Davlat ekologik ekspertizasi markazi

Mazkur ishlar O‘zbekiston Respublikasining ekologik ekspertiza va atrof-muhitga ta’sirni baholash sohasidagi qonunchiligi asosida tashkil etilgan.

Ekspert guruhi tarkibiga O‘zbekistonning milliy ekspertlari, shuningdek Belarus Respublikasi Tabiiy resurslar va atrof-muhitni muhofaza qilish vazirligi huzuridagi «Respublika davlat ekologik ekspertizasi, kadrlarni tayyorlash, malakasini oshirish va qayta tayyorlash markazi» mutaxassislari kiritilgan. Xalqaro ekspertlarni jalb etish atom energetikasi obyektlari bo‘yicha ekologik ekspertiza o‘tkazish tajribasini hisobga olish imkonini beradi.

Ekspert guruhi tomonidan atrof-muhitga ta’sirini baholash materiallari kompleks tahlil qilinib, loyihaning atmosfera havosi, suv resurslari, tuproq, o‘simlik va hayvonot dunyosiga ta’siri, shuningdek gidrogeologik va seysmologik jihatlari baholanmoqda.

Shu bilan birga, atrof-muhit ifloslanishining oldini olish, ehtimoliy salbiy ta’sirni kamaytirish hamda loyihada nazarda tutilgan tabiatni muhofaza qilish chora-tadbirlari samaradorligiga alohida e’tibor qaratilmoqda.

Ekspertlar guruhi a’zolari Jizzax viloyati, Forish tumanida joylashgan loyihalashtirilayotgan atom elektr stansiyasi maydoniga tashrif buyurdi. Tashrif davomida hududning ekologik baholash uchun muhim bo‘lgan tabiiy-iqlimiy, gidrologik va geomorfologik xususiyatlari o‘rganildi.

Shuningdek, davlat ekologik ekspertizasi jarayonida jamoatchilik eshituvlari davomida kelib tushgan taklif va mulohazalar ham ko‘rib chiqiladi.

Ekspertlar guruhi ishi yakunlari bo‘yicha loyihani keyingi bosqichlarda amalga oshirishda inobatga olinishi lozim bo‘lgan ekologik talab va tavsiyalarni o‘z ichiga olgan davlat ekologik ekspertizasi xulosasi tayyorlanadi.