Yoʻl intizomni yoqtiradi. Uychi oʻzgardi, navbat boshqalarga
2025-11-28 07:50:00 / Yangiliklar
Yoʻl harakati xavfsizligini taʼminlash borasida amalga oshirilayotgan tizimli ishlar insonning xavfsiz hayoti uchun xizmat qiladi. Namangan viloyati IIB JXX YHXB tashabbusi bilan Uychi tumanida oʻtkazilgan oʻquv-amaliy seminar aynan shu masʼuliyatni chuqurroq anglashga, tajribalarni baham koʻrishga qaratilgani bilan ahamiyatli boʻldi.
Seminarda shahar va tuman IIB boshliqlari, YHXB katta inspektorlari ishtirok etib, yoʻl infratuzilmasini yaxshilash boʻyicha amalga oshirilgan ishlar yuzasidan taqdimotni tinglashdi. Bu jarayon mavjud muammolarni anglash, yechimlarni izlash va sohada toʻplangan tajribani takomillashtirish uchun muhim muloqot maydoni boʻlib xizmat qildi.
Amaliy qismda ishtirokchilar D-109 «Namangan-Uychi-Uchqoʻrgʻon» avtomobil yoʻlining 12-13-kilometr oraligʻiga tashrif buyurishdi. Bu yerda soʻnggi yillarda qilingan oʻzgarishlar yaqqol koʻzga tashlanadi. Piyodalar uchun qulay yoʻlaklar, qavariq oʻtish joylari, zamonaviy svetoforlar va yoʻl belgilari, radar-kamera qurilmalarining oʻrnatilgani — bularning barchasi bir maqsad, yaʼni harakat xavfsizligini taʼminlash yoʻlida amalga oshirilgan.
Shuni alohida taʼkidlash kerakki, yoʻlni taʼmirlash yoki yangi belgilar qoʻyish xavfsizlikning faqat bir qismi, yaʼni ishning yarmi, xolos. Qolgan yarmi esa haydovchining hushyorligi, piyodaning ehtiyotkorligi va umumiy madaniyatda namoyon boʻladi. Uychi tajribasida aynan mana shu ikki yoʻl — texnik sharoitni yaxshilash va odamlar ongini oʻzgartirish hamohanglikda olib borilayotgani seziladi.
Seminar davomida ishtirokchilar oʻz taklif-mulohazalarini bildirdi, mavjud tizimni yanada samarali qilish boʻyicha fikr almashildi. Yakunda barcha tuman va shaharlar uchun maxsus qoʻllanmalar tarqatildi.
Tajribani viloyatning boshqa hududlarida ham joriy etish boʻyicha kelishib olindi. Bu esa oʻtkazilgan tadbirning amaliy natijasi sifatida baholandi.
Jahongir TOʻXTASINOV, oʻz muxbirimiz.
Namangan viloyati.