Davlat ekologik ekspertizasi markazi

Unda mas'ullardan Toshkent viloyati hokimi o‘rinbosari Najmiddinxo'ja Sharipov, Ekologiya va iqlim o‘zgarishi milliy qo‘mitasi Davlat ekologik ekspertizasi markazi direktori G‘ayrat Muhamedov, "O‘zsuvta'minot" AJ boshqaruv raisining birinchi o‘rinbosari Tohir Haydarov, Bo‘stonliq tuman hokimi Jo‘rabek Ahmedov, "Ekomaktab" NNT rahbari, Ekologiya qo‘mitasi huzuridagi Jamoatchilik kengashi raisi Natalya Shivaldova, "Sea Breeze Uzbekistan" bosh direktori Sardor Hamidov qatnashdi. 

Shuningdek, mahalliy va xalqaro ekspertlar, xususan, Ozarbayjon Respublikasi “Ekosfera” markazi ekspert-maslahat guruhi rahbari Firuza Sultonzoda, Sloveniya Respublikasi Atrof-muhit, iqlim va energetika vazirligi kotibi, "Espo" konvensiyasi va Strategik ekologik baholash to‘g‘risidagi protokol byurosining muqobil raisi Vesna Kolar-Planinshich, Koreya Respublikasi atrof-muhit instituti Atrof-muhitga ta’sirni baholash guruhi bosh ilmiy xodimi Sangyun Li, Qozog‘iston Respublikasi Atrof-muhit huquqi va iqlim bo‘yicha mutaxassisi Vadim Ni, Belarus Respublikasi Davlat ekologik ekspertizasi markazi direktor o‘rinbosari Yevgeniy Rachevskiy,
Belarus Respublikasi Davlat ekologik ekspertizasi markazi Boshqarma boshlig‘i Vladimir Gamezo hamda mahalliy ekspertlar, jamoatchilik va mahalliy aholi vakillari, eko-faollar, jurnalist va blogerlar ishtirok etdi.

Tadbirda nutq so‘zlagan "Sea Breeze Uzbekistan" bosh direktori Sardor Hamidov loyiha ekologik standartlarga to‘liq rioya qilingan holda amalga oshirilishini ta'kidladi. Xususan, loyiha 2035-yilgacha bosqichma-bosqich amalga oshirilishi, tabiatga zarar yetkazilmasligi, O‘zbekiston sharoitiga mos zamonaviy muhandislik yechimlari qo‘llanilishi, qo‘shimcha ish o‘rinlari yaratilishi va boshqa jihatlarga e'tibor qaratdi.

"Loyiha to‘liq ishga tushgach, 8 minggacha ish o‘rni yaratiladi. Bu nafaqat oilalar uchun daromad, balki mahalliy biznes, xizmat ko‘rsatish va turizm rivojlanadi degani. Shuningdek, hudud ko‘kalamzorlashtiriladi. Birinchi bosqichdayoq 10 mingdan ortiq daraxt va o‘simlik ekiladi, — dedi u. — Shuni alohida aytmoqchiman: "Sea Breeze Uzbekistan" faqat kurort emas, bu — ekologik me'yorlarga muvofiq amalga oshiriladigan infratuzilma loyihasi. Yo‘llar, muhandislik tarmoqlari, kanalizatsiya, kommunikatsiyalar, qirg‘oq hududini obodonlashtirish — bularning barchasi yillar davomida mintaqaga xizmat qiladi". 

Eshituv davomida mahalliy va xalqaro ekspertlar tomonidan loyihaning atrof-muhitga ta'siri, Bo‘stonliq tumanida oqova va ichimlik suvi tizimlarini qurish, aholi uchun sanitariya-gigiyena sharoitlarini yaxshilash kabi jihatlarni o‘z ichiga olgan taqdimotlar namoyish etildi. Unda Chorvoqqa chiqindi tashlashga yo‘l qo‘yilmasligi, kanalizatsiya tizimi takomillashtirilishi, jumladan, oqova suvlar tozalanib, markazlashgan tizimga yo‘naltirilishi, bioxilma-xillikni asrashga alohida e'tibor qaratilishi, kurort hamma uchun birdek ochiq bo‘lishi, aholi uchun qulay shart-sharoitga ega dam olish maskani yaratilishi qayd etildi.

Shundan so‘ng mahalliy aholi, jamoatchilik vakillari, eko-faollar va jurnalist hamda blogerlarning savol, taklif hamda mulohazalari tinglandi. Mutaxassislar tomonidan loyiha doirasidagi barcha savollarga atroflicha javob berildi. O‘z navbatida bildirilgan taklif va mulohazalar inobatga olinishi, loyihani amalga oshirishda ekologik barqarorlik va aholi manfaatlari ustuvor bo‘lishi alohida ta'kidlandi.