Yangi yil bayramiga tayyorgarlik holatini oʻrganish va fuqarolar uchun xavfsiz hamda qulay muhit yaratish orqali bayramona kayfiyatni shakllantirish maqsadida IIV JXD Yoʻl harakati xavfsizligi xizmati boshligʻi polkovnik Sherzod Ibragimov rahbarligidagi ishchi guruh Navoiy viloyatiga tashrif buyurdi.

Tashrif davomida ishchi guruh dastlab yigʻilish oʻtkazib, unda bajarilishi lozim boʻlgan ishlar rejasini belgilab oldi. Har bir vazifa uchun aniq muddatlar belgilanib, masʼul xodimlarga topshiriqlar berildi.

Shundan soʻng, “Yangi yil archasi“ oʻrnatilgan hududlar, bozorlar va bayram tadbirlari oʻtkaziladigan joylarda xavfsizlik choralari hamda narx-navolar holati koʻrib chiqildi. Turli noxush holatlarning oldini olish uchun profilaktik tadbirlarni kuchaytirish rejalari ishlab chiqildi.

Shahar markazidagi “Islom Karimov“ koʻchasida joylashgan saylgohda oʻrganishlar amalga oshirildi. Bayram tadbirlari oʻtkaziladigan koʻngilochar maskanlarda xavfsizlik choralarining taʼminlanganligi, jamoat tartibini saqlash va yongʻin xavfsizligiga rioya qilinganligi tekshirildi.

Bayram munosabati bilan amalga oshirilayotgan ishlar tanqidiy koʻrib chiqilib, aniqlangan kamchiliklar yuzasidan masʼullarga tegishli koʻrsatmalar berildi. Fuqarolar uchun xavfsiz va qulay sharoitlarni taʼminlash asosiy vazifa sifatida belgilab olindi.

IIV Yoʻl harakati xavfsizligi xizmati Axborot xizmati