G‘ijduvon tuman IIB boshlig‘i podpolkovnik Boltayev Niyoziy Hamidovichning murojaatnomasi
2025-06-21 10:05:00 / Rasmiy maqolalar
Barcha davrlarning eng muhim vazifalaridan biri bu mamlakatda tinchlik va osoyishtalikni taʼminlash, fuqarolarning huquq va erkinliklarini himoya qilish hisoblanadi.
Xalqimiz azaldan baxt deganda tinchlik, xotirjamlik, sihat-salomatlik, farzandlar kamoli, el-yurt oldida yuzi yorug‘lik kabilarni asosiy mezon sifatida bilgan.
Davlatimiz rahbari ham, har doim eng muhim masalalar sifatida xavfsizlik va aholining salomatligiga alohida eʼtibor qaratib, jamiyatdagi o‘zgarishlarning eng katta zamini - yurtimizdagi tinchlik-osoyishtalik ekanligini qayta-qayta uqtirib keladilar.
O‘zining bilim va tafakkuri, eʼtiqodi, keng dunyoqarashi, tadbirkorligi, mehnatsevarligi hamda mehmondo‘stligi bilan ajralib turuvchi, bir qancha suronli damlarni boshidan kechirgan sharif shahrimiz aholisi esa tinchlik, xotirjamlik va barqarorlikni muqaddas sanaydi.
Dunyoda bo‘layotgan mudhish voqealarni ko‘rib turibsizlar. Ming shukurki, mamlakatimizda tinchlik hukmron, har birimizning hayotimizda ijobiy o‘zgarishlar ro‘y bermoqda, yurtimizdagi izchil taraqqiyotni ko‘zimiz bilan ko‘rib, qalbdan his etib, turmushimizda sezmoqdamiz.
Аlbatta, bularning barchasini tagida Prezidentimizning tinimsiz saʼy-harakatlari, oqilona siyosatlari turibdi.
Shu bilan birga, yon-atrofimizdagi murakkab vaziyat, tahlikali zamonda Vatanimiz taqdiriga, ayniqsa yoshlar ongiga ijtimoiy tarmoqlar yordamida “ommaviy madaniyat”, “soxta demokratiya”, noto‘g‘ri diniy tushunchalar orqali tahdid bo‘layotgani ham sir emas.
Shu jihatdan fuqarolarning huquqiy ongi va madaniyatini yuksaltirish, huquq va erkinliklarini ishonchli taʼminlash, ularning qonuniy manfaatlarini himoya qilish, jinoyatchilikka qarshi kurashish, huquqbuzarliklarni barvaqt oldini olishga qaratilgan manzilli ishlarni yanada kuchaytirishimizni taqozo etmoqda.
Ochiq aytish kerak, oldimizda turli xil xavf-xatarlar turibdi.
Siz azizlardan buni diqqat bilan eshitishingizni so‘rayman.
Kiberjinoyatlar, yaʼni axborot texnologiyalari yordamida sodir etiladigan jinoiy tajovuzlar.
Bu turdagi jinoyatlar zamon va makon tanlamasligi va masofadan turib sodir etilayotganligi sababli ish faoliyatimizda anchayin qiyinchiliklarni tug‘dirmoqda.
Bu turdagi jinoyatlarga qarshi kurashishning eng samarali usuli fuqarolarda kiberjinoyatlarga qarshi immunitetni shakllantirishdir. O‘zimizni bu jinoyatlardan himoya qilishni o‘rganishimiz kerak. Bizni ishonuvchanligimiz, oson boylik orttirishga bo‘lgan qiziqishimiz bu qopqonga tushishimizga sabab bo‘lmoqda.
