Ichki ishlar vaziri oʻrinbosari general-mayor Baxodir Yuldashevich Mirzaraximov joriy yilning 22-may kuni Toshkent shahri aeroportlarida xizmat olib borayotgan xodimlarning ish faoliyatini koʻzdan kechirdi.

Oʻrganishlar davomida 2024-yil uchun moʻljallangan bir qator manzilli chora-tadbirlarni jadallashtirish, xususan xalqaro hamda mahalliy aeroportlarda fuqarolarning xavfsizligini taʼminlash, jinoyat va huquqbuzarliklarning barvaqt oldini olish, xodimlar oʻrtasida xizmat va ijro intizomi, qonunchilik talablariga qatʼiy rioya qilishlari, xodimlarning xizmat faoliyati ustidan kunlik nazoratni kuchaytirish, korrupsiyaga yoʻl qoʻymaslik boʻyicha masʼul xodimlarga koʻrsatmalar berildi.

Shuningdek, aeroport hududida olib borilayotgan qurilish va rekonstruksiya ishlari koʻzdan kechirilib, ish jarayonlari bilan yaqindan tanishdi.

Toshkent shahri aeroportlarida xavfsizlikni taʼminlash boshqarmasiga qoʻshimcha ravishda biriktirilgan Toshkent shahar IIBB PPX xodimlari hamda Milliy gvardiya xodimlari va xalqaro aeroportlarda xavfsizlikni taʼminlash boʻyicha qoʻshinlarining harbiy qism xodimlari bilan doimiy hamkorlikda ish olib borish, hamkorlikni yanada kuchaytirish zarurligi, mavjud resurslardan unumli foydalanish, shuningdek ish jarayonida zamonaviy axborot kommunikatsiya vositalarini qoʻllash orqali ish samaradorligini kuchaytirish lozimligi taʼkidlab oʻtildi.

IIV Transport va turizm obyektlarida xavfsizlikni taʼminlash departamenti Axborot guruhi