Buxoro viloyati G‘ijduvon tumani hokimligi

Assalomu alaykum hurmatli yurtdoshlar, Qadrli G‘ijduvonliklar!

Oldimizda muhim palla-qish mavsumi turibdi. Mavsumda aholi uchun zarur sharoitlarni yaratish, ijtimoiy soha obyektlari hamda infratuzilma tizimlarining barqaror faoliyat yuritishi uchun oldindan puxta tayyorgarlik ko‘rish, iste’molchilarni energiya resurslari bilan uzluksiz ta’minlash hamda mavsumni betalafot o‘tkazish katta ahamiyatga ega.

Bu borada muhtaram Prezidentimiz va Hukumat tomonidan biz rahbarlarga aniq vazifa va topshiriqlar belgilab berilgan. Tumanimizda mazkur topshiriqlardan kelib chiqqan holda tizimli ishlar, chora-tadbirlar amalga oshirildi. Bugungi kunda barcha soha kuz-qishga shay holatga keltirildi.

Kuz-qish davrini barqaror o‘tkazish, aholi va ijtimoiy soha obyektlarini uzluksiz yoqilg‘i-energetika resurslari bilan ta’minlash, shuningdek, mavjud imkoniyatlardan tejamkorlik bilan foydalanish bo‘yicha tumanimizdagi har bir korxona va tashkilot rahbarlari aholiga hisobot ham berishdi.

Shuni alohida ta’kidlamoqchimanki, biz o‘tgan yillar davomida yo‘l qo‘yilgan kamchilik va muammolarni jiddiy tahlil qildik. Kommunal tizim va barcha rahbarlarning shaxsiy mas’uliyati va javobgarligini oshirdik.

Tumanda kuz - qish mavsumini betalafot o‘tkazish, jumladan  ko‘p qavatli uy-joy fondi, issiqlik, suv ta’minoti, elektr va gaz tizimini hamda ijtimoiy soha obyektlarini mavsumga tayyorlash, tabiiy gaz bilan ta’minlanmagan aholi xonadonlari hamda ijtimoiy soha obyektlariga ko‘mir va suyultirilgan gaz mahsulotlarini yetkazib berish bo‘yicha tumanda bir qator ijobiy ishlar amalga oshirildi.

Joriy yilda mavsumga tayyorgarlik ko‘rish jarayonida 4 ta asosiy yo‘nalish belgilab olindi va dasturda belgilangan tadbirlar amalga oshirildi:

1-yo‘nalish,  2025-2026-yillar kuz-qish mavsumida tuman iste’molchilarini yoqilg‘i-energetika resurslari bilan barqaror ta’minlash yuzasidan ko‘rilayotgan choralar hamda muhandislik kommunikatsiya tarmoqlari (elektr, gaz, suv va issiqlik ta’minoti)ni tayyorlash, elektr va tabiiy gazni iqtisod qilish choralari ko‘rildi;

2-yo‘nalish, Uy-joy fondini kuz-qish mavsumiga tayyorlash ishlari amalga oshirildi;

3-yo‘nalish, Ijtimoiy soha obyektlarini kuz-qish mavsumiga tayyorlash ishlari amalga oshirildi;

4-yo‘nalish, Ijtimoiy soha obyektlari va aholini ko‘mir mahsuloti va suyultirilgan gaz bilan ta’minlash masalalariga e’tibor berildi.

Elektr energiyasi ta’minoti bo‘yicha

Tumandagi jami  70  010 ta (shundan aholi 65 802 ta, ulgurji 4 208 ta) iste’molchilarga kuz-qish mavsumida bir maromda elektr energiyasi yetkazib berish bo‘yicha dastur doirasida tegishli ta’mirlash ishlari olib borildi.

Jumladan, 347,8 km elektr uzatish tarmoqlari, 96 ta transformator punktlarida mukammal va 616,2 km elektr uzatish tarmoqlari va 252 dona transformator punktlarida joriy ta’mirlash ishlari to‘liq bajarildi.

Bundan tashqari, Davlatimiz rahbarining tashabbuslari asosida og‘ir toifadagi 6 ta mahallalarda elektr ta’minotini yaxshilash maqsadida ajratilgan 6 mlrd 240 mln. so‘m mablag‘lar hisobiga ushbu hududlardagi 8 ta transformator punktlari yangidan o‘rnatilib, 53,8 km elektr tarmoqlari hamda 1078 ta tayanch ustunlar yangilandi.

Buning natijasida ushbu mahallalardagi 4 ming 602 ta xonadonlarning elektr ta’minoti yaxshilandi.