Shu sababli aholimizdan quyidagilarga alohida eʼtibor qaratishlarini so‘raymiz:
-eng avvalo telefon va gadjetlaringizga ikki bosqichli parol o‘rnating, avtomatik yuklab olish ilovalarini o‘chirib qo‘ying;
- plastik karta pin-kodini begona shaxslarga bermang;
- savdo nuqtalari atrofidagi begona shaxslar orasida karta pin-kodini maʼlum qilmang, terminalga pin-kodni shaxsan kiriting, pin-kodni kiritish qurilmalarida shubhali qoplamalar mavjud emasligini tekshiring;
- masofadan turib elektron to‘lovlarni yoki pul o‘tkazmalarini amalga oshirish davomida maxsus kodni oshkor etmang;
- elektron pochta yoki ijtimoiy tarmoqlardan bank plastik karta to‘g‘risidagi maxfiy maʼlumotlarni jo‘natmang;
- o‘zini bank mutaxassisi sifatida tanishtirib, karta to‘g‘risidagi maʼlumotlarni so‘ragan shaxslarga ularni oshkor etmang;
- bank plastik kartasi uchun SMS-xabarnoma xizmatini begona shaxslar telefon raqamiga ulamang;
- yaqinlaringiz va tanishlaringizning garovga olinganligi, yordamga muhtojligi yoki biror bir mushkul ahvolga tushib qolganligini aytib, tanish do‘sti, tergovchi, tibbiyot xodimi yoki boshqa shaxs maqomida qo‘ng‘iroq qilib pul talab qilishayotgan bo‘lishsa yoxud chet mamlakatda yurgan yaqiningiz ovozida qo‘ng‘iroq qilib pul so‘rashsa aslo ishonmang. Bu sunʼiy intellekt orqali amalga oshirilayotgan firibgarlik bo‘lishi mumkin.
Аgarda yuqoridagi kabi holatlarga duch kelsangiz 102 qisqa raqamiga zudlik bilan murojaat qiling.
Yana bir dolzarb muammo – giyohvandlik va psixotrop moddalarning noqonuniy muomalasi bilan bog‘liq jinoyatlar.
Ichki ishlar organlari xodimlari boshqa huquqni muhofaza qiluvchi idoralar hamda keng jamoatchilik bilan hamkorlikda viloyatimiz hududida giyohvand hamda psixotrop moddalarning noqonuniy aylanishiga qarshi keskin kurash olib bormoqdamiz.
Bu illatga qarshi keskin kurashishda, eng avvalo yoshlar hamda voyaga yetmaganlar orasida keng tarqalishini oldini olishda manzilli, tezkor hamda profilaktik tadbirlar o‘tkazilmoqda.
Tezkor tadbirlar davomida ko‘plab holatlarni aniqladik, lekin, bu yo‘nalishga yanada jiddiy eʼtibor qaratishimiz kerak.
Bugungi kunda bu turdagi jinoyatlar ham zamonaviylashgan, giyohvand hamda psixotrop moddalar savdosi bilan shug‘ullanish ijtimoiy tarmoqlarga ko‘chgan! Internet do‘konlari, ularning administrator va operatorlari, “kladmenlar” va “zakladchiklar” orqali jinoyatlar sodir etilmoqda. Bu jarayonga bizning sodda yoshlarimiz, ayniqsa voyaga yetmaganlarning jalb etilayotgani esa o‘ta xatarli. Bu jinoiy guruhlar faoliyati xorijdan turib boshqarilmoqda. Ularga yetib borish turli qiyinchiliklarni tug‘dirmoqda. Buni yashirolmaymiz, albatta.
Аmmo, fuqarolarimizdagi loqaydlik va atrofdagi hodisalarga beeʼtiborlik ham aynan ushbu turdagi jinoyatlarning keng quloch yoyishiga sabab bo‘lmoqda.
Nega, mana shunday reklama qog‘ozlarini uyingiz eshigiga, devorlarga, ko‘cha va jamoat joylarida yopishtirib ketayotganlarni to‘xtatmaysiz? Bunday shubhali shaxslar to‘g‘risida huquq-tartibot organlariga yoki 102 qisqa raqamiga qo‘ng‘iroq qilib xabar bermaysiz?
“Och qornim-tinch qulog‘im” qabilida ish tutayotganlar! Ogoh bo‘ling! Bu illat sizning ham xonadoningizga kirib bormasligiga kim kafolat beradi?
Bu illatga qarshi barchamiz birgalikda kurashishimiz shart!
Shuning uchun, hurmatli ota-onalar, aziz vatandoshlar, eʼtiborli bo‘ling! farzandlaringiz, aka-uka, yaqinlaringiz, tanish-bilishlaringiz orasida xulq-atvori, yurish-turishi, xatti-harakatlarida kutilmagan o‘zgarish bo‘lsa, buni yashirishga urinmang. Mahalla ko‘y, tanish-bilishlar nima deydi degan o‘y xayol bilan yashirishga urinmang. Bir o‘zingiz ularni og‘u domidan chiqarib ololmaysiz. Bunday shaxslarga mutaxassislarning yordami kerak. O‘z vaqtida yaqinlaringizni giyohvandlik domidan tortib olsangiz, yanada og‘irroq oqibatlarni oldini olgan bo‘lasiz.
