IIV tashabbusi bilan «Kitobxonlik haftaligi»doirasida Respublika bolalar kutubxonasida sheʼriyat kechasi tashkil etildi
2024-04-30 15:00:00 / Yangiliklar
Ichki ishlar vazirligida oʻtkazilayotgan «Kitobxonlik haftaligi-2024» doirasida joriy yilning 26-aprel kuni vazirlik Ixtisoslashtirilgan maktab-internati oʻquvchilari ishtirokida Respublika bolalar kutubxonasida sheʼriyat kechasi tashkil etildi.
Tadbirni IIV Axborot-resurs markazi boshligʻi, podpolkovnik Н.Муллажонова kirish soʻzi bilan ochib berdi hamda ishtirokchilarni kitobxonlik haftaligining mohiyati va ahamiyati, bu borada respublikamiz axborot-kutubxona markazlarida boʻlib oʻtayotgan tadbirlar haqida maʼlumot berdi.
Tadbirga mehmon sifatida taklif etilgan ijodkorlar – taniqli bolalar shoiri Xalqaro «Oltin qalam» mukofoti sohibi Dilshod Rajab hamda Oʻzbekiston Yozuvchilar uyushmasi aʼzosi, shoir, «Doʻstlik» orden sohibi isteʼfodagi polkovnik Zikrilla Neʼmat yigʻilganlarga Vatan, ona, muhabbatni madh etuvchi oʻz ijod namunalaridan oʻqib berdilar.
Tadbir qizgʻin muloqot tarzida oʻtib, ishtirokchi oʻquvchilar uylarida shaxsiy kutubxonalari va unda qancha kitoblar borligi haqida gapirib berishdi. Oʻqigan ertaklari asosida viktorina savol-javoblari oʻtkazildi. «Topgan-topaloq» shartida bolajonlar berilgan topishmoqlarga javob berishdi hamda yod olgan sheʼrlaridan oʻqib berishdi.
Tadbir soʻnggida ishtirokchi oʻquvchilarning sinf kutubxonasiga mualliflar nomidan kitoblar sovgʻa qilindi.
Shuningdek, Respublika bolalar kutubxonasi mutaxassislari bolajonlarga bu yerda mavjud sharoitlar va imkoniyatlar haqida gapirib berib, muntazam mana shunday tadbirlarni tashkil etishda hamkorlikka tayyor ekanliklarini bildirdilar.