Xorazm viloyati Ichki ishlar boshqarmasida Ichki ishlar vaziri oʻrinbosari general-mayor Davron Nazarmuhammedov ishtirokida joriy yilning 6 oyi davomida amalga oshirilgan ishlar, yoʻl qoʻyilgan kamchiliklar muhokamasiga bagʻishlangan yigʻilish oʻtkazildi
2024-07-26 09:00:00 / Yangiliklar
Tadbirda Xorazm viloyati IIB boshligʻi polkovnik Ravshan Sultanxodjayev, IIB boshligʻining oʻrinbosarlari, barcha sohaviy xizmat rahbarlari, shahar-tuman ichki ishlar boʻlimlari boshliqlari, ularning oʻrinbosarlari, boʻlinma boshliqlari hamda tegishli mutasaddi xodimlar ishtirok etdilar.
Yigʻilishda boshqarma boshligʻi tomonidan oʻtgan olti oy davomida viloyatda jinoyatchilikni jilovlash, huquqbuzarliklarga qarshi kurashish, jamoat tartibini saqlash, yoʻl-harakati xavfsizligini taʼminlash borasida amalga oshirilgan ishlar yuzasidan hisobot berildi.
Shuningdek, yigʻilishda viloyat IIB boshligʻining oʻrinbosari – Maʼnaviy-maʼrifiy ishlar va kadrlar bilan taʼminlash xizmati boshligʻining ham hisoboti eshitildi.
Jinoyatchilikning ayrim turlari oshgan hudud mutasaddi rahbarlariga bu borada amalga oshirilishi lozim boʻlgan tadbirlar xususida koʻrsatma hamda topshiriqlar berildi.
Tadbirda Vazir oʻrinbosari soʻzga chiqib, korrupsiya va tamagirlikka yoʻl qoʻymaslik, xizmat intizomi va qonuniylikka rioya qilish borasida qatʼiy talab va topshiriqlarni yetkazdi.
Tadbir yakunida viloyat hududida jamoat tartibini saqlash, fuqarolar xavfsizligini taʼminlash, jinoyatchilikni jilovlashda hamkasblariga har tomonlama oʻrnak boʻlib kelayotgan xodimlardan bir guruhi rahbariyat tashakkurnomasi va pul mukofotlari bilan taqdirlandi.
Xorazm viloyati IIB Axborot xizmati