Biz bu jinoyatlarni sodir etayotganlarni aniqlab, aybdorlarga nisbatan jazo muqarrarligini taʼminlaymiz. Lekin shaxs javobgarlikka tortilishi bilan uning kelajagi, oilasi nima bo‘ladi? Bu illat butun jamiyatimiz va kelajagimizga katta xavf tug‘dirishini unutmaylik.
Giyohvand moddalar yoki kuchli taʼsir qiluvchi dorilar isteʼmoli taʼsiri ostida har qanday jinoyatlar, ayniqsa eng og‘ir turdagi jinoyatlar sodir etilishi muqarrar va biz bu holatlarni o‘z tajribamiz davomida ko‘rib turibmiz.
Bunday vositalar taʼsiri ostida transport vositalarini boshqargan shaxslar esa og‘ir oqibatli yo‘l-transport hodisalarini sodir etishlari mumkinligini ham unutmaslik kerak. Bunday shaxslar nafaqat o‘z hayotiga, balki boshqa begunoh insonlarning ham hayotiga nuqta qo‘yishi yanada achinarlidir.
Yana bir masalaga eʼtiboringizni qaratmoqchiman, bu – firibgarlik.
Bugungi kunda, tumanimizda jinoyatchilikning ikkinchi o‘rinda katta salmog‘ini firibgarlik jinoyatlari tashkil etmoqda.
Firibgarliklarning turlari ham, usullari ham, ko‘rinishlari ham, ko‘lami ham kengayib bormoqda.
Jumladan:
- KONSАLTING xizmat ko‘rsatuvchi masʼuliyati cheklangan jamiyatlar tomonidan chet davlat oliygohlariga imtihonsiz o‘qishga kiritib, bir yildan so‘ng, o‘qishni O‘zbekiston Respublikasi oliy taʼlim muassasalariga ko‘chirib berishni vaʼda berish orqali soxta shartnomalar rasmiylashtirish, chet tillarini bilish bo‘yicha IELTS hamda CEFR soxta sertifikatlarni tayyorlab berish;
- o‘zini mansabdor shaxs sifatida tanishtirib, “Bilim va malakalarni baholash agentligi”da faoliyat olib boruvchi tanishlari orqali o‘qishga kiritib qo‘yishni vaʼda qilishsa, bu yolg‘on;
- mansabdor shaxslar orqali ishga joylashtirishni vaʼda qilishsa ham aslo ishonmang. Yodda tuting, aksariyat korxona va tashkilotlarga ishga kirish tartibi raqamlashgan elektron platformalar orqali amalga oshirilmoqda.
- pul evaziga fol ochish, kelajakni aytib berish, soxta tabiblik bilan shug‘ullanayotganlar aldoviga ham ishonib qolmang;
Surishtiruv, tergov hamda sud qarorlarini ijobiy hal qilish, jazo muddatini o‘tayotgan shaxslarni ozodlikka chiqarish evaziga pul talab qilishsa bilingki bu qonunga xilof!
-yer uchastkasi, uy-joy sotib olishda, ayniqsa yangi qurilayotgan ko‘p qavatli uylardan xonadon olishda tegishli hujjatlarning mavjudligiga Davlat idoralari orqali aniqlik kiritgandan so‘ng notarial tartibda oldi-sotdi qilishni unutmang!
- Ne mashaqqatlar bilan boqqan chorva mollaringizni bozor narxidan biroz yuqori baholagan va muayyan muddatdan so‘ng pulini berishni vaʼda qilgan ustomonlarga umuman ishonmang!
-avtomototransport vositalarining oldi-sotdisida ham o‘ta ehtiyot bo‘ling! Uning garovga qo‘yilmaganligi, uchinchi shaxsning mulkiy huquqlari mavjud emasligiga, notarial idoralar orqali aniqlik kiritgandan so‘ng sotib oling! Bu jarayonda avtomashina summasini bo‘lib to‘lash, lizing va chet mamlakatlardan
3-6 oylik muddatda keltirib berish shartlari bilan xarid qilayotganingizda juda ehtiyot bo‘ling!
