Toshkent viloyatida yoshlar oʻrtasida voleybol boʻyicha “IIBB boshligʻi kubogi” musobaqasi boʻlib oʻtdi
2025-12-05 09:00:00 / Yangiliklar
Oʻzbekiston Respublikasi Prezidentining 2024-yil 19-iyuldagi “Voleybol sport turlarini yanada rivojlantirish chora-tadbirlari toʻgʻrisida”gi qarori ijrosini taʼminlash, shuningdek yoshlar oʻrtasida jamoaviy sport turlarini keng targʻib etish maqsadida maktab oʻquvchilari oʻrtasida Toshkent viloyati “Ichki ishlar bosh boshqarmasi boshligʻi kubogi” musobaqasi oʻtkazildi.
Viloyatdagi 877 ta maktab oʻquvchilari ishtirok etgan saralash bosqichi yuqori saviyada tashkil etilib, tuman va shahar bosqichlari yakuniga yetkazildi. 22 ta hududdan saralangan jamoalar oʻrtasidagi viloyat bosqichida bellashuvlar yanada shiddatli tus oldi.
Unda yoshlar oʻz maktabi, mahallasi va tumani shaʼni uchun bor kuch va mahoratini namoyon qildi. Tadbir voleybol sportini ommalashtirish, iqtidorli sportchilarni aniqlash hamda terma jamoalar uchun munosib nomzodlarni shaffof tanlab olishga xizmat qildi.
Musobaqaning yakuniy natijalariga koʻra: Qizlar oʻrtasida – 1-oʻrin Quyi Chirchiq tumani, 2-oʻrin Yangiyoʻl tumani, 3-oʻrin Chirchiq shahri; Oʻgʻil bolalar oʻrtasida – 1-oʻrin Olmaliq shahri, 2-oʻrin Piskent tumani, 3-oʻrin Zangiota tumani jamoalari qoʻlga kiritdi.
Gʻolib jamoalarga esdalik sovgʻalari, diplom va kuboklar Toshkent viloyati IIBB boshligʻi, polkovnik Abduvosit Abdurazakov tomonidan topshirildi.
Birinchi oʻrinni qoʻlga kiritgan jamoalar esa endilikda respublika miqyosidagi Ichki ishlar vaziri kubogida Toshkent viloyati shaʼnini himoya qiladi.
Toshkent viloyati IIBB Axborot xizmati