Ichki ishlar vazirligi Akademiyasida Oʻzbekiston xalq shoiri, “Jadid” gazetasi bosh muharriri Iqbol Mirzo bilan uchrashuv boʻlib oʻtdi
2024-02-20 10:45:00 / Yangiliklar
Taniqli ijodkor dastavval oʻquv dargohida amalga oshirilayotgan islohotlar, Yangi Oʻzbekiston yoshlari uchun yaratilgan ulkan imkoniyatlarni koʻzdan kechirdi. Yosh avlodni ilm-maʼrifatli qilish, kitob va adabiyotga oshno etish, buyuk ajdodlarimizning bebaho merosini oʻrganish yoʻlida olib borilayotgan ezgu ishlarni eʼtirof etdi.
Akademiya rahbari bilan muloqot chogʻida vatanparvarlik tarbiyasining dolzarb ahamiyati haqida soʻz bordi. Yangilanayotgan jamiyatimizda milliy oʻzligini anglagan, yuksak bilim va tafakkurga ega yoshlarni kamol toptirish ustuvor maqsadlardan biri ekanligi aytildi. Bu borada akademiyada yoʻlga qoʻyilgan ilgʻor yondashuvlar chinakam xalqparvar kadrlarni yetishtirishga xizmat qilayotgani qayd etildi.
Shundan soʻng “Jadid” gazetasi ijodkorlari ishtirokida “Ajdodlar merosi – millat xazinasi” mavzuida maʼnaviy-maʼrifiy tadbir oʻtkazildi. Iqbol Mirzo hozirgi murakkab davrda maʼrifatparvar bobolarimiz faoliyatini keng oʻrganish, hayotini yoshlarga ibrat sifatida koʻrsatish maʼnaviy ehtiyojga aylanganini alohida taʼkidladi.
– Bugungi avlod millatimiz fidoyilarini yozuvchi, shoir boʻlganliklari uchun yaxshi biladi. Asarlarini mutolaa qiladi. Ammo ularning mustamlaka zulmi ostidagi maʼnaviy kurashlarini teran anglamaydi. Abdulhamid Choʻlpon millat adabiyotsiz yashay olmasligini va oxir-oqibat inqirozga yuz tutishini 16 yoshidayoq “Adabiyot nadir?» maqolasida baralla aytgandi. Aslida, bu ulkan maʼnaviy jasorat edi. Jadid bobolarimiz xalqni maʼrifatli, yurtni ozod qilaman, deb, oʻz hayotlarini qurbon qilganlar. Shuning uchun ham ulardan maʼnaviy qarzdormiz. Biz yoshlarni ona Vatanimiz va xalqimizga sadoqatli insonlar etib tarbiyalasak, oʻylaymanki, ajdodlarimizga munosib ish qilgan boʻlamiz, – dedi u.
Taniqli shoir muhtaram Prezidentimiz tashabbusi bilan taʼsis etilgan “Jadid” adabiy, ilmiy-maʼrifiy va ijtimoiy gazetasiga ham toʻxtaldi. Oʻtgan qisqa fursat ichida nashr xayrixohlari safi kengayib, jadid bobolarimiz gʻoyalarini targʻib qilish uchun ulkan adabiy maydon yuzaga kelgani taʼkidlandi.
Uchrashuv davomida shoirning shonli tariximiz, Vatanimiz va insoniy fazilatlarni ulugʻlagan sheʼrlari tinglandi. Badiiy havaskorlik jamoalari tomonidan sahnalashtirilgan “Choʻlpon” spektakli barchaga manzur boʻldi. Ijodiy hamkorlik yoʻlida akademiya axborot-resurs markazi fondiga Alisher Navoiyning “Xamsa” dostonlari tuhfa qilindi.
IIV Akademiyasi Axborot xizmati