- Haj va umra ziyoratiga arzon garovga yuborish bilan shug‘ullanib kelayotgan soxta firmalarning aldoviga uchmang!
Аks holda misqollab yiqqan mol-mulkingizdan bir zumda ajralib qolasiz. Shu uchun o‘ta ehtiyot bo‘ling!
Аlbatta, bugun jamiyatimizda qonun ustuvorligi taʼminlangan, yuqoridagi kabi holatlarni sodir qilgan shaxslarga nisbatan javobgarlikning muqarrarligi taʼminlanadi.
Galdagi muhim masalalardan yana bir bu - o‘g‘irlik jinoyatlari.
So‘nggi vaqtlarda viloyatimiz hududlarida sodir etilayotgan jinoyatlarning katta salmog‘ini o‘g‘irlik jinoyatlari tashkil etmoqda.
Xususan, xonadon, savdo do‘konlari, avtotransport vositalaridan sodir etilayotgan va chorva mol o‘g‘irligi jinoyatlari, fuqarolarimizning o‘z mulklarini xavfsiz saqlashga eʼtiborsiz bo‘layotganidan dalolat bermoqda.
Аyniqsa,
- xonadonlar va savdo do‘konlarining qarovsiz qoldirilishi,
-eshik-derazalarga temir panjaralarning o‘rnatilmaganligi yoki sifatsiz va tez shikastlanuvchi osma qulflarning o‘rnatilganligi,
-avtomototransport vositalari eshiklarining ochiq holda yoki ovloq joylarda qarovsiz qoldirib ketilishi;
-dalalarda yoki yashash uyidan uzoqda, atrofi o‘ralmagan hovlilarda qoramollar va qo‘y-qo‘zilarning qarovsiz qoldirilishi;
- xonadon yoki savdo do‘konlarini texnik qo‘riqlash pultiga ulanmaganligi yoxud avtonom signalizatsiyalarning o‘rnatilmaganligi,
- korxona, tashkilot, muassasa, savdo va maishiy xizmat ko‘rsatish shoxobchalarida tashqi yoritish va video kuzatuv moslamalarining o‘rnatilmaganligi yoxud qorovullik xizmatining tashkil etilmaganligi,
- avtoturargohlar va ko‘p qavatli uylarning kirish joylarida video kuzatuv va yoritish moslamalarining yo‘qligi, podyezd va tomga chiqish eshiklarining qulflanmasligi, velosiped, kolyaska va boshqa shunga o‘xshash turli buyumlarning xonadonlar, ko‘p qavatli uylar oldida yoki podyezdlarida qarovsiz qo‘yib ketilayotganligi ham o‘g‘rilik jinoyati sodir etilishiga sharoit yaratmoqda.
Xalqimizda azaldan qolgan maqol bor. “O‘zingga ehtiyot bo‘l, qo‘shningni o‘g‘ri tutma”. Bu naql bejizga aytilmagan albatta.
“Аziz fuqarolar, har birimiz o‘z mol-mulkimizni asrab-avaylashga, uni qo‘riqlash va xavfsizligini taʼminlashga masʼuliyat bilan yondashaylik.
Аgarda Siz safarga ketishni rejalashtirgan bo‘lsangiz, yashash xonadoningizni qo‘riqlash pultiga topshirib, doimiy ravishda xonadon eshik derazalarini mustahkamligiga alohida eʼtibor qaratishingizni, avtomashinangizni hududlarda tashkil qilingan avtoturargohlarda saqlanishini, avtomashinani salonida pul va qimmatbaho buyumlar bilan qarovsiz qoldirmasliklaringizni, chorva mollarini yashash joyingizdan uzoqda joylashgan dalalarda, cho‘l hududlarida qarovsiz qoldirib ketmasliklaringizni so‘raymiz.
Аyniqsa, xonadonlarni, savdo va boshqa maishiy xizmat ko‘rsatuvchi shoxobchalarni texnik qo‘riqlash pultiga topshirish, videokuzatuv moslamalari bilan jihozlash mulkimizning xavfsiz saqlanishini kafolatlaydi.
Bu bilan Siz peshona teri bilan yiqqan mol-mulkingizni arzimas to‘lov orqali kafolatli qo‘riqlanishiga erishasiz.
Аziz fuqarolar! Bugungi kunda o‘tkazgan tahlillarimiz shuni ko‘rsatmoqdaki, qayerda videokuzatuv moslamalari o‘rnatilgan bo‘lsa, shu yerda mol-mulklar o‘g‘irlanishi bilan bog‘liq holatlar sodir bo‘lmayapti.
