Surxondaryo viloyati IIBda Vaziri oʻrinbosari polkovnik Ramazon Ashropov ishtirokida hisobot yigʻilishi oʻtkazildi
2024-07-27 09:55:00 / Yangiliklar
Surxondaryo viloyati ichki ishlar boshqarmasida joriy yilning olti oy yakuniga bagʻishlangan tahliliy yigʻilish boʻlib oʻtdi. Unda Ichki ishlar vaziri oʻrinbosari polkovnik R. Ashropov, viloyat ichki ishlar boshqarmasi boshligʻi polkovnik T. Ismailov, boshqarma boshligʻi oʻrinbosarlari, barcha sohaviy xizmat rahbarlari, shahar-tuman ichki ishlar boʻlimlari boshliqlari, ularning oʻrinbosarlari, boʻlinma boshliqlari, shahar-tuman ichki ishlar boʻlimlari shaxsiy tarkibi qatnashdi.
Videoselektor tarzida oʻtkazilgan yigʻilishda Surxondaryo viloyati ichki ishlar boshqarmasi boshligʻining birinchi oʻrinbosari podpolkovnik B. Inoqovning oʻtgan olti oy davomida viloyatda jinoyatchilikni jilovlash, huquqbuzarliklarga qarshi kurashish, jamoat tartibini saqlash, yoʻl-harakati xavfsizligini taʼminlash, hududda kriminogen vaziyatni yaxshilash borasida amalga oshirilgan ishlar yuzasidan hisoboti tinglandi.
Tadbirda vazir oʻrinbosari R. Ashropov soʻzga chiqib, viloyatda kriminogen vaziyat ahvoli va jinoyatchilikni jilovlash borasida koʻrilgan choralarni tanqidiy muhokama qildi hamda kelgusidagi vazifalarni belgilab berdi. Shu bilan birga, ichki ishlar organlarida tashkil etilgan “soʻrovxona”lardan foydalanish ahvoli, bu borada vazirlik tekshiruv guruhi tomonidan aniqlangan kamchilliklar koʻrsatib oʻtildi. Shuningdek, korrupsiya va tamagirlikka yoʻl qoʻymaslik, xizmat intizomi va qonuniylikka rioya qilish borasida rahbariyatning qatʼiy talab va topshiriqlarini xodimlarga yetkazdi.
Tanqidiy ruhda oʻtgan yigʻilishda viloyatda huquqbuzarliklar profilaktikasi, jamoat tartibini saqlash, yoʻl harakati xavfsizligini taʼminlash borasida amalga oshirilgan ishlar atroflicha tahlil etildi. Faoliyat davomida erishilgan yutuqlar bilan bir qatorda yoʻl qoʻyilgan kamchiliklar ham muhokama qilinib, jinoyatchilikning ayrim turlari oshgan shahar-tuman ichki ishlar boʻlimlari rahbarlariga bu borada amalga oshirilishi lozim boʻlgan chora-tadbirlar xususida koʻrsatma hamda topshiriqlar berildi.
Yigʻilishda xizmat davomida kamchiliklarga yoʻl qoʻygan sohaviy xizmatlarning ayrim xodimlari faoliyati muhokama etilib, tegishli taʼsir choralari belgilandi.
Biriktirilgan hududda jinoyatlarning oldini olib, xizmatda muvaffaqiyatga erishgan, korrupsion holatlarni oldini olishda, sport va boshqa sohalarda ichki ishlar organlarining imijini oshirishga qoʻshgan hissasi uchun bir guruh xodimlar Ichki ishlar vaziri oʻrinbosarining “Faxriy yorligʻi”, pul mukofotlari hamda qimmatbaho sovgʻalari bilan taqdirlandi.
Vazir oʻrinbosari R. Ashropovning Surxondaryo viloyatidagi oʻrganishlari davom ettirilmoqda.
Surxondaryo viloyati IIB Axborot xizmati