Malaka oshirish
XALQARO HAMKORLIK: OXFORD UNIVERSITY PRESS
Bilimni baholash agentligi delegatsiyasi 2024-yil 6-fevral kuni Cambridge Assessment tashkilotiga tashrifini yakunlab, 7-fevral kuni “Oxford University Press” tashkilotiga tashrif buyurdi.
Tashrif davomida “Oxford University Press” tashkiloti tomonidan tashkil etiladigan test sinovlari, test topshiriqlarining validligi va ishonchliligi borasida amalga oshirilgan ishlar hamda xavfsizlik masalalari o‘rganildi.
Shuningdek, Bilimni baholash agentligi va “Oxford University Press” tashkiloti tomonidan baholash sohasida amalga oshirilayotgan ishlar bo‘yicha fikr almashildi.
Uchrashuv davomida o‘zaro hamkorlik aloqalarini yanada kengaytirish hamda kompyuter adaptiv testlarini shakllantirish borasida Memorandum va shartnoma imzolashga kelishib olindi.
CAMBRIDGE ASSESSMENT TASHKILOTINING ISH TAJRIBASI O‘RGANILDI
Bilimni baholash agentligi delegatsiyasi 6-fevral kuni Cambridge Assessment tashkilotining test materiallarini chop etish, skanerlash jarayonlari bilan tanishishdi. Shuningdek, tashkilotning xorijiy mamlakatlarda joylashgan imtihon markazlari tomonidan yuborilgan buyurtmalar bo‘yicha test materiallarini qabul qilish va qayta jo‘natishning tashkiliy tomonlari atroflicha o‘rganildi.
Shuning bilan birga, ish jarayonini tashkil etishda axborot xavfsizligini ta’minlashda xavfsizlik texnikasining joriy etilganligi yuzasidan fikr-mulohazalar almashildi.
OPTIK SKANERLAR XUSUSIYATLARI YUZASIDAN MALAKA OSHIRISH KURSI TASHKIL ETILDI
2023-yil may oyida Bilimni baholash agentligi delegatsiyasi Scantron optik skaner xususiyatlari hamda texnik xizmat ko‘rsatish masalalari yuzasidan AQShda joylashgan “Scantron” tashkilotiga tashrif buyurdi. Tashrif davomida skaner xususiyatlari, ularni sozlash hamda dasturlar bilan ishlash bilan bog‘liq jihatlarga alohida urg‘u berildi.
FIZIKA FANIDAN MALAKA OSHIRISH KURSLARI TASHKIL ETILDI
2022-yil 4-mart kuni Davlat test markazi mutaxassislari uchun fizika fanidan maxsus xalqaro malaka oshirish kursi tashkil etildi.
Malaka oshirish kursi Buyuk Britaniyaning “Cambridge Assessment” tashkilotining ko‘p yillik tajribaga ega mutaxassislari tomonidan o‘tkazildi.
Malaka oshirish kursi quyidagi mavzularni o‘z ichiga oldi:
Baholash mezonlari, test topshiriqlarini shakllantirishdagi muhim jihatlar;
Test spetsifikatsiyasini shakllantirish;
Savollar tuzish va murakkab savollar uchun baholar sxemasi hamda amaliy qobiliyatlarni baholash;
Muqobil javobli savollarni yaratish.
Mazkur malaka oshirish kursi Davlat test markazi mutaxassislari va fizika fani ekspertlarining malaka va ko‘nikmalari oshirish, test topshiriqlari sifatini yanada yaxshilash hamda yangi baholash mezonlarini ishlab chiqishga xizmat qiladi.
“CAMBRIDGE INTERNATIONAL MATH TRAINING” MALAKA OSHIRISH KURSLARI TASHKIL ETILDI.
2021-yil 13-yanvar kuni “Cambridge International Math Training” malaka oshirish kurslari tashkil etildi.
Malaka oshirish kurslari Buyuk Britaniyaning “Cambridge Assessment International Education” tashkiloti tomonidan o‘tkazildi.
Birinchi trening uzoq yillar davomida Kembrij xalqaro imtihonlarida matematika fani bo‘yicha ekspert va testologlar tayyorlovchi mutaxassis sifatida faoliyat yuritib kelayotgan Sarah Sharratt tomonidan o‘tkazildi.
Mazkur malaka oshirish kurslari Bilimni baholash agentligining matematika fani ekspertlari va mutaxassislarining malaka va ko‘nikmalari va test topshiriqlari sifatini oshirishga hamda yangi baholash mezonlarini ishlab chiqishga xizmat qiladi.
