O‘zbеkiston Rеspublikаsi Ichki ishlаr vаzirligi

Ellikqalʼa tumani Qoraqalpogʻistondagi eng qadimiy hududlardan biri hisoblanadi. 1977-yilda tashkil etilgan tumanga Ellikqalʼa deb nom berilishining asosiy sababi shuki, ilgari hududda doimo shamol, yaʼni yel esib turgan, qolaversa, bu yerda qalʼalar koʻp boʻlgan.

Markazi Boʻston shahri boʻlgan tuman shimoldan Qizilqum choʻli, Sulton Uvays togʻi, gʻarbdan Beruniy va Taxtakoʻpir tumanlari, janubdan Xorazm viloyati, sharqdan Toʻrtkoʻl tumani va Navoiy viloyati bilan chegaradosh.

Tuman hududida tinchlik-osoyishtalikni taʼminlash, jinoyatchilikning oldini olishdek masʼuliyatli vazifalar ichki ishlar organlari xodimlarining zimmasida.

Joriy yilning oʻtgan davrida tuman IIB xodimlari tomonidan olib borilgan ishlar natijasida umumiy jinoyatchilik oʻtgan yilning shu davriga nisbatan 7,1 foizga, jinoyat qidiruv sohasidagi jinoyatlar 15,5 foizga kamaydi. Mavjud 40 ta mahalladan 32 tasi “yashil”, 6 tasi “sariq” toifaga kiritildi.

Albatta, bunda aholi bilan yaqin muloqot va hamkorlikning yoʻlga qoʻyilgani muhim ahamiyat kasb etdi, — deydi tuman IIB boshligʻi, podpolkovnik Kuanishbay Uzakbayev. — Chunki ishonch tufayli oʻrnatilgan har qanday hamkorlik natija bermasdan qolmaydi.

Maʼlumki, jinoyatchilikni jilovlashda profilaktika inspektorlarining hissasi salmoqli boʻlmoqda. Ayni paytda tumanda 23 ta tayanch punkti mavjud boʻlib, jami 40 nafar profilaktika inspektori xizmat faoliyatini olib bormoqda.

Joriy yilda ular tomonidan 31 mingdan ziyod xonadonlar oʻrganilib, huquqbuzarlik sodir etish yoki undan jabrlanish ehtimoli yuqori boʻlgan shaxslar boʻyicha tayyorlangan xulosalar mahalla faollariga taqdim etildi. 76 ta nizoli oila muammolari hal qilinib, 203 nafar fuqaroning bandligi taʼminlandi.

Tuman hududida harakat xavfsizligini taʼminlash, turli koʻngilsiz holatlarning oldini olish borasida ham bir qator ishlar yoʻlga qoʻyilgan.

Xususan, yil boshidan buyon eskirgan 59 ta yoʻl belgisi yangisiga almashtirilib, 100 ta yoʻnaltiruvchi ustun barpo qilindi. Tuman hududidan oʻtuvchi A-380 avtomobil yoʻliga, shuningdek, 1, 3 va 25-umumtaʼlim maktablari oldiga piyodalar oʻtishini tartibga soluvchi zamonaviy svetofor qurilmalari oʻrnatildi.

Sir emaski, bugungi kunda aksariyat yoʻl-transport hodisalari kelib chiqishiga haydovchilarning tezlikni oshirishi sabab boʻlmoqda. Shundan kelib chiqqan holda, haydovchilar oʻrtasida olib borilayotgan targʻibot tadbirlarida mazkur masalaga alohida ahamiyat beryapmiz. Kelgusida ham bu boradagi ishlarni maqsadli davom ettirish rejalashtirilgan, — deydi tuman IIB YHXB inspektori, serjant Begzod Qoʻchqorov.

Joriy yil boshida tuman IIB probatsiya guruhi hisobida 154 nafar mahkum roʻyxatda turgan boʻlsa, oʻtgan vaqt mobaynida ulardan 48 nafari muddatidan oldin shartli ravishda ozod etildi.

Ularning qayta jinoyat sodir etishining oldini olish va bandligini taʼminlash uchun 8-marta mehnat yarmarkasi oʻtkazildi. Ularda tumandagi qirqqa yaqin korxona va tashkilotlar boʻsh ish oʻrinlari bilan qatnashdi.

Tumanda xotin-qizlarni himoya qilish, muammolarini hal etish eʼtibor markazidagi masalalardan biri hisoblanadi. Tuman IIB HPB Xotin-qizlar masalalari boʻyicha katta inspektori, katta leytenant Nilufar Yuldashova tomonidan joriy yilning oʻtgan 8 oyi davomida 168 nafar xotin-qiz tazyiq va zoʻravonlikdan jabr koʻrgani aniqlanib, ularga himoya orderlari berildi.

Shundan 11 holatda himoya orderi talablarini buzish boʻyicha aybdorlarga nisbatan maʼmuriy choralar koʻrildi. Bundan tashqari, 85 ta xonadon oʻrganib chiqilib, aniqlangan 44 ta muammoning 32 tasi oʻzining ijobiy yechimini topdi.

Ayni paytda mahallalarda turli profilaktik tadbirlar oʻtkazilib, xotin-qizlar muammolariga mahalla faollari bilan birgalikda yechim topish choralari koʻrilmoqda.

©️ “Postda” gazetasi, Azamat Pirniyazov, Qoraqalpogʻiston Respublikasi.