O‘zbеkiston Rеspublikаsi Ichki ishlаr vаzirligi

Soʻnggi yillarda Shahrixon tumanida jinoyatchilikka qarshi kurashishda, uning oqibatlariga emas, balki sabab va shart-sharoitlariga qarshi kurashish amaliyoti joriy etildi. Bu usul nafaqat jinoyatlar sonini kamaytirish, balki odamlar ongida javobgarlik va xavfsizlik hissini kuchaytirishga ham xizmat qilmoqda.

Shu bois yilning oʻtgan toʻqqiz oyi davomida tumanda talonchilik, bosqinchilik, avtomashina oʻgʻirlash kabi ogʻir turdagi jinoyatlar sodir etilmadi. Bu natija ortida ichki ishlar organlari, mahalla faollari va aholi hamkorligida yoʻlga qoʻyilgan keng qamrovli ishlar, doimiy nazorat va tahlil tizimi turibdi.

Bu kabi ijobiy natijalarni hududlarda ham kuzatish mumkin. Masalan, mavjud 79 ta mahallaning 20 tasida jinoyatlar soni sezilarli darajada kamaygan boʻlsa, 54 ta mahallada umuman jinoyat sodir etilmadi. Bu esa har bir fuqaroning ogohligi, hamjihatlik muhitining shakllanganidan dalolat beradi.

Biroq bu bilan koʻngil taskin topmasligi kerak. Shuning uchun jinoyatchilik darajasi yuqori boʻlgan “Andijonlik”, “Barkamol avlod”, “Namozgoh”, “Oq oltin” va “Saroy” mahallalarida kriminogen vaziyatni barqarorlashtirish boʻyicha maxsus dastur ishlab chiqildi. Unda profilaktik reydlar, manzilli uchrashuvlar, yoshlar bilan suhbatlar va jamoatchilik nazoratini kuchaytirish kabi chora-tadbirlar qamrab olingan.

Asosiy vazifamiz jinoyatga olib keladigan omillar ildizini aniqlab, ularni bartaraf etish, — deydi tuman IIB boshligʻi, podpolkovnik Sardor Arziyev. — Shu maqsadda har bir mahallada “Xavfsiz hudud” tamoyili asosida ish yuritilyapti. Ishonchimiz komilki, profilaktikaning taʼsiri jazodan koʻra samaraliroq boʻladi.

Bu jarayonda zamonaviy tahdidlardan biri — kiberjinoyatchilikka qarshi kurashish masalasi ham muhim oʻrin tutadi. Internet imkoniyatlarining kengayishi bilan bir qatorda, firibgarlik usullari ham murakkablashmoqda.

Tumanda qayd etilgan kiberjinoyatlarning 65 foizida nomaʼlum shaxslar fuqarolarning bank kartalaridan pul yechib olgan. Qolgan 35 foizida esa odamlar internet orqali onlayn savdo jarayonida mablagʻni oldindan oʻtkazib berib, firibgarlarga ishongan holda zarar koʻrishgan.

Bu holatlar aholi orasida kiberxavfsizlik madaniyati yetarlicha shakllanmaganini anglatadi. Shu bois tuman IIB shaxsiy tarkibi tomonidan fuqarolar uchun “Kiberjinoyatlardan ehtiyot boʻling!”, “Nomaʼlum havolalarni ochmang!” kabi mavzularda targʻibot tadbirlari muntazam oʻtkazilmoqda.

Hududda xavfsiz muhit yaratish faqat huquqni muhofaza qiluvchi organlar emas, balki har bir fuqaroning ham burchi ekanini hayotning oʻzi koʻrsatmoqda.

Jinoyatlarning barvaqt oldini olish, yoshlarning boʻsh vaqtini mazmunli tashkil etish, mahallalarda ijtimoiy hamjihatlik muhitini mustahkamlash bugungi tinchlik va ertangi barqarorlikning garovidir.

©️ “Postda” gazetasi