Qarshi shahar Ichki ishlar organlari faoliyatini muvofiqlashtirish boshqarmasida boʻlib oʻtgan taqdimot “Bezorilik jinoyatlarining oldini olish metodikasi”ga bagʻishlandi. Tadbirda viloyat IIB sohaviy xizmatlar rahbarlari, Ichki ishlar vazirligi akademiyasi professor-oʻqituvchilari, mahallalarda xizmat olib borayotgan profilaktika inspektorlari va boshqalar ishtirok etdi.

Taqdimotda Qarshi shahrining kriminogen xususiyatini oʻrgangan holda tayyorlangan qoʻllanmaning dolzarb ahamiyati, mazmun-mohiyati, mahallalarda jinoyatchilikni jilovlashga qaratilgan tavsiyalar va ularni amaliyotga tatbiq qilish mexanizmlari tushuntirildi.

Aytish joizki, xuddi shunday mashgʻulotlar Samarqand viloyatida ham oʻtkazilmoqda. Toyloq, Urgut va Bulungʻur tumanlari ichki ishlar boʻlinmalarida oʻtgan tadbirda “Oʻgʻrilik jinoyatlariga qarshi kurashishni tashkil etish metodikasi” atroflicha targʻib qilindi. Hududlarning kriminogen vaziyatiga salbiy taʼsir koʻrsatayotgan omillar, ayniqsa koʻp sodir etilayotgan jinoyatlarning sabab va sharoitlarini aniqlash, barvaqt oldini olish, profilaktik ishlarni manzilli amalga oshirish yuzasidan bildirilgan fikr-mulohazalar, ilmiy asosga ega taklif hamda tavsiyalar soha xodimlarining kasbiy koʻnikmalarini mustahkamlashga xizmat qildi.

IIV akademiyasi Axborot xizmati