IIV ixtisoslashtirilgan maktab-internati 2025/2026 oʻquv yili uchun tanlov eʼlon qiladi
2025-04-19 19:10:00 / Yangiliklar
Oʻzbekiston Respublikasi Ichki ishlar vazirligining ixtisoslashtirilgan maktab-internati 2025/2026 oʻquv yili uchun umumtaʼlim muassasalarini 4-sinfni tamomlayotgan (oʻgʻil bolalar) oʻquvchilarni tanlovlarda ishtirok etishga taklif etadi.
Ixtisoslashtirilgan maktab-internatga oʻqishga har yilgi qabul kvotasi 100 nafar oʻquvchini tashkil etib, uning 50 foizi ichki ishlar idoralari xodimlari va 50 foizi boshqa fuqarolar farzandlariga taqsimlanadi.
Jamoat tartibini saqlashda, jangovar harakatlarda, terrorchilikka qarshi operatsiyalar oʻtkazishda, favqulodda holat tartibini huquqiy taʼminlash va ularning oqibatlarini bartaraf etishda ishtirok etgan vaqtda halok boʻlgan xodimlarning farzandlari oʻqishga tanlovsiz qabul qilinadi.
Farzandlarini maktab-internatga oʻqishga kirish istagini bildirgan ota-onalar yoki ularning oʻrnini bosuvchi shaxslar doimiy yashash joyidagi hududiy ichki ishlar boshqarmalariga belgilangan shakldagi ariza bilan murojaat qilishlari talab etiladi.
Farzandlari maktab-internatga oʻqishga kirish istagini bildirgan xodimlar bevosita ichki ishlar organlarining rahbarlariga bildirgi bilan murojaat qiladi.
Arizalar joriy yilning 15-aprelidan 1-iyun kuniga qadar qabul qilinadi.
Tanlov quyidagi bosqichlarda amalga oshiriladi:
- hujjatlarni toʻplash va oʻrganish;
- orfografik va punktuatsion savodxonlik darajasini aniqlash;
- umumjismoniy tayyorgarlik darajasini aniqlash;
- yakuniy test sinovlari.
Nomzodlarni umumtaʼlim fanlari (ona tili va adabiyot hamda matematika) boʻyicha bilimini baholash Oʻzbekiston Respublikasi Oliy taʼlim, fan va innovatsiyalar vazirligi huzuridagi Bilim va malakalarni baholash agentligi tomonidan test sinovlari asosida oʻtkaziladi.
Tanlov shartlariga koʻra, diktant hamda umumjismoniy tayyorgarlik darajasini aniqlash bosqichlari natijalari boʻyicha 6 (olti) balldan kam ball toʻplagan nomzodlar Oʻzbekiston Respublikasi Oliy taʼlim, fan va innovatsiyalar vazirligi huzuridagi Bilim va malakalarni baholash agentligi tomonidan oʻtkaziladigan Test sinovlariga kiritilmaydi.
Test sinovlari oʻqishga qabul qilishning hal qiluvchi bosqichi hisoblanib, xodimlar va boshqa fuqarolar uchun ajratilgan qabul kvotalari doirasida test sinovlari natijasi boʻyicha toʻplagan ballaridan kelib chiqqan holda navbatdagi ketma-ketlik tartibiga muvofiq nomzodlar tanlab olinadi.
IIV ixtisoslashtirilgan maktab-internati direktorining Oʻquv ishlari boʻyicha oʻrinbosari Sh.S.Mirov tel: 90.065-25-75