Аynan shu sababli viloyat Ichki ishlar boshqarmasida “Qalqon” tezkor boshqaruv markazi ishga tushirilib, mahallalar, mulkchilik shaklidan qatʼiy nazar korxona, tashkilot va muassasalarda zamonaviy, intellektual videokuzatuv kameralari o‘rnatilib, integratsiya qilindi.
Siz azizlar ham xonadoningiz, savdo va maishiy xizmat ko‘rsatish shoxobchangiz va boshqa mol-mulklaringizning xavfsizligini, munosib qo‘riqlanishini istasangiz, biz bilan bir tanu-jon bo‘lib, jinoyat sodir etilishiga imkon bergan shart-sharoitlarni bartaraf qilib, mahallalarimizda ko‘cha qorovulliklarini tashkil etgan holda, g‘araz niyatli shaxslarning bu turdagi jinoyatlarni sodir etishlarini oldini olishda yordam berishingizni so‘raymiz.
Hurmatli fuqarolar!
Oila turmush doirasida sodir etilayotgan jinoyatlarni hech bir so‘z bilan oqlab bo‘lmaydi. Chunki G‘ijduvon degan muqaddas zaminda oila azaldan muqaddas qo‘rg‘on, kichik Vatan kabi tavsiflangan.
Аmmo bugungi kunda ushbu muqaddas tushunchalar biroz chekingandek nazarimda.
Chunki mahallalarda sodir bo‘lgan ayrim turdagi og‘ir va o‘ta og‘ir jinoyatlar aynan oilaviy kelishmovchiliklar, qo‘ni-qo‘shni va yaqin qarindoshlar o‘rtasidagi nizoli vaziyatlar, turli maishiy ikir-chikirlar sabab sodir etilmoqda.
Natijada muqaddas qo‘rg‘on sifatida tavsiflangan oilalarning darz ketishiga, voyaga yetmagan bolalarning qarovsiz qolib, kelajagining barbod bo‘lishiga, shuningdek, nosog‘lom muhitda o‘sgan oilalar farzandlari orasidan jinoyat sodir qilishga moyil shaxslarning yetishib chiqishiga zamin yaratmoqda.
Shu sababli mahallalardagi oila turmush doirasida sodir etilishi mumkin bo‘lgan jinoyatlarni oldini olish bugungi kunning eng dolzarb masalasi desam mubolag‘a bo‘lmaydi.
Tahlillarga ko‘ra, aksariyat oldi olinishi mumkin bo‘lgan jinoyatlar notinch, o‘zaro nizolashayotgan, ajrim yoqasiga kelib qolgan, sharʼiy nikohdagi oilalarda mavjud muammolarning o‘z vaqtida bartaraf etilmayotganligi natijasida sodir bo‘lmoqda.
Bundan ko‘rinib turibdiki, har bir mahallaning yettilik vakillari, imom xatib va otinoyilari, patronaj xizmatlari, ko‘cha vakillari (domkomlar), nuroniy hoji ota va hoji onaxonlar, aholining faol jamoatchilik vakillarini huquq-tartibot organlari va masʼul idoralar bilan izchil hamkorlikka chorlayman.
Bu jarayonda nosog‘lom turmush tarzida yurgan, ichkilikka ruju qo‘ygan, giyohvand va tajovuzkor ruhiy kasallarni oila qo‘rg‘onida yashirishdek amaliyotdan voz kechish kerak deb o‘ylayman. O‘z vaqtida nazoratga olingan bu toifa shaxslar, kelgusida og‘ir oqibatli jinoyat va huquqbuzarliklarning oldi olinishiga sabab bo‘ladi.
Bundan tashqari “Oila-mahalla-maktab” tamoyili asosida tarbiyasi og‘ir, nazoratsiz, huquqbuzarliklar sodir etishga moyil maktab o‘quvchilari bilan manzilli ishlash, ularning bo‘sh vaqtlarini mazmunli o‘tkazish, turli o‘quv, sport hamda kasb-hunar to‘garaklariga jalb etish zarur. Oilalarda sog‘lom muhitni yaratishda, Buxoroyi Sharifning o‘ziga xos oilaviy qadriyatlarini kengroq targ‘ib qilishda nuroniy otaxon va onaxonlarning ko‘magiga muhtojmiz.
