Oliy Majlisning Bola huquqlari boʻyicha vakili (Bolalar ombudsmani) Surayyo Rahmonova Ichki ishlar vazirligi akademiyasida taʼlim olayotgan magistrlar bilan muloqot qildi
2024-04-21 09:00:00 / Yangiliklar
Mamlakatimizda bolalar huquqlarini taʼminlash borasida amalga oshirilayotgan keng qamrovli islohotlar, mazkur yoʻnalishda erishilayotgan ijobiy tendensiyalar, Bolalar ombudsmani institutining faoliyati, davlat organlari va fuqarolik jamiyati institutlari bilan hamkorligi tadbirning asosiy mavzusi boʻldi.
Davlatimiz rahbarining qatʼiy eʼtibori va tashabbusi bilan bolalar huquqlari masalasi davlat siyosatining eng ustuvor yoʻnalishlaridan biriga aylandi, – dedi Surayyo Rahmonova. – Xususan, bola huquqlari va qonuniy manfaatlarini taʼminlashga oid samarali huquqiy mexanizm yaratildi.
Tizimli choralar natijasida mamlakatimizda neonatal oʻlim koʻrsatkichlari sezilarli darajada pasaydi. Maktabgacha taʼlim qamrovi 27 foizdan 76 foizgacha oshdi.
Bolalar mehnatiga batamom barham berildi. Masalan, 2017-yilda Oʻzbekiston Bolalar farovonligi boʻyicha global indeksda 78-oʻrinni egallagan boʻlsa, 2021-yilda 16 pozitsiya yuqoriga koʻtarildi. Bu ham islohotlarning amaliy natijasidir.
Davra suhbatida kelajagimiz vorislarining huquq va manfaatlarini himoya qilish, ularga nisbatan turli tazyiq hamda zoʻravonlik holatlarining oldini olish, oilalardagi maʼnaviy muhitni sogʻlomlashtirish, aholi bilan manzilli ishlash borasida ichki ishlar organlari tizimi bilan hamkorlikda amalga oshirilayotgan chora-tadbirlar, kelgusidagi muhim vazifalar xususida mulohazalar bildirildi.
Surayyo Rahmonova yaqinda qabul qilingan «Oʻzbekiston Respublikasi Oliy Majlisining Bola huquqlari boʻyicha vakili (Bolalar ombudsmani) toʻgʻrisida»gi qonunning ustuvor ahamiyatiga ham toʻxtaldi. Mazkur qonun bilan Bolalar ombudsmanining siyosiy maqomi kuchayib, vakolatlari taʼsirchanligi oshganligi, bu esa yurtimizda yashayotgan har bir bolaning Konstitutsiya va qonunlarda kafolatlangan huquq va manfaatlari himoyasini kuchaytirishga xizmat qilishi taʼkidlandi.
Shu kuni Bolalar ombudsmani akademiya boshligʻi Rustam Xatamov bilan uchrashdi. Muloqot chogʻida ikki tomonlama hamkorlikni kuchaytirish, bolalar huquqlarini himoya qilish sohasida ilmiy tadqiqotlar olib borish, bolalar va yoshlarni buzgʻunchi gʻoyalardan asrash, ularning huquqiy ongi va madaniyatini oshirishga qaratilgan qoʻllanmalar yaratish, aholi oʻrtasida targʻibot tadbirlarini oʻtkazish yuzasidan atroflicha fikr almashildi.
IIV Akademiyasi Axborot xizmati