Soha fidoyisi. Har jabhada oʻrnak
2024-07-17 01:20:00 / Yangiliklar
Jizzax shahar IIB 1-sonli IIB profilaktika katta inspektori, kapitan Javlon Ismoilov joriy yilning oʻtgan davrida xizmat hududi «Oqqoʻrgʻonlik» mahallasida giyohvandlik moddalari bilan bogʻliq ikkita jinoyat hamda yuzga yaqin maʼmuriy huquqbuzarlikni aniqlashga muvaffaq boʻldi. Shuningdek, ichki ishlar organlarida profilaktik hisobda turuvchi 29 nafar, jazoni ochiqda oʻtayotgan 11 nafar, maʼmuriy nazorat ostiga olingan 2 nafar, ichkilikbozlikka ruju qoʻygan 6 nafar shaxs, 4 ta nizoli oila vakillari bilan doimiy ravishda profilaktik tadbirlarni amalga oshirib kelmoqda.
Kapitan Javlon Ismoilov mahalla faollari va qator tashkilotlarga fuqarolar muammolarini hal qilish, qonunbuzarliklarning oldini olish nuqtai nazaridan 149 ta xulosa kiritdi. Shu oʻrinda taʼkidlash kerakki, joriy yilning birinchi yarmida «mahalla yettiligi» saʼy-harakati bilan 50 kishi ish bilan taʼminlandi. 4 nafar xotin-qizga tikuv mashinalari, 8 kishiga kredit mablagʻi ajratilishida, 1 nafar fuqaroning turar joyini taʼmirlashda koʻmak koʻrsatildi. Yil soʻnggiga qadar mahallada 180 ta ish oʻrni yaratish koʻzda tutilmoqda.
Umuman olganda, 5309 kishi istiqomat qiladigan mahallada aholining bandlik darajasi yuqori. Hududda 934 ta tadbirkorlik subyekti faoliyat koʻrsatmoqda. Ularning 23 tasi hunarmandchilikka ixtisoslashgan. Hovlilarning 11 tasida issiqxona mavjud. Qisqasi, yuzaga kelgan ijobiy muhit va koʻrilayotgan profilaktik tadbirlar natijasida oʻtgan bir yarim yil davomida mahalla «yashil» toifada turibdi.
Kapitan Javlon Ismoilov soha vakillari oʻrtasida tashkil qilinayotgan koʻrik-tanlovlarda ham yuqori natijalarga erishmoqda. Jumladan, oʻtgan yili Oʻzbekiston kasaba uyushmalari federatsiyasi tashabbusi bilan faol «mahalla beshlik»larini aniqlash maqsadida viloyat miqyosida uyushtirilgan tanlovning «Eng yaxshi profilaktika inspektori» yoʻnalishida 1-oʻrinni, kiberxavfsizlik boʻyicha tashkil qilingan «Cyber week» tanlovining viloyat bosqichida «Eng faol mahalla profilaktika inspektori» yoʻnalishida 2-oʻrinni qoʻlga kiritdi. Bu yil esa soha xodimlari oʻrtasida boʻlib oʻtgan «Eng namunali oila» koʻrik-tanlovining viloyat bosqichida 2-oʻrinni egalladi. Xuddi shunday, «Xavfsiz hayot uchun birla-shaylik!» tanlovining viloyat bosqichida «Yoshlar jinoyati va huquqbuzarligidan xoli mahalla» yoʻnalishida «mahalla yettiligi» birgalikda 1-oʻrin sohibi boʻldi.
Alijon ABDUSATTOROV, oʻz muxbirimiz.
Jizzax viloyati.