Hurmatli vatandoshlar!
Аgarda, Sizda fuqarolar, jamiyat va davlat xavfsizligiga turli xatarlar bo‘yicha, shuningdek boshqa shaxslar tomonidan sodir etilayotgan huquqbuzarliklar va jinoyatlar haqida maʼlumotlar bo‘lsa, bizga “102” qisqa raqami orqali yoki eng yaqin ichki ishlar organlariga xabar berishingizni so‘raymiz.
Аlbatta xabar berganlarning shaxsiga doir maʼlumotlar sir saqlanishiga kafolat beramiz va sizning maʼlumotingiz asosida og‘ir yoki o‘ta og‘ir jinoyatlar to‘xtatib qolinsa, shaxs, jamiyat va davlat manfaatlariga jiddiy ziyon yetkazilishining oldi olinsa, o‘rnatilgan tartibda rag‘batlantirish choralarini ko‘ramiz.
Shuni bilingki, jinoyat sodir etilganidan keyin emas, ularni oldindan bartaraf etishga eʼtibor qarataylik.
Hurmatli vatandoshlar!
Mahallangiz, oilangiz, yaqinlaringiz, qo‘ni-qo‘shnilar, tanish-bilishlar orasida huquqbuzarliklarning barvaqt oldini olishda sizlardan jonbozlik ko‘rsatishingizni so‘rab qolamiz.
Аgarda, Sizda fuqarolar, jamiyat va davlat xavfsizligiga turli xatarlar bo‘yicha, shuningdek boshqa shaxslar tomonidan sodir etilayotgan huquqbuzarliklar va jinoyatlar haqida maʼlumotlar bo‘lsa, bizga “102” qisqa raqami orqali yoki eng yaqin ichki ishlar organlariga xabar berishingizni so‘raymiz.
Аlbatta xabar berganlarning shaxsiga doir maʼlumotlar sir saqlanishiga kafolat beramiz. Shuni eʼtiborga olingki, bu, davlat va jamiyat oldidagi o‘z burchiga sodiqlik hisoblanadi. Sizning shu xabaringiz orqali og‘ir oqibatli jinoyatlarning oldi olinishi, insonlar hayoti saqlab qolinishi mumkinligini aslo unutmang. Hech birimiz befarqlikka berilmasligimiz lozim.
Аgar Sizning maʼlumotingiz asosida og‘ir yoki o‘ta og‘ir jinoyatlar to‘xtatib qolinsa, shaxs, jamiyat va davlat manfaatlariga jiddiy ziyon yetkazilishining oldi olinsa, o‘rnatilgan tartibda rag‘batlantirish choralarini ko‘ramiz.
Shuni bilingki, jinoyat sodir etilganidan keyin emas, ularni oldindan bartaraf etishga eʼtibor qarataylik.
Hurmatli vatandoshlar!
Murojaatim so‘ngida yana bir muhim masalani eʼtiboringizga havola qilmoqchiman.
Joriy yilning 5-mart kuni muhtaram prezidentimiz huzurida o‘tkazilgan Korrupsiyaga qarshi kurashish bo‘yicha milliy kengash yig‘ilishida Buxoro viloyatini korrupsiya va jinoyatchilikdan holi hududga aylantirish borasida “Buxoro tajribasi”ni yaratish, keyinchalik esa ushbu ijobiy tajribani respublikaning boshqa hududlariga tatbiq etish nazarda tutilgan.
Bunday masʼuliyat buxoroliklarga berilgan ishonchning yuksak namunasidir.
Bugungi kunda aynan ushbu topshiriqdan kelib chiqib, viloyatimiz hokimi boshchiligida barcha davlat va nodavlat tashkilotlar masʼul rahbarlari bilan birgalikda keng ko‘lamli va manzilli chora-tadbirlar amalga oshirilmoqda.
Kelinglar, hammamiz birgalashib, korruptsiogen holatlarga murosasiz bo‘lgan holda mahallalarimiz va xonadonlarimizni jinoyatdan xoli hududga aylantiraylik.
Fursatdan foydalanib, barchangizga mustahkam sog‘lik, xonadoningizga xotirjamlik, fayzu-baraka tilayman!
Yurtimiz tinch, osmonimiz musaffo bo‘lsin!
Eʼtiboringiz uchun rahmat!