Fuqarolarning murojaatlari bilan ishlash tizimi samaradorligini oshirish maqsadida, Ichki ishlar vazirligi hamda vazirlik huzuridagi Jazoni ijro etish departamenti rahbariyati tomonidan fuqarolar qabuli oʻtkazildi
2025-12-05 09:00:00 / Yangiliklar
Fuqarolar murojaatlari bilan ishlash samaradorligini yanada oshirish, aholi roziligiga erishish va jamiyatda ochiqlikni taʼminlash maqsadida joriy yilning 3-dekabr kuni Toshkent viloyati Zangiota tumanidagi “Sadoqat” bogʻi maʼnaviyat markazida jazoni ijro etish tizimiga oid masalalar boʻyicha keng qamrovli sayyor qabul tashkil etildi.
Tadbirda Oʻzbekiston Respublikasi Bosh prokuraturasi 17-boshqarmasi, Ichki ishlar vazirligi Shaxsiy xavfsizlik bosh boshqarmasi hamda Jazoni ijro etish departamenti rahbariyati ishtirok etib, fuqarolarning murojaatlarini shaxsan tingladi.
Sayyor qabul yuqori darajada tashkil etildi. Qishki mavsum sharoiti inobatga olinib, bino ichida issiq ichimlik suvi, tibbiy yordam guruhi, shuningdek, navbatda turgan fuqarolar vaqtini mazmunli oʻtkazishi uchun zamonaviy kutubxona faoliyati tashkil qilindi.
Fuqarolar xavfsizligini taʼminlash maqsadida yoʻl harakati xavfsizligi va profilaktika inspektorlari ham jalb etildi. Bunday sharoitlar murojaat bilan kelgan har bir shaxsga hurmat va eʼtibor bilan yondashish yoʻlida muhim omil boʻldi.
Tadbir davomida jami 120 nafar fuqaro tashrif buyurdi, ulardan 85 nafari Jazoni ijro etish departamenti rahbariyatiga oʻz murojaatlarini taqdim etdi.
Murojaatlar mazmun jihatdan turlicha boʻlib, asosan mahkumlarni yashash manziliga yaqin muassasalarga oʻtkazish, jazoni yengilrogʻiga almashtirish, ularning sogʻligʻiga doir muammolar va afv etish kabi masalalarni qamrab oldi.
Eng muhimi, murojaatlarning 30 foizi tezkor tarzda joyida hal etildi. Fuqarolar oʻzlarini qiynayotgan masalalar boʻyicha aniq, huquqiy asoslangan javob oldilar.
Qolgan 70 foiz murojaat esa kompleks oʻrganish va sohaviy idoralar bilan hamkorlikda choralar koʻrilishini talab etishi tufayli nazoratga olindi.
Ularni hal etish boʻyicha masʼul rahbarlarga aniq vazifalar yuklatildi.
Ushbu sayyor qabulda inson manfaatlari ustuvor boʻlib, fuqarolarning muammolari va dard-u tashvishlarini bevosita eshitishga qaratilgan muhim amaliy qadam boʻldi.
IIV Jazoni ijro etish departamenti Axborot xizmati