Qatarda oʻtgan Xalqaro politsiya akademiyalari assotsiatsiyasi Ijroiya kengashining navbatdagi yigʻilishida hamkorlik istiqbollari muhokama qilindi
2024-01-21 09:55:00 / Yangiliklar
18-yanvar kuni Qatar Davlati poytaxti Dohada Xalqaro politsiya akademiyalari assotsiatsiyasi (INTERPA) Ijroiya kengashining navbatdagi yigʻilishi boʻlib oʻtdi. Unda Ichki ishlar vazirligi Akademiyasi vakillari ham qatnashdi.
Yigʻilishni Ijroiya kengash raisi, Turkiya milliy politsiya akademiyasi prezidenti Yilmaz Cholak olib bordi. Kengashga aʼzo taʼlim muassasalari rahbarlari kun tartibidagi asosiy masalalar bilan birga, mintaqaviy va xalqaro ahamiyatga molik global muammolar yuzasidan fikr almashdilar.
Muloqot formatida oʻtgan yigʻilishda amalga oshirilgan ishlar taʼkidlanib, kelgusidagi rejalar muhokama qilindi. INTERPA doirasida oʻtkazilishi nazarda tutilgan anjumanlar yuzasidan aniq chora-tadbirlar belgilab olindi. Yigʻilish ishtirokchilari INTERPAning XII konferensiyasiga bagʻishlab chop etilgan kitob taqdimoti bilan tanishdilar.
Yigʻilishda Ichki ishlar vazirligi akademiyasi boshligʻi Rustam Xatamov ham soʻz olib, hamkorlik fonida taʼlim integratsiyasini kuchaytirish muhimligini taʼkidladi. Bu boradagi ishlarning amaliy ifodasi sifatida joriy yil iyul oyida Akademiyada tashkil etilishi rejalashtirilgan kriminalistika oʻquv kursi haqida maʼlumot berildi. Xorijiy taʼlim muassasalari rahbarlari eʼtiboriga mazkur oʻquv kursi boʻyicha tayyorlangan videotaqdimot hamda Akademiya faoliyatiga oid videorolik havola qilindi. Ijroiya kengash aʼzolari tomonidan IIV Akademiyasida ichki ishlar organlari uchun kadrlar tayyorlash jarayoniga tatbiq qilingan zamonaviy yondashuvlarga yuqori baho berildi.
Yigʻilish yakunida Yilmaz Cholak jahondagi geosiyosiy jarayonlar murakkablashib borayotgan bir sharoitda hamkorlik muhitini mustahkamlash, aloqalarni barqaror rivojlantirish zarur ahamiyat kasb etayotganini taʼkidlab, taklif va tashabbuslarini ilgari surdi.
Yigʻilish doirasida Ijroiya kengash aʼzolari Qatar politsiya akademiyasida oʻtkazilgan tantanali bitiruv marosimida ishtirok etdilar. Shuningdek, taʼlim muassasalari rahbarlari oʻrtasida qator manfaatli uchrashuvlar boʻlib oʻtdi.
Xususan, IIV Akademiyasi boshligʻi Rustam Xatamov Qatar politsiya akademiyasi rahbari Abdurahmon Majid al-Sulaiti bilan uchrashdi. Muloqotda ikki davlat oʻrtasidagi munosabatlar tobora mustahkamlanib borayotgani eʼtirof etildi. Tomonlar taʼlim sohasida hamkorlik va tajriba almashinuvini yoʻlga qoʻyish zarurligini taʼkidlab, anglashuv memorandumini imzolashga kelishib oldilar.
Delegatsiyamizning Turkiya, Saudiya Arabistoni, Shimoliy Makedoniya, Moʻgʻuliston va Maldiv Respublikasi vakillari bilan boʻlib oʻtgan muloqotlari chogʻida hamkorlikning muhim yoʻnalishlari yuzasidan qizgʻin fikr almashildi. Bundan tashqari, vakillarimiz Doha shahridagi politsiya departamenti faoliyati bilan tanishdilar.
IIV Akademiyasi Axborot xizmati