O‘zbekiston Respublikasi Prezidenti va Hukumati hujjatlarida belgilangan topshiriqlar ijrosi to‘g‘risida

MA’LUMOT

(ijro.gov.uz tizimi bo‘yicha )

 

   2025-yilning yanvar – dekabr oylari (2026-yil 5-yanvar holatiga) davomida Bilimni baholash agentligiga ijro.gov.uz idoralararo hujjat aylanish tizimi orqali kelib tushgan O‘zbekiston Respublikasi Prezidenti, Prezident Administratsiyasi va Hukumati hujjatlarida belgilangan quyidagi topshiriqlar ijrosi ta’minlandi:

 

   O‘zbekiston Respublikasi Prezidentining “Davlat organlari va tashkilotlarining faoliyati ochiqligini ta’minlash, shuningdek, jamoatchilik nazoratini samarali amalga oshirishga doir qo‘shimcha chora-tadbirlar to‘g‘risida” 2021-yil 16-iyundagi PF-6247-son Farmoni 1-ilovasiga muvofiq ochiq maʼlumotlar sifatida joylashtirilishi kerak bo‘lgan ijtimoiy ahamiyatga molik maʼlumotlar Agentlikning rasmiy veb-sayti (https://gov.uz/oz/uzbmb/pages/ochiq-ma-lumotlar)ga yangilanib joylashtirildi;

 

   O‘zbekiston Respublikasi Prezidentining 2022-yil 15-iyundagi “Davlat oliy taʼlim muassasalariga o‘qishga qabul qilish jarayonlarini tashkil etish to‘g‘risida” PQ-279-son qarorining 7.4.2. bandiga muvofiq Agentlikning rasmiy veb-saytida 2025/2026-o‘quv yilida xorijiy va nodavlat oliy ta’lim muassasalaridan respublika davlat oliy ta’lim muassasalariga talabalar o‘qishni ko‘chirish uchun o‘tkaziladigan maxsus sinovlar bo‘yicha o‘tish ballari (https://gov.uz/oz/uzbmb/news/view/68907) to‘g‘risidagi ma’lumotlar e’lon qilindi;

 

   O‘zbekiston Respublikasi Prezidentining “O‘zbek imo-ishora tili va Brayl alifbosini rivojlantirish bo‘yicha qo‘shimcha chora-tadbirlar to‘g‘risida” 2022-yil 20-oktabrdagi 407-son qarorining 4-bandiga muvofiq 2025/2026-o‘quv yili uchun oliy va professional ta’lim muassasalariga o‘qishga qabul qilish bo‘yicha o‘tkazilgan test sinovlarida eshitish va nutqida nuqsoni bo‘lgan abituriyentlarga xizmat ko‘rsatish uchun 92 nafar surdotarjimon xizmatlaridan foydalanildi (https://t.me/BaholashUz/7889);

 

   O‘zbekiston Respublikasi Prezidentining 2024-yil 15-noyabrdagi “Umumiy o‘rta ta’lim maktablarida musiqa madaniyati fani o‘qitilishini tubdan takomillashtirish hamda ushbu fan o‘qituvchilarining kasbiy faoliyatini rivojlantirish chora-tadbirlari to‘g‘risida” PQ-391-son qarorining 3.1-bandi hamda “Umumiy o‘rta ta’lim maktablarida jismoniy tarbiya fani o‘qitilishini tubdan takomillashtirish hamda ushbu fan o‘qituvchilarining kasbiy faoliyatini rivojlantirish chora-tadbirlari to‘g‘risida”  PQ–392-son qarorining 5-bandlariga asosan O‘zbekiston Respublikasi Vazirlar Mahkamasining 2025-yil 17-oktabrda “Musiqa madaniyati va jismoniy tarbiya fani oʻqituvchilarining bilim darajasi hamda kasbiy mahoratini aniqlash boʻyicha milliy baholash tizimini joriy etish toʻgʻrisida” 652-son qarori tasdiqlandi. Qarorga muvofiq musiqa madaniyati hamda jismoniy tarbiya fani oʻqituvchilarining bilim darajasini va kasbiy mahoratini aniqlash va ularga sertifikat berish tizimi amaliyotga joriy etildi.

