Сурхондарё вилояти ҳокимлиги

Ассалому алайкум, ҳурматли Адхам Илхамович,  Конгратбай Авезимбетович,

ҳурматли ректорлар, қадрли меҳмонлар!

 

Аввало, юртимизнинг жанубий дарвозаси – қадимий тарих ва бой маданиятга эга Сурхон воҳасига, Термиз шаҳрига хуш келибсизлар!

Сиздек, юксак салоҳиятли, мамлакатимиз илм ва таълим тизимининг устунлари бўлган ректорларимизни Сурхон заминида кўриб турганимдан беҳад мамнунман.

Барчангизни жисмоний тарбия ва спорт соҳасида олий таълим муассасалари раҳбарлари учун ўқув-амалий семинарининг бошланиши билан самимий табриклайман.

Сизларнинг бу ташрифингизни нафақат Президентимизнинг топшириқларининг ижроси, балки келажакни биргаликда қуришга қаратилган муҳим тадбирлардан бири деб биламан.

Чунки сизлар – бугунги таълимни бошқараётган раҳбарлар эмас, балки эртанги жамиятни, миллат келажагини бунёд этаётган шахсларсиз. 

Ҳурматли иштирокчилар!

Бугунги семинар Ҳурматли Президентимиз Шавкат Миромонович Мирзиёев раислигида 2026 йил 7 апрель куни ўтказилган видеоселектор йиғилишида белгилаб берилган устувор вазифаларнинг амалий давоми ҳисобланади.

Шунинг учун Давлатимиз раҳбари томонидан спорт соҳасига қаратилаётган эътибор – бу миллат саломатлиги, ёшлар тарбияси ва давлат нуфузини белгилайдиган стратегик йўналиш сифатида қаралаётганини яққол кўрсатади.

Бугунги кунда спортга эътибор қилинаётганининг жиддий сабаблари бор.

Энг аввало, жамиятимизда жисмоний фаоллик даражаси кескин пасайиб бормоқда. Кўплаб ёшларимиздан тортиб, ўрта ва катта ёшли фуқароларимиз ҳам кам ҳаракатли ҳаёт тарзига ўтиб қолмоқда.

Бугунги кунда ишларнинг катта қисми ўтириб бажариладиган шаклга ўтди: офислар, компьютерлар, телефонлар – инсонни ҳаракатдан узоқлаштирмоқда.

Натижада эса:

– юрак-қон томир касалликлари,

– ортиқча вазн ва семириш,

– стресс ва руҳий чарчоқ,

– ҳатто ёшлар ўртасида ҳам соғлиқ билан боғлиқ муаммолар ортиб бормоқда.

Энг хавотирлиси, бу ҳолат аста-секин одатга айланиб қоляпти.

Касаллик кўп жамият билан эса ривожланиб бўлмайди, фаровон турмуш тарзини қуриб бўлмайди. 

Шунинг учун бу ҳолат биздан мутлақо янги ёндашувни талаб қилади.

Демак бугунги масала – шунчаки спорт масаласи эмас, бу – миллат саломатлиги, келажак авлод сифати масаласидир.

Азиз Устозлар!

Бу йўналишда, албатта, илмий асосланган ёндашув ҳал қилувчи аҳамиятга эга.

Шу нуқтаи назардан, Сиз илмий салоҳият эгалари сифатида биз учун тўғри йўналиш берувчи ва ишончли ҳамкорсизлар.

Албатта, бугунги семинарни айнан Термиз давлат университетида ўтказилаётгани ҳам бежиз эмас.

Сўнгги йилларда мазкур олийгоҳ нафақат таълим ва илм-фан соҳасида, балки жисмоний тарбия ва спортни ривожлантириш бўйича ҳам ўзига хос илғор тажрибани шакллантира олди.

Университетга мен кўп келиб тураман.

Бу ерда спорт инфратузилмаси тизимли равишда ривожлантирилмоқда, турли спорт турлари бўйича клублар фаолияти йўлга қўйилди, талабалар оммавий спортга жалб қилинмоқда.

Қачон қарасангиз спорт мажмуалари тўла бўлади.

