Ózbekstan Respublikası Prezidenti Shavkat Mirziyoevtiń Xalıqaralıq hayal-qızlar kúnine baǵıshlanǵan saltanatlı máresimdegi shıǵıp sóylegen sózi

Assalawma áleykum, húrmetli analar, qádirli apa-qarındaslar, dilbar qızlarım!

Sizlerdi, pútkil Ózbekstan hayal-qızların 8-mart – Xalıqaralıq hayal-qızlar kúni menen qızǵın qutlıqlayman.

Insan turmısın, jámiyettiń rawajlanıwın hayal-qızlarsız, olardıń jaqsı pazıyletlerisiz kóz aldımızǵa keltiriwge bolmaydı.

Biz sizlerdiń tımsalıńızda Úshinshi Renessanstıń dóretiwshisi bolıp jetilisip atırǵan 22 millionlıq jas áwladtı ana mehri menen tárbiyalap, kamalǵa keltirgen ullı bir kúshti kóremiz.
Sizler isbilermen, ilimpaz, oqıtıwshı, shıpaker, injener, mámleketlik hám jámiyetlik ǵayratker, bir sóz benen aytqanda, shańaraqlarımızdıń perishtesi, shańaraq hám jámiyet tayanıshı, desek, áyne haqıyqattı aytqan bolamız.

Áziz apa-qarındaslar!

Biz elimizde hayal-qızlardıń huqıq hám máplerin támiyinlew, mashqalaların sheshiw boyınsha pútkilley jańa sistema jarattıq. Barlıq nızam, párman hám qararlardı qabıl etiwde gender máselesi boyınsha huqıqıy mexanizmler engizildi.

Endi hayal-qızlardıń huqıqları menen máplerine tásiri bahalanbay turıp birde-bir nızam qabıl etilmeydi.

Jaratılǵan keń imkaniyat hám sharayatlardıń esabınan 230 mıńǵa shamalas isbilermen hayal-qızlar klası qáliplesti, miynetkesh fermer hayal-qızlarımız 12 mıńǵa jetti, ilimniń rawajlanıwına úlken úles qosıp atırǵan ilimpaz hayal-qızlarımız 6 mıńnan astı.

Ótken jılı dúnya arenalarında márt qızlarımız 167 altın, 193 gúmis, 243 qola medalın qolǵa kirgizgeni maqtawǵa ılayıq.

Hayal-qızlarımız turmısındaǵı mine usınday úlken ózgerisler dúnya jámiyetshiligi tárepinen tán alınbaqta. Atap aytqanda, Ózbekstan Parlamentleraralıq awqamnıń “Parlamenttegi hayal-qızlar” reytinginde 92 tekshe joqarılap, 36-orındı iyeledi; “Gender teńlik hám basqarıw” indeksinde 103-orınnan 52-orınǵa kóterildi; Jáhán bankiniń “Hayal-qızlar, biznes hám nızam” esabatında bolsa óz poziciyasın 43 tekshege jaqsılap, 48-orınǵa shıqtı.

Pursattan paydalanıp, hár qıylı tarawlardaǵı miyneti, talantı hám aqıl-oyı menen Jańa Ózbekstandı qurıwǵa múnásip úles qosıp kiyatırǵan hayal-qızlarımızǵa, xalıqaralıq maydanlarda Watanımızdı dúnyaǵa tanıtıp atırǵan qızlarımızǵa, olardıń ata-anaları, ustaz hám trenerlerine shın júrekten minnetdarshılıq bildiremen.

Húrmetli ánjuman qatnasıwshıları!

Hayal-qızlardı jumıslı hám dáramatlı etiw máselesi bárqulla itibarımız orayında bolıp kelmekte. Ótken jılı hayal-qızlardıń bántligin támiyinlew hám olardı isbilermenlikke tartıw maqsetinde 23,5 trillion sum kredit baǵdarladıq. Sonıń esabınan 425 mıńnan aslam apa-qarındaslarımız isbilermenlikke tartıldı.

Mısal ushın, toqımashılıq tarawında 300 hayaldı bánt etken jańaariqlı Nargiza Bekmuratova ótken jılı ekinshi fabrikasın ashıp, jáne 100 jumıs ornın jarattı. Bul isbilermen qızımız 2025-jılı Ankara qalasında ótkerilgen xalıqaralıq tańlawda “Hayal-qızlar ushın eń kóp jumıs ornın jaratqan isbilermen hayal” nominaciyasınıń jeńimpazı boldı.

Men bunday ǵayratlı qızlarımızdı Jańa Ózbekstannıń dóretiwshileri, dep bilemen. Olardı hár qanday qollap-quwatlawǵa tayarman. Sonıń ushın bıyıl 166 mıń hayal-qız zamanagóy kásip hám isbilermenlikke, jáne 100 mıńı IT tarawına oqıtıladı.

Sonday-aq, apa-qarındaslarımızǵa óz úyinde isbilermenlik etiwi ushın “Dáramatlı hayal” baǵdarlamasın baslaymız. Bul arqalı jetekshi isbilermenlerdiń járdeminde jumıstı úyge alıp islew, ónermentshilik, qusshılıq, pal hárreshilik hám qıytaq jerde ónim jetistiriw baǵdarlarında 50 mıń hayaldıń bántligi támiyinlenedi.