 

   O‘zbekiston Respublikasi Prezidentining “Oilalarni mustahkamlash va xotin-qizlarning faolligini oshirish bo‘yicha qo‘shimcha chora-tadbirlar to‘g‘risida”
2023-yil 21-dekabrdagi PQ-401-son qarorining 5.2-bandiga asosan “Ayol qadri” mavzusida ijtimoiy rolik tayyorlandi shuningdek, fevral oyida xotin-qizlarning huquqlarini ta’minlash, psixologik barqarorligini aniqlash bо‘yicha anonim sо‘rovlar, mart oyida esa xotin-qizlarning muammolari, ehtiyojlari va qiziqishlarini о‘rganishga qaratilgan sо‘rovnoma va tahlil о‘tkazildi;

 

   O‘zbekiston Respublikasi Prezidentining “Respublikada milliy askiya va qiziqchilik san’atini yanada rivojlantirish chora-tadbirlari to‘g‘risida” 2023-yil 11-iyuldagi PQ-222-son qarorining davlat organlari, muassasalari va korxonalarida har chorakda kamida bir marotaba budjetdan tashqari mablag‘lari hamda kasaba uyushmalari mablag‘lari hisobidan o‘z xodimlarining madaniy, estetik hordiq chiqarishlari uchun ommaviy-madaniy va konsert-tomosha tadbirlarini tashkil etish, shuningdek, konsert, sirk va teatrlarga, askiya, qiziqchilik va so‘z san’ati tomoshalariga kirish uchun chipta va abonementlarni xarid qilish amaliyotini yo‘lga qo‘yish to‘g‘risidagi 5.1-bandiga asosan Agentlik hodimlariga madaniy hordiq olishlari uchun sharoit yaratib berildi;

 

   O‘zbekiston Respublikasi Prezidentining 2024-yil 24-maydagi “Oliy taʼlim tashkilotlariga o‘qishga qabul qilish va davlat buyurtmasini joylashtirish tizimini takomillashtirish to‘g‘risida” PF-81-son 5.1-bandida belgilangan topshiriq ijrosi yuzasidan quyidagi ishlar amalga oshirildi:

- birinchi bosqichda 2025-yil 5-25-iyun kunlari 671 397 nafar abituriyent onlayn ro‘yxatga olindi va ular uchun 14-23-iyul kunlari test sinovlari o‘tkazilib, natijalari test sinovi o‘tkazilgan kunning ertasiga eʼlon qilib borildi;

- ikkinchi bosqichda abituriyentlarga test sinovlarida to‘plagan balidan kelib chiqib, 25-iyuldan 8-avgustga qadar oliy taʼlim muassasasi, taʼlim yo‘nalishi va taʼlim shaklini tanlash imkoniyati berildi. Tanlovda ishtirok etish huquqiga ega bo‘lgan 360 266 nafar abituriyentdan 326 872 nafari (90,7 %) oliy taʼlim muassasasi va bakalavriat taʼlim yo‘nalishlarini tanladi. Abituriyentlarning 234 137 nafari (71,6 %) joriy yil 92 735 nafari(28,4 %) oldingi yillar bitiruvchilari hisoblanadi. Ularning 276 606 nafari kunduzgi, 31 976 nafari kechki, 18 290 nafari masofaviy taʼlim shaklini tanlagan (birinchi tanlangan taʼlim yo‘nalishiga nisbatan). Shuningdek, 2025/2026-o‘quv yili uchun oliy ta’lim muassasalarining bakalavriat ta’lim yo‘nalishlariga kirish test sinovlari bo‘yicha tanlov natijalari 13-avgust kuni e’lon qilindi (https://mandat.uzbmb.uz/);

 

   O‘zbekiston Respublikasi Prezidentining 2025-yil 14-avgustdagi “O‘zbekistondagi bir guruh Falastinlik fuqarolarga davlat gʻamxoʻrligi, mehr- shafqat tamoyillari asosida koʻmak berish tizimini yoʻlga qoʻyish chora-tadbirlari toʻgʻrisida” PF-133-son Farmonning 10-bandiga asosan Oʻzbekiston Respublikasi Prezidenti huzuridagi Ijtimoiy himoya milliy agentligi va Tashqi ishlar vazirligi bilan hamkorlikda mehmonlarning xorijiy davlatda taʼlim olganlik haqidagi hujjatlari tan olish jarayonidan oʻtkazish uchun oʻzbek tiliga tarjima qilindi hamda oʻrnatilgan tartibda mehmonlarning xorijiy davlatda taʼlim olganlik haqidagi hujjatlarini tan olish haqida guvohnoma shakllantirildi.

