19–23-dekabr kunlari IIV Akademiyasida “Kursantlarning ilmiy yutuqlari va innovatsion gʻoyalari” I ilm-fan festivali oʻtkazildi.
2023-12-26 13:20:00 / Yangiliklar
Tadbir ochilishida akademiya boshligʻining ilmiy ishlar va innovatsiyalar boʻyicha oʻrinbosari Ruftullo Nigmatov soʻz olib, yoshlarga sifatli taʼlim berish, ularni ilm-fanga qiziqtirish va innovatsiyalarga yoʻnaltirish, iqtidorini namoyon etishi uchun keng imkoniyatlar yaratish, mamlakatimizda amalga oshirilayotgan islohotlarga daxldorlik tuygʻusini yuksaltirish festivalning bosh maqsadi ekanligini taʼkidlab oʻtdi.
Olimlar, ilmiy tadqiqotchilar va kursantlar ishtirokida besh kun davom etgan festival doirasida “Oʻzbekiston Respublikasining yangilangan Konstitutsiyasi va huquqiy islohotlar” mavzuida ilmiy-amaliy konferensiya, “Tezkor-qidiruv natijalarining daliliy ahamiyati: muammo va yechimlar”, “Ichki ishlar organlari faoliyatida axborot-tahliliy ishlarni tashkil etish: muammo va yechimlar” mavzularida ochiq munozara, “Jinoyat izlarini olish: muammo va yechimlar”, “Hodisa sodir boʻlgan joyni koʻzdan kechirish: muammo va yechimlar” mavzularida “workshop”, shuningdek, motivatsion ruhdagi boshqa tadbirlar tashkil qilindi. Bundan tashqari, kursantlar ixtisoslik va yuridik kafedralar tomonidan oʻtkazilgan intellektual bellashuvlarda qatnashib, qator natijalarga erishdilar.
Shunga koʻra, “Maʼmuriy huquq bilimdoni” intellektual musobaqasida 2-oʻquv kursining “Aysberg” jamoasi, “Tezkor-qidiruv huquqi bilimdoni” viktorinasida 3-oʻquv kursining “Olgʻa, ofitserlar” jamoasi, “Ichki ishlar organlarida inson huquqlarini himoya qilish” viktorinasida 2-oʻquv kursining “Adolat” jamoasi, “Ichki ishlar organlari maʼmuriy faoliyati bilimdoni” viktorinasida 1-oʻquv kursining “Everest” jamoasi, “Jinoyat va jinoyat-protsessual huquqi fanlari bilimdoni” intellektual oʻyinida 3-oʻquv kursining “Legenda” jamoasi, fuqarolik huquqi fanidan aqllilar bellashuvida 1-oʻquv kursining “Zukkolar” jamoasi hamda “Kriminalistik kvest” intellektual turnirida 2-oʻquv kursi kursanti Shamshodbek Dalaboyev gʻoliblikni qoʻlga kiritdi.
Festival yakunida eng faol ishtirokchilar uchun poytaxtimizdagi tarixiy-madaniy maskanlarda koʻngilochar tadbirlar uyushtirildi. Gʻoliblar va bir guruh tashabbuskor yoshlar sertifikat bilan taqdirlandi.
IIV Akademiyasi Axborot xizmati