O‘zbеkiston Rеspublikаsi Ichki ishlаr vаzirligi

Angor tumani IIB Migratsiya va fuqarolikni rasmiylashtirish boʻlinmasi xodimlari fuqarolarga sifatli va tezkor xizmat koʻrsatishni oʻz oldiga ustuvor vazifa qilib belgilagan. Shunga koʻra, joriy yilda 9400 dan ortiq ID-kartalar rasmiylashtirildi, xorijga chiqish uchun 1937 nafar fuqaroga biometrik pasport berildi.

Oʻtgan davr ichida yurtdoshlarimiz tomonidan doimiy roʻyxatga qoʻyish boʻyicha qilingan 4362 ta murojaat ijobiy hal etilgan boʻlsa, chet el fuqarolari va fuqaroligi boʻlmagan shaxslarning 1806 nafariga vaqtincha roʻyxatga qoʻyilishida amaliy yordam koʻrsatildi.

Biroq ayrim holatlarda qonunbuzarliklar ham aniqlanmoqda. Masalan, bu yil 44 nafar chet el fuqarosiga Oʻzbekiston Respublikasi hududida boʻlish qoidalarini buzgani uchun maʼmuriy bayonnomalar rasmiylashtirildi.

Fuqarolar bilan ishlashda asosiy maqsadimiz — ularning roziligi va ishonchini qozonish, — deydi boʻlinma boshligʻi, podpolkovnik Bahodir Eshquvvatov. — Har bir murojaatga jiddiy yondashamiz, hujjatlarni rasmiylashtirish jarayonida shaffoflik va tezkorlikni taʼminlashga alohida eʼtibor qaratamiz.

Shu bilan birga, chet el fuqarolari bilan ishlashda ham qonun talablariga qatʼiy rioya etilishini nazorat qilamiz.

Bugun tumanda sohasida yangicha yondashuv asosida faoliyat yuritilayotgani, zamonaviy axborot tizimlaridan keng foydalanilayotgani xizmat natijadorligini taʼminlashda katta ahamiyat kasb etmoqda.

©️ “Postda” gazetasi, Feruza Rahmonqulova, Surxondaryo viloyati.