Ichki ishlar vaziri oʻrinbosari general-mayor Baxodir Mirzaraximov boshchiligida Qorovul qoʻshinlarining birlashgan dala-oʻquv markazida «Serjantlar forumi» ochilishi boʻlib oʻtdi
2024-07-17 13:00:00 / Yangiliklar
2024-yil 17-iyul kuni Qorovul qoʻshinlarining birlashgan dala-oʻquv markazida IIV vaziri oʻrinbosari general-mayor Baxodir Yuldashevich Mirzaraximov «Serjantlar forumi»ni tantanali ravishda ochiq deb eʼlon qildi va shaxsiy tarkibga Muhtaram Prezidentimiz, Qurolli Kuchlar Oliy Bosh Qoʻmondoni Shavkat Miromonovich Mirziyoyev boshchiliklarida milliy armiyamizni professional armiyaga aylantirish, zamonaviy qurol-aslaha va harbiy texnikalar bilan taʼminlash, harbiy obyektlar infratuzilmalarini yaxshilash shuningdek, jangovar xizmat vazifalarini muvaffaqiyatli bajarishga qodir boʻlgan, yuqori jangovar va axloqiy-ruhiy tayyorgarlikka ega boʻlgan, professional harbiy xizmatchi talablariga javob beradigan harbiy xizmatchilarni tayyorlash borasida misli koʻrilmas darajada islohotlar amalga oshirilganligi toʻgʻrisida aytib oʻtdi.
Oʻz soʻzi davomida bu islohotlarning mantiqiy davomi sifatida Oʻzbekiston Respublikasi Prezidentining 2020-yil 7-yanvardagi PQ-4557-son qaroriga asosan, Qorovul qoʻshinlarida oʻtgan davr mobaynida shaxsiy tarkibni xizmat oʻtashi uchun qulay sharoit yaratish, harbiy xizmatchilar va ularning oila aʼzolarini ijtimoiy himoya qilish borasida keng koʻlamli ijobiy ishlar amalga oshirib kelinayotganligiga alohida toʻxtalib oʻtildi.
Shuningdek, Qorovul qoʻshinlarida jami 4603 nafar serjantlar xizmat qilayotganligi, 2020-yildan hozirgi kunga qadar qoʻshin safida xizmat qilayotgan 2530 nafar harbiy xizmatchiga boshlangʻich «kichik serjant», 856 nafar harbiy xizmatchiga «3-darajali serjant», 45 nafar harbiy xizmatchiga «2-darajali serjant», 29 nafar harbiy xizmatchiga «1-darajali serjant» harbiy unvonlari berilganligi va bu boradagi samarali ishlarning isboti ekanligi aytib oʻtildi.
Bugungi Forumga har bir harbiy qismdan 20 nafardan jami 200 nafar serjantlar tashrif buyurganligi, «Serjantlar forumi» ishtirokchilari yurtimizdagi siyosiy-iqtisodiy jarayonlarni, Oliy Bosh Qoʻmondonimiz tomonidan olib borilayotgan islohotlar mazmun-mohiyatini toʻliq anglagan holda oʻzlarining jismoniy, aqliy savodxonliklarini forum davomida namoyon etish uchun bor kuch-gʻayratlarini safarbar etishlariga, oʻzlarining kelgusi xizmat faoliyatlariga zaruriy boʻlgan bilim va amaliy koʻnikmalarni puxta egallashlari, oʻz qoʻl ostidagi shaxsiy tarkibga munosib yoʻlboshchi boʻlishlariga ishonch bildirib oʻz soʻziga yakun yasadi.
Vazir oʻrinbosari tomonidan dala-oʻquv maydonida tashkil etilgan har-bir oʻquv nuqtalari bilan tanishib, jangovar tayyorgarlik, kasbiy tayyorgarlik hamda maʼnaviy-maʼrifiy tayyorgarlik mashgʻulotlarini oʻtkazilishi ularning bilim saviyasini oshirib nazariy hamda amaliy mashgʻulotlarning sifatli borilishi hamda mazkur dala-oʻquv maydonida yaratilgan shart-sharoitlar koʻzdan kechirilib, bir qator koʻrsatmalar berildi.
Shuningdek, Qorovul qoʻshinlari harbiy qismlari, alohida batalyon komandirlari va qism komandirlari bilan suhbatlashilib, suhbat davomida har birining mavjud muammolari oʻrganildi va ularga oʻz boʻysinuvidagi shaxsiy tarkibni harbiy intizomini mustahkamlash va jangovar xizmatda xafvsizlik choralariga qatʼiy amal qilishini taʼkidlab oʻtib harbiy qismga keltirilgan harbiy texnika va qurol-aslaxalar bilan yaqindan tanishib ushbu vositalar haqida oʻzini ijobiy fikr mulohazalarini aytib oʻtdi.
IIV Transport va turizm obyektlarida xavfsizlikni taʼminlash departamenti Axborot guruhi