Yangi yil boshlanishi munosabati bilan soha vakillariga ustuvor vazifalar belgilanib, bir guruh xodimlarga navbatdagi maxsus unvonlar topshirildi
2024-01-06 11:45:00 / Yangiliklar
Ichki ishlar vaziri oʻrinbosari general mayor B. Mirzarahimov tomonidan Transport va turizm obyektlarida xavfsizlikni taʼminlash departamenti xodimlariga yangi yil boshlanishi munosabati bilan ustuvor vazifalar belgilanib, Ichki ishlar vaziri buyrugʻi bilan navbatdagi maxsus unvonlar topshirildi.
Joriy yilning 6-yanvar kuni IIV Transport va turizm obyektlarida xavfsizlikni taʼminlash departamentida vazir oʻrinbosari tomonidan oʻtgan yil davomida xalqimiz tinchligi, yoʻlovchi va turistlar xavfsizligini taʼminlash boʻyicha koʻplab yutuqlarga erishilganligi, transport va turizm obyektlarida xususan, temir yoʻl, aeroport va metropolitenda yoʻlovchi va fuqarolar oʻrtasida huquqbuzarliklar, jinoyat hamda baxtsiz hodisalarning oldini olish, yurtimizga chet el davlatlaridan tashrif buyurgan xorijiy turistlar xavfsizligini taʼminlashda amalga oshirilgan ishlar yuzasidan soʻz yuritildi. Shuningdek, 2024-yil uchun mazkur yoʻnalishlarda bir qator manzilli chora-tadbirlarni jadallashtirish, xususan xodimlar oʻrtasida xizmat va ijro intizomi, qonunchilik talablariga qatʼiy rioya qilish, shaxsiy tarkib oʻrtasida sogʻlom muhitni shakllantirish, tarbiyaviy ishlarni jadallashtirish va qator vazifalar yuzasidan aniq koʻrsatmalar berildi.
Mazkur tadbir soʻngida, vazir oʻrinbosari tomonidan xizmat vazifasiga sidqidildan yondashib, jinoyatchilikka qarshi kurashish va huquq-tartibotni taʼminlash borasida hamkasblari orasida oʻrnak boʻlib kelayotgan Transport va turizm obyektlarida xavfsizlikni taʼminlash departamentining bir guruh xodimlariga navbatdagi maxsus unvonlar topshirildi.
IIV Transport va turizm obyektlarida xavfsizlikni taʼminlash departamenti Axborot guruhi