IIV Namangan Akademik litseyida ochiq eshiklar kuni oʻtkazildi
2024-10-30 05:30:00 / Yangiliklar
Yoshlarning oʻqishga boʻlgan qiziqishni oshirish, ularning kasb tanlashida yordam berish va taʼlim muassasasi bilan yaqindan tanishtirish maqsadida Ichki ishlar vazirligi Namangan Akademik litseyida ochiq eshiklar kuni tashkil etildi.
Unda oʻquvchilar litseyning oʻquv va amaliy mashgʻulotlari haqida batafsil maʼlumot olish, darslar qanday oʻtilishini bevosita kuzatish imkoniyatiga ega boʻldilar.
Tadbir davomida JTSB xodimlari tomonidan yoshlarga ichki ishlar organlarida xizmatda foydalanilayotgan jangovar texnikalar, harbiy qurollar va maxsus vositalar koʻrgazmasi tashkil etildi.
Shuningdek, Kinologiya xizmati xodimlari oʻzlariga biriktirilgan xizmat itlari ishtirokida sodir etilayotgan jinoyatlarning oldini olish va ularni issiq izidan fosh etish boʻyicha amaliy mashgʻulot oʻtkazishdi.
Litsey oʻquvchilari tomonidan tayyorlangan jangovar chiqishlar barchaga yuqori kayfiyat ulashish barobarida, vatanga muhabbat tuygʻularini yanada jonlantirdi.
Yoshlar tadbir yakunida oʻzlariga qiziqarli boʻlgan savollar bilan murojaat qilib, akademik litseyda taʼlim olish tartibi, talablar va imkoniyatlar haqida qoʻshimcha maʼlumot olishdi.
Namangan viloyati IIB Axborot xizmati