yoʻldoshev 74 kg vazn toifasida hamda safdor Mironshoh Rajabov +125 kg vazn toifasida ishtirok etib kumush medallarni qoʻlga kiritdi.

Oʻquv mashgʻulotlarida institutning malakali professor-oʻqituvchilari tomonidan tinglovchilarning kasbiy — huquqiy bilimlarini yuksaltirish maqsadida sohaga oid meʼyoriy hujjat talablarini oʻrganish hamda davlatimiz rahbari tomonidan ilgari surilgan ichki ishlar organlari faoliyatiga oid dolzarb vazifalarga, ularning mazmun-mohiyati va ahamiyatiga, sohaga oid qabul qilingan yangi normativ-huquqiy hujjatlarning talablari bilan tanishtirishga va kelgusida xizmat faoliyati samaradorligini oshirishga alohida eʼtibor qaratilmoqda.

Tinglovchilarning bilim olishga boʻlgan ishtiyoqlari, kelajakda masʼuliyatli va xalqparvar ichki ishlar organlari xodimlari boʻlib yetishish yoʻlidagi intilishlari nazariy va amaliy mashgʻulotlar jarayonida yaqqol namoyon boʻlmoqda. Kelajakda ushbu tinglovchilar yuksak mahoratli kadrlar boʻlib yetishib, yurtimiz rivoji uchun chin dildan xizmat qilishlariga ishonamiz.

IIV Malaka oshirish instituti Matbuot xizmati