Joriy yilda respublikamiz hududidagi jami 2 ming 76 ta masjidlarda hayit namozlari oʻqiladi
2024-04-09 13:00:00 / Yangiliklar
Bu haqda AOKAda oʻtkazilgan brifingda Ichki ishlar vazirligi Jamoat xavfsizligi departamenti axborot xizmati rahbari Muzifa Sultonova maʼlum qildi.
Masjidlar va ularning atrof hududlarida fuqarolarning xavfsizligi taʼminlanib, jamoat tartibining buzilishi hamda favqulodda holatlar sodir etilishiga yoʻl qoʻyilmasligi toʻliq nazoratga olingan.
Namoz oʻqiladigan masjidlarda jamoat tartibini saqlash va fuqarolar xavfsizligini taʼminlashga jami 12 ming 374 nafar ichki ishlar organlari, 2 ming 771 nafar Milliy gvardiya va 2 ming 622 nafar Favqulodda vaziyatlar vazirligi xodimlari va harbiy xizmatchilari jalb etilgan.
Ularga xizmatda foydalanish uchun 7 ming 352 ta aloqa va 2 ming 433 ta avtotransport vositalari, 4 ming 845 ta metallodetektor biriktirildi hamda 372 ta xizmat itlari ajratildi. Shuningdek, respublikadagi barcha YPX maskanlarining ish faoliyati kuchaytirilgan tartibga oʻtkazildi.
Bevosita avtomobil yoʻllariga yondosh joylashgan masjidlar atrofidagi yoʻllarda transport vositalarining harakatini vaqtinchalik cheklash choralari koʻrilib, fuqarolar hayoti va salomatligiga zarar yetkazishi mumkin boʻlgan harakatlarni sodir etilishining oldini olish maqsadida, masjidlarga kirish joylarda beton yoki metall toʻsiqlar oʻrnatilgan holda, masjidlardan 150 metr uzoqlikda alohida avtoturargohlar tashkil etilgan.
Bu borada yurtdoshlarimiz va respublikamiz mehmonlaridan yoʻl-patrul xizmati xodimlari koʻrsatgan yoʻnalishlarda harakatlanishlarini va hayit namozidan soʻng ushbu hududlarda harakat cheklanganligi sababli, tartib bilan tarqalishlarini soʻrab qolamiz.
Bugungi kunda respublikamiz hududida 100 dan ortiq obyektlarda, bular bozorlar, yirik savdo va koʻngilochar dam olish majmualari hamda fuqarolar gavjum boʻladigan boshqa joylarda jamoat tartibini saqlash va jamoat xavfsizligini taʼminlash maqsadida taqsimotga asosan
1000 nafardan ortiq IIV va MGning hududiy boʻlinmalari shaxsiy tarkibi, shuningdek kinolog xodimlar 100 dan ortiq xizmat itlari bilan xizmatga jalb etilgan. Qolaversa, majmualarda oʻrnatilgan barcha video-kuzatuv kameralari ichki ishlar organlarining situatsion markazlariga integratsiya qilinib, tunu kun nazorat qilinmoqda.
Asosiy eʼtibor ushbu joylarda fuqarolarning tinchligi va osoyishtaligini taʼminlash, jinoyat va huquqbuzarliklarni oldini olish hamda turli xil koʻngilsiz va favqulodda hodisalarning sodir etilishiga yoʻl qoʻymaslikka qaratilgan.