 

   Oʻzbekiston Respublikasi Prezidentining “Davlat fuqarolik xizmatini yangi yondashuvlar asosida tashkil etish hamda professional va natijadorlikka yo‘naltirilgan davlat xizmatchilari korpusini shakllantirish chora-tadbirlari to‘g‘risida” 2025-yil 19-iyundagi PF-95-son Farmoniga asosan Bilim va malakalarni baholash agentligida xizmat о‘tayotgan davlat fuqarolik xizmatchilariga Oliy ta’lim, fan va innovatsiyalar vazirining 2025-yil 20-oktabrdagi 346-k-son buyrug‘i asosida malaka darajalari berildi.

 

   O‘zbekiston Respublikasi Prezidentining 2025-yil 10-sentabrdagi “Mahallalarda yoshlar bilan ishlash tizimi samaradorligini oshirishga doir chora- tadbirlar toʻgʻrisida” PF-163-son Farmoni 6-bandiga asosan Agentlikning “Bilim va malakalarni baholash agentligi tomonidan taqdim qilinadigan sertifikatlarning ma’lumotlar bazasi” axborot tizimi “Elektron hukumat” tizimining idoralararo integratsiyalashuv platformasi orqali “Yoshlar yagona elektron platformasi”ga integratsiya qilindi. Mazkur integrasiya amalga oshilishi natijasida Yoshlar ishlar agentligiga “Yoshlar yagona elektron platformasi” orqali xorijiy tillarni bilish darajasi boʻyicha milliy sertifikat ma’lumotlar bazasidan foydalanish imkoniyati yaratildi.

 

   O‘zbekiston Respublikasi Prezidenti Administratsiyasining 2025-yil 12-noyabrdagi 02/1-2492xdfu-son topshirig‘i va O‘zbekiston Respublikasi Prezidenti huzuridagi Istiqbolli kadrlarni tayyorlash bo‘yicha “El-yurt umidi” jamg‘armasi Boshqaruv kengashi majlisining 4-son bayoni 5a-bandiga asosan
“El-yurt umidi” jamg‘arma stipendiyasi uchun saralash tanlovida ishtirok etadigan nomzodlarning intellectual, tahlil qilish va ijodiy qobiliyatlari hamda psixologik barqarorligi darajasini baholash bo‘yicha test sinovlari dasturi – spesifikatsiyasi ishlab chiqilib, tasdiqlandi va e’lon qilindi (https://eyuf.uz/admin/uploads/2025/test%20spetsifikatsiyasi.pdf).

   2025-yil 3-dekabr kuni Bilim va malakalarni baholash agentligining “Onlayn test” axborot tizimi orqali, respublikaning barcha hududlarida, shuningdek xorijda ta’lim olayotgan yoki vaqtincha xorijda bo‘lib turgan nomzodlar uchun esa masofaviy tartibda platformasi orqali test sinovlari tashkil etildi. Test sinovlari natijalari qaydnomasi belgilangan tartibda O‘zbekiston Respublikasi Prezidenti huzuridagi Istiqbolli kadrlarni tayyorlash bo‘yicha “El-yurt umidi“ jamg‘armasiga taqdim etildi (https://t.me/BaholashUz/8494).

 

   O‘zbekiston Respublikasi Prezidenti Administratsiyasi rahbarining 2025-yil 25-sentyabrdagi 02-1568-son topshirig‘iga asosan Adliya vazirligi tomonidan ishlab chiqilgan “Notariuslikka talabgorlar uchun yagona tanlov oʻtkazish tartibi toʻgʻrisidagi nizomni tasdiqlash haqida”gi buyruq loyihasi Agentlik tomonidan oʻrganib chiqildi va takliflar asosida kelishib berildi.

 

   O‘zbekiston Respublikasi Vazirlar Mahkamasining 2024-yil 29-noyabrdagi “Respublika ijro etuvchi hokimiyat organlari funksiyalarining ochiq reyestrini yuritish chora-tadbirlari to’g’risida” 796-son qaroriga asosan Agentlikka tegishli funksiyalar belgilangan qonunchilik hujjatlariga asosan to‘liq xatlovdan o‘tkazildi;

 

   O‘zbekiston Respublikasi Bosh vaziri huzurida o‘tkazilgan majlisning 74-son bayoniga asosan 2025/2026-o‘quv yili uchun Prezident, ijod, ixtisoslashtirilgan va sport maktablariga o‘qishga qabul qilish bo‘yicha kirish imtihonlarini tashkil etish reja-grafigi ishlab chiqildi va mazkur grafikka asosan tashkil etildi;

 