Tuman elektr ta’minoti korxonasi tomonidan kuz-qish mavsumi davomida sodir bo‘lishi mumkin bo‘lgan avariyaviy holatlarni tezkorlik bilan bartaraf qilish maqsadida, jamiyatning 29 nafar ishchi xodimlar jalb qilingan holda 7 ta avariya brigadalar tashkil qilindi.

Brigadalar uchun 6 ta avtomashinalar, 2 ta maxsus texnikalar shay holga keltirilgan. Korxona omborlariga 3 ta transformator punktlari, 0,7 tonna transformator moyi, 0,15 km kabel, 0,5 tonna sim, 1 dona mufta, 4 dona tayanch ustunlar hamda 34 dona boshqa materiallar zaxirasi yaratildi.

Tabiiy gaz ta’minoti bo‘yicha

Bugungi kunda tumanda 47656 ta (shundan aholi 46840 ta, ulgurji 816 ta) tabiiy gaz iste’molchilarga kuz qish mavsumida bir maromda tabiiy gaz yetkazib berish maqsadida, rejalashtirilgan 10,4 km.dan amalda 10.7 km gaz tarmoqlari rekonstruksiya qilindi, 8 ta(reja 3 ta) gaz taqsimlash punktlari va 2.7 km gaz quvurlarida mukammal ta’mirlash ishlari amalga oshirildi, 57.8 km (reja 50,8 km) gaz quvurlarida bosim ostida sinash va tozalash ishlari bajarilib, 219.6 km yer osti gaz quvurlari holati tekshirildi hamda 90,1 (reja 89,9 km)  km quvurlarni tartibga keltirish (bo‘yoqlash) ishlari to‘liq bajarildi.

“G‘ijduvontumangaz” gaz ta’minoti bo‘limi tomonidan kuz-qish mavsumida tabiiy gaz tizimida sodir bo‘lishi mumkin bo‘lgan avariyaviy holatlarni tezkorlik bilan bartaraf qilish maqsadida 1 ta avariya brigadalari tashkil qilinib, 1 ta avtomashina, 3 ta gaz payvandlash hamda 1 ta elektr payvandlash apparatlari shay holga keltirilgan.

Shuningdek, omborda 0,25 km turli diametrdagi gaz quvurlari, 6 dona zulfin (zadvijka)lar, 10 dona jo‘mrak (kranlar), 2 kg bolt va gaykalar, 10 kg himoya o‘rami (izolyatsiya), 25 kg elektrod, 50 kg karbid hamda 8 dona otvodlar zaxirasi yaratildi.

Ichimlik suvi ta’minoti bo‘yicha:  

Ichimlik suv tarmoqlarini mavsumga tayyorlash bo‘yicha dastur doirasida bugungi kunda, 1,5 km  ichimlik suvi tarmoqlarida mukammal, 7,2 km tarmoqlarda joriy hamda
1 tadan nasoslarda mukammal hamda joriy ta’mirlash ishlari amalga oshirildi. Shuningdek, sodir bo‘lishi mumkin bo‘lgan avariyaviy holatlarni tezkorlik bilan bartaraf  qilish maqsadida barcha zarur bo‘lgan materiallar zaxirasi yaratilib, texnikalar shay holatga keltirilgan. Ichimlik suvi yetib borishi qiyin hududlarga favqulodda ichimlik suvi yetkazib berish uchun 2 ta texnika tayyor holatda keltirilgan.

2-yo‘nalish bu ko‘p qavatli uy-joy fondini kuz-qish mavsumiga tayyorlash masalasidir.

   Tumanda 2,6 mingdan ziyod xonadondan iborat bo‘lgan 105 ta ko‘p xonadonli uylar mavjud bo‘lib, ularga 1 ta boshqaruvchi (“G‘ijduvon kommunal xizmat ko‘rsatish” MChJ) tashkilot tomonidan texnik xizmat ko‘rsatib kelinmoqda.

2025-yilda tumandagi jami 6 ta ko‘p xonadonli uy-joylarda qurilish-ta’mirlash ishlarini amalga oshirish rejalashtirilgan bo‘lib, bugungi kunda dastur doirasida 60 mln. so‘m mablag‘lar hisobiga 13 ta kirish yo‘laklari, 12 ta elektr taqsimlovchi shitlar, 14 ta kirish yo‘laklaridagi 48 ta energiya tejamkor chiroqlar o‘rnatilib, 4 ta ko‘p qavatli uylarning yerto‘la qismidagi oqova quvurlari va 8 ta xonadonlar ichki qismidagi oqava tik quvurlari yangisiga almashtirildi.