Bilim va malakalarni baholash agentligi xodimlari SCANTRON korporatsiyasida malaka oshirib qaytdilar
O‘zbekiston Respublikasi Prezidentining 2017 yil 16 noyabrdagi PQ-3389-son qarorida belgilangan vazifalar doirasida Davlat test markazining ikki nafar xodimi tajriba almashish yo‘lida Amerika qo‘shma shtatlarining Igan shaharida xizmat safarida bo‘ldilar.
Xodimlarimiz optik skaner qurilmalari sohasida dunyoda yetakchi hisoblangan SCANTRON korporatsiyasining iNSIGHT turkumiga kiruvchi optik qurilmalari dasturiy ta'minoti bo‘yicha 7 kunlik o‘quv-amaliy seminarida ishtirok etdilar.
O‘quv-amaliy seminari jarayonida iNSIGHT optik qurilmalarining imkoniyatlarini to‘liq o‘zlashtirish, O‘zbekiston sharoitida modernizatsiya qilish, kengaytirilgan belgilarni tanib olish orqali ma'lumotlarni qog‘oz shaklidan elektron shaklga o‘tkazish kabi dolzarb masalalar o‘rganildi va soha bo‘yicha o‘zaro tajribalar almashildi.
AQSH korporatsiyasi tomonidan maxsus Davlat test markazi uchun tashkil etilgan ushbu o‘quv-amaliy seminarda olingan tajribalar O‘zbekiston Respublikasi oliy ta'lim muassasalariga kirish sinovlari sifatini yanada oshirish, xususan test sinovlari natijalarini tezkor hisoblash tizimini takomillashtirishga xizmat qiladi.
Bilim va malakalarni baholash agentligi xodimlari Rossiya Federatsiyasining «Информзащита» o‘quv markazida malaka oshirib qaytdi
Bilim va malakalarni baholash agentligi xodimlari Rossiya Federatsiyasida xizmat safarida bo‘lib, «Информзащита» o‘quv markazida “TCP/IP asosidagi axborot texnologiyalari va tarmoqlarining xavfsizligi” mavzuida 2019 yil 18-29 noyabr kunlari 10 kunlik malaka oshirish kursida ishtirok etdilar.
Mazkur malaka oshirish kursi tashkilotlarning kompyuter tarmoqlari xavfsizligi uchun mas’ul bo‘lgan mutaxassislar uchun keng qamrovli o‘quv dasturi bo‘lib, xodimlar kurs davomida “Axborot texnologiyalari xavfsizligi”, “TCP/IP asoslari”, “Kompyuter tarmog‘ining xavfsizligi” kabi mavzularni o’rganishdi va soha bo’yicha o’z tajribalarini oshirishdi.
Malaka oshirish kursi yakunida xodimlar o‘tilgan mavzular bo‘yicha yakuniy attestatsiya (sinov) topshirib, “TCP/IP asosidagi axborot texnologiyalari va tarmoqlarining xavfsizligi” sertifikatlariga ega bo’ldilar.
Mazkur malaka oshirish kursida olingan tajribalar Bilim va malakalarni baholash agentligi tomonidan o’tkaziladigan test sinovlari sifatini yanada oshirish, xususan test topshiruvchilar bazasi, test sinovi natijalari bilan ishlashda ishlatiladigan dasturiy texnik ta’minotlarining tarmoq xavfsizligini takomillashtirishga xizmat qiladi.
Bilim va malakalarni baholash agentligi xodimlari Buyuk Britaniyada malaka oshirdi
Bilim va malakalarni baholash agentligining 7 nafar xodimi 2019 yilning noyabr-dekabr oylarida Buyuk Britaniyaning Noridj tilni o‘rgatish institutida (NILE – Norwich Institute for Language Education) o‘tkazilgan “Testologiya va baholash” (Testing and assessment) bo‘yicha malaka oshirish kursida ishtirok etdi.
Kurs doirasida ishtirokchilarga testologiya va ko‘nikmalarni baholash bo‘yicha amaliy mashg‘ulotlar o‘tkazildi.
Malaka oshirish mashg‘ulotlari malakali mutaxassislar Tom Kidl (Thom Kiddle), Alan Pulvines (Alan Pulvernes), Deyv Alen (Dave Allan) va Toni Prins (Tony Prince)lar tomonidan olib borildi.
Mazkur malaka oshirish kursida olingan tajribalar Bilim va malakalarni baholash agentligi tomonidan o‘tkaziladigan test sinovlarini takomillashtirishga va test topshiriqlari sifatini yanada oshirishga xizmat qiladi.
