Erkin akaning uzoq yillar ichki ishlar organlarida xizmat qilgani Yulduzning ham kelajakda ota kasbini tanlashiga sabab boʻldi. U Buxoro muhandislik-texnologiya institutining informatika va axborot texnologiyalari fakultetini tugatgach, Romitan tumanidagi 1-sonli ixtisoslashtirilgan umumtaʼlim maktabida bir muddat oʻquvchilarga saboq berdi. Soʻng viloyat IIBga ariza bilan murojaat qildi.

2019-yil barcha sinovlardan muvaffaqiyatli oʻtgan Y. Boboyeva Qorovulbozor tumani IIB Migratsiya va fuqarolikni rasmiylashtirish guruhi inspektori lavozimiga tayinlandi. U ustozlari koʻmagida kasb mahoratini oshirib, qatʼiyatli va talabchan xodima boʻlib yetishdi. Uch yildan soʻng Romitan tumani IIB Huquqiy statistika guruhi katta inspektori vazifasiga oʻtkazildi. Bu sohada ham qiynalmadi. Chunki oliygohda aynan kompyuter boʻyicha tahsil olgani asqatyapti. U asosan Romitan, Peshku va Buxoro tumanlari ichki ishlar boʻlimlarining statistik maʼlumotlarini jamlaydi va tahlil qiladi.

- Kishi oʻz kasbini eʼzozlasa, har bir topshiriqni vaqtida bajarishga odatlansa, hammasiga ulguradi, — deydi leytenant Y. Boboyeva. — Turmush oʻrtogʻim Umidjon Umarov tadbirkor boʻlsa-da, xizmatimni qadrlaydi. Shundan boʻlsa kerak, ishimda unum, xizmatimda qoʻnim bor.

Yulduzxon sport sohasida ham ancha yutuqlarga erishgan. Huquqni muhofaza qiluvchi organlarda xizmat olib borayotgan ayol xodimalar oʻrtasida oʻtkaziladigan shaxmat-shashka musobaqalarida besh yildan buyon faxrli birinchi oʻrinni egallab kelayotgan Y. Boboyeva oʻtgan yili “Besh tashabbus olimpiadasi”da 27-30 yoshlilar toifasida ishtirok etib, shashka boʻyicha musobaqa gʻolibasi boʻldi.

Qisqasi, xizmatda talabchan xodima, bolalari uchun mehribon ona, turmush oʻrtogʻi uchun suyukli yor boʻlgan lavhamiz qahramoni yurt osoyishtaligini taʼminlashga munosib hissa qoʻshayotganidan hamisha mamnun.

Mirzoqul AHADOV, oʻz muxbirimiz.

Buxoro viloyati.