O‘zbekiston Respublikasi Madaniy meros agentligi

2025-yil 15–17-iyul kunlari Madaniy meros agentligi huzuridagi Ilmiy-ekspert kengashining navbatdagi sayyor yig‘ilishi Namangan viloyatida bo‘lib o‘tadi. Yig‘ilish kun tartibiga O‘zbekistonning bir qator hududlarida joylashgan madaniy meros obyektlarida restavratsiya, obodonlashtirish, joriy va mukammal ta’mirlash hamda yangi binolar qurilishi yuzasidan jami 67 ta loyiha ko‘rib chiqilishi rejalashtirilgan.

Kengash kun tartibidan Jizzax viloyatida joylashgan “Malik Ajdar” ziyoratgohida obodonlashtirish, qo‘shimcha binolar qurish loyihasi va Toshkent viloyatining Bo‘stonliq tumanida joylashgan “Ansor bobo”, “Jaudjurektepa” va “Kaygaktepa” arxeologiya yodgorliklarining tutash qismidan avtomobil yo‘li qurish bo‘yicha taklif loyihalari o‘rin olgan. Shuningdek, Kengash Toshkent shahrida joylashgan “O‘zsanoatqurilishbank”ning Mirzo Ulug‘bek tumani bo‘limi binosining ichki va tashqi fasad qismlarini asl holati va rangini saqlagan holda joriy ta’mirlash va “Sergey Yesenin” uy-muzeyini mukammal ta’mirlash loyihalarini ko‘rib chiqadi. Ilmiy-ekspert kengashi kun tartibidagi masalalar bilan Madaniy meros agentligining rasmiy saytida tanishib chiqish mumkin.
 
Ma’lumot uchun, 2024-yilning 20-may kuni Vazirlar Mahkamasining "O‘zbekiston Respublikasi Madaniy meros agentligining Ilmiy-ekspert kengashi faoliyatini yanada takomillashtirish chora-tadbirlari to‘g‘risida"gi qarori qabul qilingan. Qarorga muvofiq Kengash zimmasiga moddiy madaniy merosning ko‘chmas mulk obyektlarini asrashga doir ishlarning loyihaoldi va loyiha-smeta hujjatlari, ularda rejalashtirilgan asrashga doir ishlarni obyektning tarixiy-madaniy ahamiyati hamda noyobligiga putur yetkazmagan holda texnologiya va materiallarning qo‘llanilishi bo‘yicha tegishli xulosa berishga doir qator vazifalar belgilangan.