2026-йилнинг 21–22-май кунлари Сиан шаҳрида (ХХР) Учинчи Ўзбекистон-Хитой ҳудудлараро форуми бўлиб ўтмоқда.
2026-05-22 22:00:00 / Янгиликлар
Ўзбекистон Инвестициялар, саноат ва савдо вазирлиги ҳамда Хитой томони ҳамкорлигида ташкил этилган ушбу нуфузли тадбир ўзаро ишбилармонлик алоқаларини мустаҳкамлаш ва инвестицияларни жалб этиш мақсадида 2 000 га яқин делегатни бир даврага жамлади. Унда Сурхондарё вилояти ҳокими Улуғбек Қосимов раҳбарлигидаги воҳамиз делегацияси ҳам иштирок этмоқда.
🟠«Ипак йўли» кўргазмаси билан ҳамоҳанг тарзда ўтган форумнинг очилиш маросимида Ўзбекистон Республикаси Бош вазирининг ўринбосари Жамшид Ходжаев, Шенси музофоти раҳбарияти, икки мамлакат ҳудудлари раҳбарлари ҳамда вазирлик ва идоралари раҳбарлари нутқ сўзлади.
🟠Маърузачилар икки томонлама шериклик муносабатлари стратегик аҳамиятга эга эканини алоҳида эътироф этдилар. Ўзаро товар айирбошлаш ҳажми 18 миллиард долларга етган бўлса, ўтган йил якунларига кўра Хитойнинг Ўзбекистонга киритган инвестициялари миқдори 17 миллиард долларни ташкил қилди.
🟠Форум доирасида жорий йилнинг 25-майига қадар майдони 2 000 квадрат метрни эгаллаган «Ўзбекистон миллий павилёни» фаолият кўрсатади. Ушбу павилён республикамизнинг экспорт, туризм ва инвестициявий салоҳиятини кенг намойиш этмоқда.
🟠Куннинг иккинчи ярмида форум дастури яшил иқтисодиёт, рақамлаштириш, инновациялар ва қишлоқ хўжалиги масалаларига бағишланган шўба мажлислари билан давом этди.
🟠Самарали музокаралар якунида томонлар узоқ муддатли ҳудудлараро ҳамкорликни ривожлантиришга қаратилган инвестициявий ва кооперация лойиҳалари бўйича бир қатор келишувларни имзоладилар.