IIV Qorovul qoʻshinlariga qarashli Toshkent viloyatida joylashgan 7535-harbiy qism maxsus vazifalarni bajaruvchi safarbarlik vzvodi 2-jangovar guruhi komandiri, katta leytenant Azizbek Ismoilov otasi isteʼfodagi serjant Xushvaqt Karimovga havas qilib shu kasbni tanladi.

U bundan toʻrt yil muqaddam mamlakatimiz Qurolli Kuchlari Akademiyasini muvaffaqiyatli tamomlab, mazkur harbiy qismda xizmatni boshladi. Yosh ofitserga mayor Dilmurod Hasanov ustozlik qildi.

Guruh harbiy xizmatchilari qoʻshinlar miqyosida oʻtkaziladigan turli musobaqa va tanlovlarda ishtirok etib, yuqori natijalarga erishayotir. Jumladan, oʻtgan yili guruh katta mutaxassis sapyori, III darajali serjant Shaxboz Boʻriboyev «Alvon beret» sohibi boʻldi. Shuningdek, guruh katta mutaxassisi, xizmat itlari boʻyicha yoʻriqchi, III darajali serjant Muhriddin Mirzaaliyev esa oʻtgan yili «Yangi Oʻzbekiston» bogʻida oʻtkazilgan «Yangi nafas» ommaviy yugurish musobaqasida 3 km. masofaga yugurish boʻyicha faxrli 1-oʻrinni qoʻlga kiritdi.

Orzular qanotida parvoz qilayotgan A. Ismoilov oʻz ustida tinimsiz izlanib, sohani mukammal oʻrganishga intilmoqda. Shu kunlarda u navbatdagi «Alvon beret» va «Dovyurak jangchi» intensiv sinovlariga puxta tayyorgarlik koʻryapti.

Mixli SAFAROV, oʻz muxbirimiz.
Toshkent viloyati.