Тўғри, ҳали бажарилиши керак бўлган ишлар жуда кўп. Лекин мени хурсанд қилган нарса бир жойда тўхтаб қолинмагани, тинимсиз ҳаракат бўлаётгани деб ҳисоблайман.

Ҳурматли олий таълим муассасалари раҳбарлари!

Бугунги семинарда спортга ихтисослашган Олий таълим муассасалари раҳбарлари, спорт соҳасида юқори натижа қайд этаётган олийгоҳ ректорлари ўтирибди. Уларда ҳам катта тажриба йиғилган, илмий мактаблар шаклланган.

Шу маънода, Термиз давлат университетида ўтаётган ушбу семинар бугун биз учун шунчаки бир майдон эмас, балки амалий тажриба алмашиш мактаби вазифасини бажаради, деган умиддаман.

Биз ҳам вилоят раҳбари сифатида сизлар билан ёшлар ўртасида соғлом турмуш тарзини шакллантириш, соғлом овқатланиш маданиятини жорий этиш, спорт тиббиёти, спорт психологияси бўйича амалий тадқиқотларни кенгайтириш ҳамда оммавий спортни ташкил этишда ҳамкорлик қилишдан, сизлардан ўрганишдан манфаатдормиз.

Биз ҳозир Термиз давлат университети, қолаверса бошқа Олий таълим муассасалари билан ҳамкорликда анчагина ишлар амалга оширмоқдамиз.

Масалан, Термиз давлат университетининг Бойсун туманидаги Дарбанд ўқув-амалиёт базасига қўшимча
17 гектар ер ажратилди, у ерда кураш базаси ташкил этилади,  Термиз тумани ҳудудидан ҳам университет илмий жамоасига 19 гектар илмий тажриба синов учун ер майдони олиб берилди.

Яқинда университет ёнидаги катта сузиш мажмуасини университетга ўтказиб бермоқдамиз. Университет шу ҳудудларни обод қилади, ишга туширади, талабаларларга шароит яратади. Сузиш спортини ривожлантиради, оммалаштиради.

Ишончим комилки, таълим, илм-фан ва ҳудудий имкониятларни бирлаштирган ҳолда биз нафақат соғлом авлодни тарбиялаймиз, балки янги тараққиёт моделини ҳам шакллантира оламиз.

Муҳтарам Президентимиз Шавкат Миромонович ҳам шундай ғояни илгари сураяптилар, яъни “Маҳалла – таълим муассасаси – спорт муассасаси – федерация” занжири асосида ишлаш бугунги куннинг энг тўғри ва самарали модели ҳисобланади.

Барчамизга маълумки, Сурхондарё қадимдан алломалар юрти сифатида танилган. Бу масканда бой тарихий мерос, ноёб маданий ва туристик объектлар мавжуд. Хусусан, Ҳаким ат-Термизий мақбараси, Султон Саодат мажмуаси, Фаёзтепа, Қоратепа, Далварзинтепа, Кампиртепа ҳамда Зурмала минораси каби тарихий обидалар вилоятимизнинг бой ўтмиши ва юксак маданиятидан далолат беради. Сиз, азиз меҳмонларни вилоятимизнинг ана шундай муқаддас ва диққатга сазовор масканларини зиёрат қилиб кетишга чорлаб қоламан. Ректоримиз А.Тошқулов буни ташкиллаштириб берадилар.

 

Шунингдек, 1–7 май кунлари Бойсун туманида “Бойсун баҳори” халқаро фольклор фестивали бўлиб ўтиши режалаштирилганини алоҳида таъкидлаш жоиз. Мазкур нуфузли фестивалда 40 дан ортиқ давлатдан 100 дан ортиқ фольклор жамоаларининг иштирок этиши кутилмоқда. Фестивал доирасида миллий қадриятларимизни кенг тарғиб этишга қаратилган кўплаб тадбирлар ўтказилади.

Фурсатдан фойдаланиб, барча меҳмонларимизни ушбу бетакрор маданий байрамга таклиф этиб қоламиз.

Ҳурматли иштирокчилар!

Бугунги мулоқотлар, фикр алмашинувлар ва амалий танишувлар барчамиз учун катта мактаб бўлади, деб ишонаман.

Ўқув-амалий семинар ишига муваффақиятлар тилайман.

Эътиборингиз учун раҳмат!