Bundan tashqari tuman mahalliy byudjeti hisobidan  25 ta ko‘p qavatli uylarning 57 ta kirish yo‘laklaridagi temir eshiklarga interkom (domafon) o‘rnatildi va 30 ta ko‘p qavatli uylarning kirish yo‘laklaridagi 45 ta temir eshiklarga kodli qulflar o‘rnatildi. Tumandagi 105 ta ko‘p qavatli uylarning 278 ta kirish yo‘laklarining barchasi kameralashtirilgan bo‘lib, 17 ta ko‘p qavatli uylarning 24 ta kirish yo‘laklariga tashvish tugmalari o‘rnatilib chiqildi.

Qish mavsumida ko‘p qavatli uy-joy fondining ichki muhandislik kommunikatsiya tizimlarida sodir bo‘lishi mumkin bo‘lgan avariyaviy holatlarni tezkorlik bilan bartaraf qilish maqsadida tumandagi boshqaruv xizmat ko‘rsatish kompaniyasiga zarur bo‘lgan materiallar zaxirasi yaratildi.

3-yo‘nalish, Ijtimoiy soha obyektlarini kuz-qish mavsumiga tayyorlash masalasi eng dolzarb hisoblanadi.

Joriy yil dasturlari doirasida tumandagi jami 6 ta, shundan 4 ta (34,4 mlrd.so‘m) maktab, 1 ta (2,7 mlrd.so‘m) maktabgacha ta’lim, 1 ta (28,9 mlrd.so‘m) tibbiyot obyektlarida qurilish, ssuda mablag‘lari hisobidan 7 ta shundan 2 ta (4,54 mlrd.so‘m)sog‘liqni saqlash 1 ta (1,5 mlrd.so‘m) sport va 4 ta (13,6 mlrd.so‘m) maktabgacha va maktab ta’limi obyektlari rekonstruksiya qilish hamda mukammal ta’mirlash ishlari olib borildi.

Ma’lumot uchun: G‘ijduvon tumanida jami 184 ta ijtimoiy soha muassasalari mavjud. Shundan, 75 ta davlat maktabgacha ta’lim tashkilotlari,  67 ta umumta’lim maktablari, 27 ta sog‘liqni saqlash obyektlari, 4 ta oliy ta’lim va texnikumlar, 6 ta sport, 4 ta madaniyat obyektlari, 1 ta ixtisoslashtirilgan ta’lim muassasalarini tashkil qiladi.

Tumandagi ijtimoiy soha muassasalarining kuz-qish mavsumiga tayyorgarligini o‘rganish hamda aniqlangan kamchiliklarni bartaraf qilish maqsadida 8 ta ishchi guruhlarini tashkil qilgan holda, tumandagi barcha ijtimoiy soha muassasalari to‘liq o‘rganilib, aniqlangan kamchiliklarni joyida bartaraf etish choralari ko‘rildi.

Mazkur ishchi guruhlarga viloyatdagi tegishli korxona va tashkilotlarning 8 nafar hamda tumandagi tegishli korxona va tashkilotlarining 62 nafardan ortiq xodimlari jalb qilindi.

4-yo‘nalish, Ijtimoiy soha obyektlari va aholini ko‘mir mahsuloti va suyultirilgan gaz bilan ta’minlash masalalariga alohida e’tibor qaratildi.

Ko‘mir ta’minoti bo‘yicha

Ijtimoiy soha muassasalariga 2025/2026-yillar kuz-qish mavsumi uchun jami 3 127,0  tonna mahalliy ko‘mir yoqilg‘isi jamg‘arilishi rejalashtirilgan bo‘lib, amalda 3 127 tonna (100,0%)ga  yetkazib berildi. Ijtimoiy sohalar tomonidan ko‘mir mahsuloti yetkazib berish ishlari davom etmoqda.

Xususan, Maktabgacha va maktab ta’limi muassasalari
reja 2752,0  tonna amalda 2752,0 tonna (100,0%),   Oliy va o‘rta maxsus ta’lim muassasalari reja 60,0 tonna amalda 60,0 tonna (100%), Madaniyat muassasalari reja 30,0 tonna amalda 30,0 tonna (100%), Sog‘liqni saqlash muassasalari reja 280,0 tonna amalda 280,0 tonna (100%) ga,sport va san’at tashkilotlari reja 15,0 tonna amalda 15,0 tonna (100%)jamg‘arilgan.

