O‘zbеkiston Rеspublikаsi Ichki ishlаr vаzirligi

Sarvar Naimov xizmat faoliyatini oʻzi tugʻilib oʻsgan Vobkent tumani IIB EKG katta eksperti lavozimida boshlagan. Soʻngra oʻzi qiziqqan tergov sohasida xizmatni davom ettirgan lavhamiz qahramoni mayor Behzod Fayzulloyev va podpolkovnik Oybek Bozorovdan sohaning sir-asrorlarini, fuqarolar bilan muomala qilish yoʻl-yoʻriqlarini oʻrgandi.

- Tergovchi jinoyatga jazo muqarrarligini taʼminlashga, aybsizlarni esa oqlashga oʻz hissasini qoʻshsa, uning yuzi yorugʻ boʻladi, — deydi tuman IIB huzuridagi Tergov guruhi tergovchisi, kapitan Sarvar Naimov.

Kapitan S. Naimov xizmat davri mobaynida koʻplab jinoyatlarni tergov qilishda va fosh etilishida oʻz hissasini qoʻshib kelmoqda. Keling, shu oʻrinda bunga bir misol keltirsak.

Lavhamiz qahramoni sodir etilgan yoʻl-transport hodisasi boʻyicha tergov ishlarini olib borayotgan edi.

Bir kuni gumonlanuvchi A.R. tergov jarayonida mastlik holatini jinoyat ishiga qoʻshmaslikni va buning evaziga 500 AQSH dollari pora berishni taklif qiladi. Burchiga sadoqatli, halollikni oʻziga shior qilgan kapitan S. Naimov esa unga bu qilmishi qonunga zid ekanligini, qolaversa, holatni ogʻirlashtirishini tushuntiradi. Biroq shuncha tushuntirishlarga qaramay, gumonlanuvchi pora taklif qilishda davom etadi. Shu sababli mazkur shaxsga nisbatan qonuniy chora koʻriladi.

Huquqni muhofaza qiluvchi organlar xodimlari tomonidan oʻtkazilgan tezkor tadbirda fuqaro A.R. 500 AQSH dollari miqdoridagi pulni pora tariqasida tergovchiga bergan vaqtida daliliy ashyolar bilan qoʻlga olindi.

Mirzoqul AHADOV, oʻz muxbirimiz.
Buxoro viloyati.