   O‘zbekiston Respublikasi ta’lim tashkilotlariga qabul qilish bo‘yicha davlat komissiyasi majlisining 2025-yil 14-avgustdagi 69-3-son bayoniga asosan respublika oliy ta’lim muassasalarining bakalavriat ta’lim yo‘nalishlariga o‘qishga kirish uchun o‘tkazilgan test sinovlarining tanlov natijalari qaydnomalari belgilangan talablarga muvofiq chop etilib, imzolangan va muhrlangan holda belgilangan tartibda oliy ta’lim muassasalariga yetkazildi, shuningdek, test sinovlari natijasidan norozi bo‘lgan abituriyentlarga joriy yilning 14-24-avgust kunlari Agentlikning rasmiy veb-saytida (shaxsiy kabinet orqali) apellyatsiya komissiyasiga apellyatsiya shikoyatini berish imkoniyati yaratildi va ularga apellyatsiya shikoyatini ko‘rib chiqish sanasi va vaqti ko‘rsatilgan xabarnomalar yuborildi. Apellyatsiya shikoyatlarini ko‘rib chiqish 21-29-avgust kunlari Toshkent shahrida, 4-sentabr kuni Qoraqalpog‘iston Respublikasida yashovchi abituriyentlar uchun Nukus shahrida tashkil etildi;

 

   O‘zbekiston Respublikasi ta’lim tashkilotlariga qabul qilish bo‘yicha davlat komissiyasining 79-5-son bayoni 15-bandiga asosan 2025/2026 o‘quv yili uchun bakalavriat kirish imtihonlarida ishtirok etib, 56,7 va undan yuqori ball to‘plagan, biroq talabalikka tavsiya etilmagan, jumladan, ro‘yhatdan o‘tishning ikkinchi bosqichida oliy ta’lim tashkiloti va ta’lim yo‘nalishini tanlamagan abituriyentlar vakant o‘rinlar qolgan bakalavriat ta’lim yo‘nalishlariga talabalikka tavsiya etildi.

 

   Xorijiy va nodavlat oliy ta’lim muassasalarining davlat granti, shuningdek Qoraqalpog‘iston yoshlari uchun ajratilgan 200 ta maqsadli kvota bo‘yicha test sinovlari o‘tkazildi

 

   Oʻzbekiston Respublikasi Vazirlar Mahkamasining 2025-yil 23-iyuldagi 87-sonli Rayosat maslisi bayonida belgilangan topshiriqqa muvofiq Agentlik tomonidan O‘zbekiston Respublikasi Vazirlar Mahkamasining “Chet el fuqarolari uchun o‘zbek tilini bilish darajasini aniqlash va malaka sertifikatini berish tartibi to‘g‘risida”gi qarori loyihasi ishlab chiqildi. Qaror loyihasi belgilangan tartibda tegishli vazirlik va idoralar bilan kelishildi hamda 2025-yil 25-iyundan 10-iyulgacha regulation.adliya.uz axborot tizimida jamoatchilik muhokamasi uchun joylashtirildi.

  Jamoatchilik muhokamasi jarayonida loyiha yuzasidan jami 18 ta taklif kelib tushdi. Ushbu takliflar hamda idoralararo kelishuv natijalari asosida loyiha qayta ko‘rib chiqilib, tegishli o‘zgartirish va qo‘shimchalar kiritildi. 2025-yil 23-iyul kuni Adliya vazirligining 8/3-0545-sonli huquqiy ekspertiza xulosasi olindi.

   Mazkur vazifalar ijrosi doirasida 2025 yil 3 dekabr kuni Bilim va malakalarni baholash agentligi tomonidan respublika hududlarida chet el fuqarolari va fuqaroligi bo‘lmagan shaxslar uchun o‘zbek tilidan malaka sertifikati berish imtihoni aprobatsiya tarzida o‘tkazildi. Aprobatsiya jarayonida imtihon formatlari, test topshiriqlarining tuzilishi, baholash mezonlari hamda “Uzbek language proficiency test” elektron platformasining ishlash mexanizmi amaliyotda sinovdan o‘tkazildi.

   Aprobatsiya natijalari asosida malaka imtihoni tizimini yanada takomillashtirishga qaratilgan tegishli taklif va xulosalar ishlab chiqilishi rejalashtirilgan. Mazkur imtihon xalqaro CEFR mezonlari asosida A1, A2 va B1 darajalarini qamrab olgan holda, tinglab tushunish, o‘qish, yozish va gapirish bo‘yicha to‘rtta asosiy ko‘nikma kesimida onlayn shaklda tashkil etildi.

   Aprobatsiya jarayonida 332 nafar chet el fuqarolari va fuqaroligi bo‘lmagan shaxslar ishtirok etdi.

  2025-yil 19-dekabrda 01/52-6134-son xat bilan reglamentga muvofiq Vazirlar Mahkamasiga kiritildi.