Faxriylar – faxrimiz. Oltinga teng qiymatlar
2024-05-02 12:00:00 / Yangiliklar
Gʻayratli kishilar doim xayrli tashabbuslarga bosh-qosh boʻlishadi. Bunday odamlar fidoyiligi bilan yon-atrofidagi kishilarga, ayniqsa, yoshlarga oʻrnak koʻrsatadi. Ana shunday shijoatli faxriylarimizdan biri — isteʼfodagi mayor Abduhalim Abduxalilov.
Lavhamiz qahramoni koʻp yillar davomida ichki Ishlar organlarida turli masʼuliyatli vazifalarda, rahbarlik lavozimlarida xizmat qilgan. Surishtiruvchilikdan tortib jinoyat qidiruv yoʻnalishida, huquqbuzarliklar profilaktikasi xizmatida faoliyat yuritgan.
Abduhalim Abduxalilov pensiyaga chiqqanidan keyin ham shijoatini yoʻqotmadi. Oʻzi yashayotgan mahallaning jamoat ishlarida ham, ichki ishlar organlarining maʼnaviy-maʼrifiy tadbirlarida ham faollik koʻrsatdi. Mana, 6-yildirki, Termiz shahar IIB Faxriylar kengashining raisi sifatida yosh avlodni vatanparvarlik ruhida tarbiyalash ishlariga munosib hissa qoʻshmoqda.
Uning saʼy-harakati hamda kengashning 9 nafar aʼzosi koʻmagida Milliy gvardiya viloyat boshqarmasi bilan hamkorlik oʻrnatilib, shahar ichki ishlar organlari xodimlarining 50-60 nafar farzandlari «Chavandozlar maktabi» toʻgaragiga bepul qatnashmoqda. Xuddi shunday, Mudofaaga koʻmaklashuvchi «Vatanparvar» tashkiloti bilan oʻrnatilgan yaqin hamkorlik natijasida suzish, miltiqdan oʻq otish, biatlon kabi toʻgaraklarda ham bolalar shugʻullanishi uchun imkoniyat yaratildi.
Ayniqsa, Faxriylar kengashi tashabbusi bilan turli xotira turnirlari, marafonlarning uyushtirilayotgani barchani mamnun qilmoqda. Sanʼat saroyi hududidagi bogʻda tashkil etilgan «Sogʻlomlashtirish yoʻlagi»da Abduhalim Abduxalilov boshchiligidagi faxriylar, keksalar har kuni erta tongda badantarbiya mashgʻulotlari bilan shugʻullanishi esa yanada koʻpchilikning eʼtirofiga sazovor boʻldi. Darvoqe, A.Abduxalilovning oʻzi ham musobaqalarda faol ishtirok etib keladi va bir necha marotaba gʻoliblikni qoʻlga kiritgan.
— Termiz shahrida 1405 nafar faxriy yashaydi, — deydi isteʼfodagi mayor Abduhalim Abduxalilov. Ularning 12 nafari Afgʻonistonda boʻlib oʻtgan janglarda, 2 nafari esa Chernobil fojiasi oqibatlarini bartaraf etishda qatnashgan. Yana 136 nafari boquvchisini yoʻqotgan boʻlsa, 12 nafari betobligi tufayli yotib qolgan. Kengash aʼzolari bilan birgalikda muntazam ravishda ularning holidan xabar olamiz, kerak boʻlsa, moddiy jihatdan qoʻllab-quvvatlaymiz. Ularning koʻngli togʻdek koʻtariladi. Axir, bu dunyoda bizdan faqat yaxshilik qoladi.
Uch qiz, ikki oʻgʻilni jamiyatga foyda keltiradigan insonlar sifatida ulgʻaytirgan lavhamiz qahramoni bugungi kunda 15 nafar nabira va 4 nafar chevara bilan birga keksalik gashtini surmoqda. Ishdan chiqib, nabiralarning tahsil olishiyu sport bilan shugʻullanishiga eʼtibor qaratadi. Ularni doim foydali mashgʻulot bilan band boʻlishga undaydi.
Feruza Rahmonqulova, oʻz muxbirimiz. «Postda»
Surxondaryo viloyati