O‘zbеkiston Rеspublikаsi Ichki ishlаr vаzirligi

Mamlakatimizda, xususan, poytaxtimizda ijtimoiy koʻmakka muhtoj har bir ayolga iqtisodiy, tibbiy, huquqiy va psixologik koʻmak koʻrsatib kelinmoqda.

Toshkent shahar IIBB tashabbusi bilan poytaxt hududida yashovchi xotin-qizlarni ijtimoiy himoya qilish, muammolarini hal etish hamda qiyin hayotiy vaziyatga tushib qolgan ayollarni qoʻllab-quvvatlash maqsadida «Men kuchli ayolman!» loyihasi asosida tadbirlar oʻtkazilayotgani fikrimizning yaqqol tasdigʻidir.

Oʻtgan yilda uch bosqichda boʻlib oʻtgan loyihaning bu yilgi toʻrtinchi bosqichiga ham start berildi, — deydi Toshkent shahar IIBB HPB boshligʻi oʻrinbosari, podpolkovnik Shirin Normatova. — Bunda ichki ishlar organlari hisobida turuvchi 17 yoshdan 55 yoshgacha boʻlgan tazyiq va zoʻravonlikka uchragan, ishsiz, profilaktik hisobda turuvchi, muqaddam sudlangan va nogiron xotin-qizlar tanlab olingan.

Ularning kasbga qiziqishini oshirish maqsadida poytaxt hududidagi zavod, fabrika va korxonalarga ekskursiya uyushtirilmoqda.

Loyihaning har bir ishtirokchisi qiziqishidan kelib chiqib, «Ustoz — shogird» anʼanasi asosida tumanlar kesimida mono-markaz moderatorlariga biriktirilmoqda.

«Sogʻlom boʻlay desang, sport bilan shugʻullan» shiori ostida sport tadbirlari va toʻgaraklarga xotin-qizlarning farzandlari ham jalb qilinib, qiziqishlariga koʻra sport mashgʻulotlariga bepul qatnashish-lari uchun yoʻllanmalar berilmoqda.

Shuningdek, tarixiy obidalar va muzeylarga sayohatlar uyushtirilib, ularning maʼnaviy va maʼrifiy dunyoqarashi yanada oshirilmoqda.

Bunga ancha yil boʻldi, — deydi loyiha ishtirokchisi М.Мусаева. Maʼlum bir sabab bilan koʻzimga shikast yetib, xiralashib qoldi.

Keyin yillar oʻtib, uchinchi farzandimni dunyoga keltirayotib, undan judo boʻldim, koʻzim esa butunlay koʻr may qoldi.

Hayot davom etarkan, roʻzgʻor tebratish kerak. Men ham turmush oʻrtogʻimga yordam berish uchun ovqat qilib, bozorga olib borib sotardim.

Bu orada oʻrtamizda tushunmovchilik yuzaga kelib, alohida yashashga majbur boʻldim. Besh yil birovning doʻkonida umr kechirdim.

Davlatimizning gʻamxoʻrligi tufayli menga uy berildi, buning uchun Prezidentimizdan minnatdorman.

Ushbu loyiha mening hayotga boʻlgan qiziqishimni yanada oshirmoqda. Kelgusida hunar oʻrganib, oʻzimning sevgan mashgʻulotim bilan shugʻullanish niyatidaman.

Xotin-qizlarning oʻzini himoya qilish texnikasi boʻyicha mashgʻulotlar tashkil etish, sogʻligʻini tiklash va tibbiy-psixologik yordam koʻrsatish loyihaning asosiy yoʻnalishlaridan biri.

Unda ishtirok etayotgan xotin-qizlarning koʻpchiligi ruhiy bosimdan aziyat chekkan. Shuning uchun ham asosiy eʼtibor psixologik treninglarga qaratilmoqda.

Kasbiy tajribamdan kelib chiqib ayta olamanki, xotin-qizlarimizning aksariyatida hissiy-emotsional yopiqlik bor, — deydi psixolog Malohat Polvonova. — Ishonamanki, olib borilgan suhbatlar va treninglar davomida ularning ruhiy ahvoli hamda oilaviy muhitida ijobiy oʻzgarishlar roʻy beradi.

«Men kuchli ayolman!» loyihasi jamiyatda oʻz oʻrnini topish uchun harakat qilayotgan xotin-qizlarga koʻmak boʻlish maqsadida katta yoʻlga chiqqan va natijalar ham koʻzga tashlanmoqda.

Ishonamizki, bu xayrli amal kelgusida ham oʻzining ijobiy tomonlari bilan boʻy koʻrsatadi.

©️ “Postda” gazetasi, Sarvar Sobirov, Toshkent shahri.