Bunnan tısqarı, «Hamroh» baǵdarlaması sheńberinde hayal-qızlardıń 3 mıń joybarına jámi 1 trillion sum ajıratıladı.

Ulıwma, bıyıl 1,5 million hayaldı dáramatlı etiw, sonnan 400 mıńın bizneske tartıw boyınsha úlken shek alǵanbız. Usı maqsetler ushın 25 trillion sumnan aslam resurs qaratıladı. Bas ministrdiń orınbasarları J.Qwchqorov, Z.Mahkamova, Kámbaǵallıqtı qısqartıw hám bántlik ministri B.Zohidov, Oraylıq bank baslıǵı T.Ishmetov, wálayat hákimleri bul jumıslarǵa juwapker boladı.

Qádirli watanlaslar!

Búgin joqarı oqıw ornında oqıp atırǵan qızlarımızdıń sanı 904 mıńnan artıp, jámi studentlerdiń 54 procentin quramaqta.

Ótken jılı 60 qızımız dúnyadaǵı eń abıraylı joqarı oqıw orınlarına oqıwǵa kirgeni álbette bárshemizdi quwandıradı.

Stajyor-izertlewshiler hám doktoranturada oqıp atırǵanlardıń 8,5 mıńı, yaǵnıy, 61 procentin hayal-qızlar qurap atırǵanı da itibarǵa ılayıq.

Búgingi ánjumanımızda qatnasıp atırǵan qızlarımız – Kegeyli rayonınan Indira Satniyazova, buxaralı Vazira Fayzullaeva, nawayılı Mashhura Qudratovanıń xalıqaralıq pán olimpiadalarında erisken jetiskenliklerin jáne bir qatar xalıqaralıq startap tańlawlarınıń jeńimpazı bolǵan buvaydalı Dilafruz Jwrabaeva abıraylı «Microsoft» kompaniyasınıń Ózbekstandaǵı elshisi sıpatında tán alınǵanın da ayrıqsha atap ótiw kerek.
Jańa oqıw jılınan baslap járdemge mútáj shańaraqlardaǵı hayal-qızlarımız ushın mámleketlik grant kvotasın 2 esege arttırıp, 4 mıńǵa jetkeremiz.

TOP-300 degi joqarı oqıw orınları menen qospa bilimlendiriw tiykarında magistratura basqıshında bilim alıp atırǵan student qızlardıń kontrakt pulları da mámleket tárepinen tólep beriledi.
Endi hár jılı hayal-qızlardıń innovaciyalıq ideyaların qollap-quwatlaw ushın keminde 10 baǵdar boyınsha startap tańlawları ótkeriledi. Onda hár bir baǵdar jeńimpazına Innovaciya qorınan 500 million sumǵa shekem grant beriledi. Mekteplerdiń 11-klasın pitkerip, mámleketlik texnikumlarǵa kirgen qızlardı kásipke oqıtıw tolıq mámleketlik grant tiykarında boladı.
Bul baslamalar hayal-qızlarımız ushın jańa imkaniyatlar esigin ashıp beredi, dep oylayman.

Áziz doslar!

Hayal-qızlar hám balalarǵa bolǵan kúsh kórsetiw hám zorlıqqa qarsı mawasasız ortalıq jaratıw – biz ushın strategiyalıq wazıypa. Usı háptede jáne bir áhmiyetli Pármanǵa qol qoydım. Endi hayal-qızlar hám balalarǵa bolǵan hár qanday zorlıq hám kúsh kórsetiw jaǵdaylarına qarsı qatań sistema tiykarında gúres alıp baramız.

Jáne bir áhmiyetli máselege toqtap ótpekshimen. Búgingi kúnde jazanı orınlaw mákemelerinde 2589 hayal jazanı ótep atır.

Túrli sebeplerge bola, bilip-bilmey jınayatqa qol urǵan bul hayallar da usı eldiń puqaraları. Olardı jámiyetlik turmısqa qaytarıw, jámiyettiń tolıq huqıqlı aǵzasına aylandırıw haqqında da tereń oylawımız kerek.
Jazanı ótep atırǵan hayal-qızlardıń 1239 ı orta maǵlıwmatlı, ya kásibi, ya óneri joq. Olardıń 443 i joqarı bilimlendiriw mákemelerinde oqıw tilegin bildirgen. Sonıń ushın bunday hayal-qızlar menen mánzilli islesiw boyınsha “Jańa ómir” baǵdarlamasın baslaymız.

Ishki isler ministrligi Kásiplik bilimlendiriw agentligi hám Kámbaǵallıqtı qısqartıw hám bántlik ministrligi menen jazanı ótep atırǵan hayal-qızlardı 3-6 aylıq kásip baǵdarlamaları boyınsha oqıtıp, sertifikat beredi. Sonday-aq, qamaqtaǵılarǵa sol jerdiń ózinde imtixan tapsırıp, joqarı oqıw orınlarına kiriw hám aralıqtan oqıw imkaniyatın jaratıp beremiz.

