Navoiy viloyatida 8 ta loyiha bo‘yicha jamoatchilik eshituvlari va ekologik o‘rganishlar o‘tkazildi
2026-07-27 10:15:00 / Jamoatchilik eshituvlari
Jumladan, Karmana tumani, "Yangiariq" MFY hududida “O‘ZTRANSGAZ” MCHJ tomonidan gaz taqsimlash stansiyasini ishga tushirish, Vatanparvar tashkiloti Navoiy viloyati kengashining Navoiy shahar 2-sonli o‘quv sport texnika markazi tomonidan avtodrom tashkil etish loyihalari muhokama qilindi.
Navoiy shahrida esa “ESO XIM PROM” MCHJ tomonidan natriy gipoxlorit ishlab chiqarish sexi, “GRAND TEX GROUPS” MCHJ tomonidan trikotaj tikuv fabrikasi, “SIFAT GOLD” MCHJ tomonidan truba ishlab chiqarish sexi hamda "HAYITOV HOLMUROD" MCHJ tomonidan kislorod ballonlarini to‘ldirish stansiyasini tashkil etish loyihalari yuzasidan jamoatchilik eshituvlari o‘tkazildi.
Shuningdek, "Muruvvat" MFY hududidagi 21-umumta’lim maktabida mavjud hududdan chiqmagan holda sport zal barpo etish loyihasi bo‘yicha ekologik o‘rganish ishlari amalga oshirildi.
Tomdi tumanida esa BAAning “Masdar” kompaniyasi tomonidan 300/600 MVt quvvatli elektr energiyasini saqlash tizimi (BESS) qurilishi yuzasidan aholi bilan ochiq muloqot tashkil etildi. Loyiha qayta tiklanuvchi energiya manbalaridan samarali foydalanish, elektr ta’minoti barqarorligini oshirish hamda uglerod chiqindilarini kamaytirishga qaratilgani ta’kidlandi.
Mazkur loyihalarning barchasi bo‘yicha Vazirlar Mahkamasining 2020-yil 7-sentabrdagi 541-son qarori talablariga muvofiq “Atrof-muhitga ta’siri to‘g‘risidagi ariza” hujjatlari ishlab chiqilgan.
Jamoatchilik eshituvlari davomida loyiha hujjatlari batafsil ko‘rib chiqilib, ularning atrof-muhitga ehtimoliy ta’siri yuzasidan muhokamalar olib borildi. Davlat ekologik ekspertizasi markazi Navoiy viloyat filiali mutaxassislari tomonidan ishlab chiqarish texnologiyalari, ekologik xavfsizlik talablari, chiqindilarni boshqarish, havo va suv resurslarini muhofaza qilish hamda amaldagi ekologik me’yorlarga rioya etilishi o‘rganildi.
Tadbirlarda Davlat ekologik ekspertizasi markazi Navoiy viloyat filiali ekspertlari, loyiha tashkilotlari vakillari, mahalliy aholi hamda tegishli mutasaddi idoralar xodimlari ishtirok etdi.
Tadbirlar yakunida barcha loyiha tashabbuskorlariga ishlab chiqarish va qurilish jarayonlarida atrof-muhitga salbiy ta’sirni minimallashtirish, ekologik xavfsizlik choralarini kuchaytirish, chiqindilarni belgilangan tartibda boshqarish hamda davlat ekologik ekspertizasi xulosalarida belgilangan barcha talab va shartlarga so‘zsiz amal qilish bo‘yicha tegishli tavsiya va ko‘rsatmalar berildi.
Mazkur jamoatchilik eshituvlari va ekologik o‘rganishlar hududlarda amalga oshirilayotgan investitsiya loyihalarining ochiqligi va shaffofligini ta’minlash, fuqarolarning ekologik masalalardagi ishtirokini kengaytirish hamda iqtisodiy rivojlanish bilan bir qatorda atrof-muhit muhofazasini ta’minlashga xizmat qilmoqda.