Buxoro viloyati G‘ijduvon tumani hokimligi

Mazkur qaror ijrosi doirasida viloyat ishchi guruhi G‘ijduvon tumanida amalga oshirilayotgan yangi loyihalar, ishlab chiqarish inshootlarining moddiy-texnik holati hamda aholiga daromad manbai yaratish bo‘yicha olib borilayotgan ishlar bilan joyiga chiqib tanishdi.

Viloyat moliya-iqtisodiyot majmuasi tarkibiga kiruvchi tashkilot va idoralar, shuningdek, tijorat banklari mas’ullari hamrohligida o‘tkazilgan o‘rganishlarda ilg‘or korxonalar barqaror faoliyatini ta’minlash, joriy yilda amalga oshirilishi ko‘zda tutilgan yangi loyihalar ijrosi, aholini ijtimoiy qo‘llab-quvvatlash, daromad manbalarini yaratish hamda biznes tashabbuslarini moddiy rag‘batlantirishga qaratilgan manzilli chora-tadbirlarga alohida e’tibor qaratildi.

Xususan, “Oqgul” mahallasida “Bir kontur — bir mahsulot” tamoyili asosida aholi foydalanishiga berilgan ijara yer maydonlarida tashkil etilgan mini issiqxonalar faoliyati bilan tanishildi. Ma’lumot uchun, 4 gektar ijara yer maydonida barpo etilgan mini (dugali) issiqxonalarda sabzi va boshqa qishloq xo‘jaligi mahsulotlari yetishtirilmoqda. Bu esa aholi uchun barqaror daromad manbaini yaratishda muhim qadam bo‘lmoqda.

Shuningdek, “Saidkent” mahallasi hududida Zarafshon daryosi bo‘yida tashkil etilayotgan zamonaviy sohilbo‘yi dam olish maskani loyihasi ko‘zdan kechirildi. Loyiha doirasida daryo bo‘yi hududini betonlashtirish ishlari olib borilmoqda. Ushbu qurilish ishlarining umumiy qiymati 7,4 mlrd so‘mni tashkil etib, hozirga qadar 5,3 mlrd so‘m yoki 72 foizi moliyalashtirilgan.

Ishchi guruh G‘ijduvon tumanidagi “Nurafshon” madaniyat va istirohat bog‘ini zamonaviy qiyofaga keltirish ishlari bilan ham tanishdi. Bu yerda kirish yo‘llarini kengaytirish, ta’mirlash, zamonaviy attraksionlar, sport maydonchalari va turli ko‘ngilochar maskanlar barpo etilmoqda. Loyiha doirasidagi qurilish ishlari 5,8 mlrd so‘mga baholanib, hozirda 3,9 mlrd so‘m yoki 67 foizi moliyalashtirilgan.

Bundan tashqari, Chorsu mahallasidagi “Madaniyat markazi” hamda “Qo‘rg‘on” ochiq osmon ostidagi turizm mahallasida olib borilayotgan bunyodkorlik ishlari ham ko‘zdan kechirildi. Xususan, “Qo‘rg‘on” mahallasida sobiq 10-son musiqa maktabi binosini rekonstruksiya qilish orqali hunarmandlar markazi tashkil etilishi rejalashtirilgan.

Mazkur markazda hunarmandlar uchun “showroom”lar, sayyohlar uchun mahorat darslari (master-klass) o‘tkaziladigan joylar hamda folklor jamoalar chiqishlari uchun sahna barpo etiladi. Bu esa G‘ijduvon tumanining turistik salohiyatini yanada oshirish, milliy hunarmandchilikni keng targ‘ib etishga xizmat qiladi.

Shuningdek, “Guliston” mahalla fuqarolar yig‘inidagi F. Eshpo‘lotov ko‘chasida 0,6 km masofadagi bir tomonlama yo‘lni 24/7 rejimda faoliyat yurituvchi gastronomik, savdo-servis va turizm ko‘chasiga aylantirish loyihasi ham amalga oshirilmoqda. Mazkur loyiha doirasida umumiy qiymati 6,9 mlrd so‘mlik qurilish ishlari olib borilib, hozirga qadar 5,4 mlrd so‘m yoki 79 foizi moliyalashtirilgan.

 Amalga oshirilayotgan ushbu loyihalar G‘ijduvon tumanini iqtisodiy jihatdan rivojlangan, aholi uchun qulay va sayyohlar uchun jozibador hududga aylantirishga xizmat qiladi.