IIV Akademiyasida Turkiya Respublikasi IIV Xavfsizlik bosh boshqarmasi Kiberjinoyatchilikka qarshi kurashish boshqarmasi bilan hamkorlikda navbatdagi oʻquv kursi tashkil qilindi
2024-05-16 09:00:00 / Yangiliklar
Maʼlumotlarga koʻra, dunyo boʻyicha har yili 1 milliarddan ortiq bola turli xil zoʻravonliklarga duchor boʻlmoqda. Shu raqamning oʻziyoq, bolalarni zoʻravonlikning barcha shakllaridan himoya qilish dolzarb muammo ekanligini koʻrsatadi.
Ichki ishlar vazirligi akademiyasida Turkiya Respublikasi IIV Xavfsizlik bosh boshqarmasi Kiberjinoyatchilikka qarshi kurashish boshqarmasi bilan hamkorlikda navbatdagi oʻquv kursi tashkil qilindi.
Mashgʻulotlarda akademiya professor-oʻqituvchilari hamda IIV Jamoat xavfsizligi departamenti huquqbuzarliklar profilaktikasi xizmati xodimlari qatnashdi.
Turkiyalik tajribali mutaxassislar tomonidan bolalarga nisbatan sodir etilayotgan zoʻravonliklar, ularning turlari, xususan, jinsiy zoʻravonlikka qarshi kurashish masalalari, bu borada umum-eʼtirof etilgan xalqaro huquqiy normalar, ayrim davlatlarning oʻziga xos tajribasi, shuningdek, bolalar huquqlarini himoya qilish boʻyicha Turkiya va Oʻzbekiston tajribasining ilgʻor jihatlari, bolalarni zoʻravonlikning barcha shakllaridan himoya qilish va kibertahdidlardan asrashda huquqni muhofaza qiluvchi organlarning asosiy vazifalari, bolalarga nisbatan jinsiy zoʻravonlik jinoyatlari boʻyicha tergovga qadar tekshiruv va surishtiruv ishlarini olib borish kabi mavzular atroflicha yoritildi.
Qisqa muddatli oʻquv kurslari yakunida tinglovchilarga sertifikat berildi.
IIV Akademiyasi Axborot xizmati