Namangan viloyati kuz–qish shtabining navbatdagi kengaytirilgan yigʻilishi boʻlib oʻtdi
2025-12-05 09:00:00 / Yangiliklar
Namangan viloyati hokimi Shavkatjon Abdurazzoqov, viloyat IIB boshligʻi hamda boshqa huquqni muhofaza qiluvchi organlar rahbarlari tomonidan kuz–qish shtabining navbatdagi kengaytirilgan yigʻilishi oʻtkazildi.
Viloyat IIB Jamoat tartibini saqlash boshqarmasida joylashgan shtabda sohaga daxldor tashkilotlar rahbarlari qatnashgan yigʻilishda shahar va tumanlarda qish mavsumining borishi atroflicha muhokama qilindi.
Viloyat rahbari avvalo ijtimoiy soha obyektlari va koʻp qavatli turar-joylarni barqaror issiqlik bilan taʼminlash, aholiga gaz va koʻmir mahsulotlarini oʻz vaqtida hamda tartibli yetkazib berish, shuningdek, kommunal xizmatlar faoliyatini kuchaytirish zarurligini alohida taʼkidladi.
Shu bilan birga, ob-havo sharoitidan kelib chiqib, ekologik barqarorlikni taʼminlash boʻyicha ham topshiriqlar berildi.
Xususan, atmosferadagi changni kamaytirish maqsadida maxsus suv sepuvchi texnikalar yordamida daraxtlar, piyodalar yoʻlaklari va yoʻl boʻylarini muntazam yuvib borish, chiqindilarni oʻz vaqtida tashib ketish, yashil hududlar holatini yaxshilash boʻyicha masʼullarga koʻrsatmalar berildi.
Shahar va tumanlar hokimlari hamda kommunal soha rahbarlarining hududlardagi mavjud vaziyat yuzasidan hisobotlari tinglandi.
Eslatib oʻtamiz, fuqarolar qish mavsumiga oid masalalar boʻyicha shtabga 1056 qisqa raqami orqali murojaat qilishlari mumkin.
Namangan viloyati IIB Axborot xizmati