Kontrakt boyınsha oqıwǵa qabıl etilgenlerge jazanı ótep, jumısqa ornalasqannan keyin qaytarıw shárti menen procentsiz ssuda ajıratıladı.

Húrmetli analar, qádirli apa-qarındaslar!

Búgin Jańa Ózbekstan óz rawajlanıwınıń jańa basqıshına isenimli kirip barmaqta. Biz óz aldımızǵa, bárinen burın, insan baxtı, insan qádiri ushın xızmet etetuǵın úlken maqsetlerdi qoyǵanbız. Sebebi, insan baxıtı – shańaraqtan baslanadı, shańaraq bolsa hayal menen bekkem. Keleshek áwladlar mine usı muqaddes mákanda kamalǵa keledi. Álbette, bul baǵdarda qızlarımızdıń mánawiy tárbiyası sheshiwshi orın iyeleydi.

Miyrim-shápáát, ar-namıs hám iybe sıyaqlı muqaddes pazıyletler qızlarımızdıń qálbine apalardıń úgit-násiyatları menen kiredi. Bunday shańaraqta tárbiyalanǵan qızlarımız júris-turısı, ádep-ikramlılıǵı hám turmısqa múnásibeti menen teńleslerine órnek bolıp kelgen. Búgingi sharayatta mine usı tárbiya mektebine zárúrlik hár qashanǵıdan da áhmiyetli bolıp tur.

Usı jerde men oǵada awır sınaq dáwirlerinde de qáddi búgilmegen, pútkil ómirin shańaraǵına, perzentine baǵıshlaǵan barlıq analarımızǵa múrájat etpekshimen.
Biz 2026-jıldı “Máhálleni rawajlandırıw hám jámiyetti ilgeriletiw jılı”, dep járiyalaǵanımız biykarǵa emes. Dúnyadaǵı jaǵday qanday qáwipli bolıp atırǵanın bárshemiz kórip turmız.

Bunday qıyın dáwirde elimizdegi tınıshlıq hám tatıwlıq Alla taala bergen ullı jemis ekenin jáne de tereń sezinbektemiz. Onı qásterlep saqlaw bolsa hár birimizdiń muqaddes minnetimiz.

Mine, usınday sharayatta pátiya beriwshi apalarımız, húrmetli analarımız shańaraqlarda bul jemistiń qádirine jetiw, onı qásterlep saqlaw hám perzentler, aqlıqlarǵa shúkirshilik sezimin sińdiriwde órnek boladı, dep isenemen.

Húrmetli ánjuman qatnasıwshıları!

Insan ushın óz miynetiniń jemisin kóriw, tán alınıw hám itibarǵa erisiw úlken baxıt.

Usı qutlı bayram aldınan elimizdiń rawajlanıwına múnásip úles qosıp kiyatırǵan hayal-qızlarımızdan bir toparın mámleketimizdiń joqarı ataq, orden hám medalları menen sıylıqlaw boyınsha Pármanǵa qol qoydım. Sonday-aq, dástúrge bola, oqıw hám dóretiwshilikte, ilim, sport hám jámiyetlik jumıslarda belsendi bolıp kiyatırǵan qızlarımızdan jáne 28 i Zulfiya atındaǵı mámleketlik sıylıqqa miyasar boldı.
Pútkil xalqımız atınan sıylıq iyelerin jáne bir márte qutlıqlayman.

Húrmetli apa-qarındaslar!

Sońǵı jılları siz, ázizler menen, xalqımız benen birge burın tariyxımızda bolmaǵan ullı islerdi ámelge asırdıq.

Mashaqatlı, hadal miynetimiz benen pútkil dúnyanıń tán alıwı hám húrmetine erispektemiz. Eń áhmiyetlisi, hár bir taraw hám tarmaqta Jańa Ózbekstan mektebi qáliplespekte.
Biz ushın búgingi oǵada awır hám qıyın zamanda aldımızǵa qoyǵan úlken sheklerdi iyelewde jáne de birlesip, awızbirshilikli bolıp miynet etiw hár qashanǵıdan da áhmiyetli wazıypa bolıp esaplanadı.
Jańa Ózbekstandı hayal-qızları turmıstan razı bolıp, baxıtlı jasaytuǵın mámleketke aylandırıw – meniń eń úlken niyetim.

Sizdey pidayı, kúsh-ǵayratlı, miynetkesh hayal-qızlarımız, pútkil xalqımız benen birge iygilikli maqsetlerimizge, álbette, erisetuǵınına bekkem isenemen!

Sózimniń juwmaǵında pútkil Ózbekstan hayal-qızların kirip kiyatırǵan gózzallıq bayramı menen jáne bir márte shın kewlimnen qutlıqlayman.

Bársheńizge bekkem densawlıq, úylerińizge tınıshlıq-amanlıq, shańaraqlıq baxıt-ıǵbal yar bolıwın tileymen.

Bayramıńız múbárek bolsın!