Yuksak mukofot sohiblari. Jasorat va shijoat unga xos
2025-11-13 13:55:00 / Yangiliklar
IIV huzuridagi Jazoni ijro etish departamenti Birinchi mintaqaviy hudud 21-son Jazoni ijro etish koloniyasining Tezkor qidiruv boʻlimi kichik inspektori, kichik serjant Sayyora Karimqulova ana shunday fidoyi va mehnatkash ayollaridan biri.
Bolalikda uygʻongan havas
Lavhamiz qahramoni Toshkent viloyatining Yangiyoʻl tumanida tugʻilib voyaga yetdi. U bolaligidanoq tirishqoqligi va dadilligi bilan tengdosh qizlardan ajralib turardi. Otasi Qudrat Ikromov uzoq yillar tarbiya koloniyasida nazoratchi lavozimida xizmat qilgan. Onasi Sharifa Ashurova esa 21-son JIEK Ishlab chiqarish boʻlimining tajribali xodimlaridan biri boʻlgan. Osoyishtalik posbonlari oilasida voyaga yetgan Sayyoraxonda bolaligidan mazkur sohaga havas uygʻondi. U ulgʻaygach, ota-onasi izidan borishni niyat qildi.
U Yangiyoʻl iqtisodiyot kollejini tamomlab, 2006-yilda Birinchi mintaqaviy hudud 24-son tarbiya koloniyasida ish faoliyatini boshladi. Bu soha, ayniqsa, yosh mutaxassis uchun oson emas edi. Jinoyat yoʻliga kirib qolgan oʻsmirlar bilan ishlash katta sabr, mehr va tajribani talab etardi. Ammo Sayyora tirishqoqligi, tinimsiz oʻrganishga boʻlgan intilishi tufayli buning uddasidan chiqdi.
Keyinchalik 1-son Tergov hibsxonasida va 21-son Jazoni ijro etish koloniyasida faoliyat yuritdi. Xizmati davomida inson psixologiyasini chuqur tushunish, muammoli vaziyatlarda toʻgʻri qaror qabul qilishni oʻrgatdi.
Oila — baxt qoʻrgʻoni
Sayyora Karimqulovaning tur- mush oʻrtogʻi — tadbirkor. Ular birgalikda ikki nafar farzand — Saidxon va Mohinabonularni tarbiyalab voyaga yetkazmoqdalar.
- Farzandlarimdan umidim katta. Ular kelajakda bilimli, mehnatsevar va el-u yurtimizga foyda keltiradigan inson boʻlib yetishishlari uchun barcha shart-sharoitlarni yaratishga harakat qilamiz, — deydi Sayyoraxon samimiyat bilan.
Ustozlar izidan
Sayyora Karimqulova xizmat faoliyati davomida koʻplab tajribali ustozlar bilan ishlash baxtiga muyassar boʻlgan. Ular orasida Gulruh Karimova, Abdurasul Majidov, Ibrohim Teshaboyev va Poʻlat Gʻaybullayev kabi kasb fidoyilari bor.
- Ustozlarimning har bir oʻgiti, maslahati men uchun hayotiy saboq boʻlgan. Ulardan burchga sadoqat, intizom, kasb mahorati va odamiylikni oʻrgandim, — deydi Sayyora Karimqulova.
Hozir esa oʻzi ham ustoz darajasiga yetgan. Uning shogirdlari koʻp va turli masalalarda maslahat soʻrab keladilar. Sayyora ulardan hech qachon koʻmagini ayamaydi, tajribasi bilan boʻlishadi.
Munosib baho
Sayyora Karimqulovaning fidoyilarcha xizmati oʻzining munosib bahosini topdi. U yaqinda Ichki ish- lar organlari xodimlari kuni munosabati bilan Vatanimizning yuksak mukofoti — «Jasorat» medali bilan taqdirlandi.
- Bu eʼtirof zimmamga katta masʼuliyat yuklaydi. Endi yanada jonkuyarlik, fidoyilik bilan xizmat qilishim, oʻzimga bildirilgan ishonchga munosib boʻlishim kerak, — deydi u.
Ayol baxtli boʻlsa ...
Agar ayol baxtli boʻlsa, uning oilasi baxtli boʻladi. Baxtli oilalar koʻpaysa, jamiyatda barqarorlik, osudalik hukm suradi. Ayolni esa mehnatsevarlik, sadoqat va tinimsiz harakat yuksaklikka yetaklaydi. Bu haqiqatni qahramonimiz oʻz hayoti, xizmat faoliyati davomida isbotlab kelmoqda.
Xadicha Oʻtayeva, kapitan. “Postda”