Shuningdek, aholi iste’molchilariga kuz-qish mavsumi uchun jami 7943,0 tonna (shundan, 6148,0  tonna mahalliy va 1795,0 tonna import) ko‘mir yoqilg‘isi jamg‘arish rejalashtirilgan. Bugungi kunda aholi ehtiyoji buyurtmasi  7200,0 tonna (105,%) elektron platformaga kiritilgan. Mahalliy hamda   import ko‘mir mahsulotlari aholi xonadonlariga tizimli ravishda yetkazib beriladi. Davlatimizning aholiga yaratib berayotgan imtiyozidan  kelib chiqib,  1 kg mahalliy ko‘mirning narxi 310 so‘mni tashkil etmoqda. 1 tonna ko‘mir narxi 310 ming so‘mni tashkil etmoqda.

Bugungi kunda (24.10.2025-yil holatida) tumanimizda ko‘mir ombori mavjud bo‘lmaganligi sababli, G‘ijduvon tumanidagi mavjud ko‘mir omboridan aholi iste’molchilari tomonidan jami 2937 tonna (2122 tonna mahalliy hamda 815 tonna import) ko‘mir yoqilg‘isi xarid qilingan.

Hozirgi kunda,  tumanidagi mavjud ko‘mir omborida 176  tonna  ko‘mir zaxiramiz mavjud bo‘lib, tumanimiz aholisi  uchun qolgan ko‘mir mahsulotlari ham peshma-pesh olib kelinmoqda.

 Suyultirilgan gaz ta’minoti bo‘yicha :

Mavsum davomida tabiiy gaz bilan ta’minlanmagan                 20672 ta iste’molchilarga suyultirilgan gaz yetkazib berish maqsadida 15 ta maishiy gaz balonlari zaxirasi yaratildi, 5 ta maxsus texnikalar shay holga keltirildi, 1 ta gaz tarqatish shoxobchalarida maxsus ishchi guruh tuzilgan holda ishchi guruh tuzilib mavsumga tayyorlash ishlari olib borildi.

Mavsum davomida (2025-yil oktabr - 2026-yil mart oylari) iste’molchilarga 2924,6 tonna suyultirilgan gaz yetkazib berilishi rejalashtirilgan bo‘lib, tasdiqlangan reja-grafik hamda aholining talabi asosida  belgilangan muddatlarda suyultirilgan gaz yetkazib berilishi ta’minlanadi. 

Aziz G‘ijduvonliklar!

Ma’lumki, har yili kuz-qish mavsumi yangi sinov va mas’uliyatlarni olib keladi. Bu esa biz rahbarlarning zimmasiga yanada muhim vazifalarni yuklaydi. Shuni unutmaslik kerakki, bugungi har bir harakatimiz, amalga oshirayotgan ishlarimiz mavsumni ko‘ngildagidek o‘tishiga xizmat qilishi bilan ahamiyatlidir.

Tumanda 2025-2026-yil kuz-qish mavsumiga puxta tayyorgarlik ko‘rish hamda iste’molchilarni energiya resurslari bilan uzluksiz ta’minlash bo‘yicha barcha tashkiliy choralar ko‘rilgan. 24/7 rejimda shtab faoliyati yo‘lga qo‘yiladi.

Aholiga va ijtimoiy soha obyektlariga zarur miqdorlarda yoqilg‘i-energiya resurslarini yetkazib berish bo‘yicha muntazam ravishda “Mahallabay” tizimida o‘rganishlar olib borib, ajratilgan resurslarni bir maromda yetkazib berilishini ta’minlanadi. Albatta, bunda deputatlarning, faollarning yordami-jamoatchilik nazorati kerak bo‘ladi.

Kuz-qish – barchamiz uchun sinovli, ammo hamjihatlikda o‘tadigan mavsum. Biz mahalliy hokimliklar va mutasaddi idoralar bilan birgalikda barcha sohani, kommunal tizimni kuz-qishni be betalafot, ko‘ngildagidek o‘tkazish uchun barcha kuchimizni safarbar etamiz. Lekin eng katta kuch - biz siz yurtdoshlarimizning mas’uliyati va qo‘llab-quvvatlashidir.

Keling, hammamiz hamjihatlikda, bir-birimizga yordam berib, mavsumni tinch va yuqori darajada o‘tkazaylik. Oliyjanob xalqimiz bu yo‘nalishda ham tajriba va namunasini ko‘rsatishiga ishonaman.

E’tiborlaringiz uchun rahmat!