Ichki ishlar vazirligida “Oʻzbek tilining davlat tili sifatidagi nufuzini oshirish – muhim vazifa” mavzusida navbatdagi maʼnaviyat va maʼrifat darsi boʻlib oʻtdi
2024-02-05 18:00:00 / Yangiliklar
IIV Markaziy apparati xodimlari ishtirok etgan tadbirni Maʼnaviy-maʼrifiy ishlar xizmati boshligʻi, polkovnik Hamza Maxsumov ochib, soʻnggi yillarda barcha sohalar qatori, ichki ishlar organlari tizimida ham oʻzbek tilining nufuzini oshirishga qaratilgan ishlar izchil amalga oshirilayotganini taʼkidladi., shuningdek, tadbirda davlat tili toʻgʻrisidagi qonun hujjatlariga rioya etish va ularning ijrosini taʼminlash vazirlik rahbariyati tomonidan nazoratga olingani, bu borada qator huquqiy hujjatlar qabul qilinganini qayd etildi.
Shundan soʻng soʻzga chiqqan Vazirlar Mahkamasi huzuridagi Oʻzbek tilini rivojlantirish jamgʻarmasi direktori Azizjon Eminov hamda Davlat tilida ish yuritish asoslarini oʻqitish va malaka oshirish markazi direktori, filologiya fanlari nomzodi, dotsent Inomjon Azimov bugungi kunda ona tilimizning obroʻsini yanada koʻtarish davlatimiz oldida turgan muhim masalalardan biri ekani, buning uchun yetarlicha saʼy-harakatlar amalga oshirilayotganiga batafsil toʻxtaldi.
Hozirda dunyoning koʻplab davlatlarida oʻzbek tili oʻrganilayotgani, endilikda ularning sonini yanada oshirish maqsadida ish olib borilayotganini tilga olishdi.
Tadbir doirasida ona tilimiz haqidagi videorolik namoyish etilib, ishtirokchilarning mavzu yuzasidan bergan savollariga soha mutaxassislar atroflicha javob qaytarishdi.