Buxoro viloyati G‘ijduvon tumani hokimligi

Nazorat tadbirlari M–37 avtomagistral yo‘li bo‘yidagi savdo do‘konlari, ovqatlanish va maishiy xizmat shoxobchalarini qamrab oldi. Har bir tashqi yozuv, reklama banneri va peshlavha atroflicha ko‘zdan kechirilib, ularning qonun talablariga mosligi o‘rganildi.
O‘rganishlar davomida “Davlat tili haqida” hamda “Reklama to‘g‘risida”gi qonun talablariga zid o‘rnatilgan ayrim targ‘ibot vositalari aniqlanib, joyida bartaraf etildi. Tadbirkorlarga davlat tili me’yorlariga rioya qilish va tashqi ko‘rinish madaniyatiga e’tibor qaratish yuzasidan tushuntirish ishlari olib borildi.
Shu bilan birga, tozalik va obodonlashtirish ishlariga beparvo munosabatda bo‘lgan ayrim fuqarolarga berilgan ogohlantirishlarga qaramasdan kamchiliklar saqlanib qolgani kuzatildi. Bu holatlar jamoat manfaati va tuman ko‘rinishiga salbiy ta’sir ko‘rsatmasligi uchun mas’ul tashkilotlar tomonidan qat’iy choralar ko‘rildi.
Natijada belgilangan tartib-qoidalarga amal qilmagan shaxslarga nisbatan qonuniy jarimalar qo‘llanildi. Bu kabi tadbirlar nafaqat huquqbuzarliklarning oldini olish, balki davlat tili nufuzini yuksaltirish, tumanimiz qiyofasini obod qilish va jamiyatda mas’uliyat muhitini mustahkamlashga xizmat qiladi.