O‘zbekiston Respublikasi Turizm qo‘mitasi

Uchrashuvda joriy yil iyun oyida turizm sohasida imzolangan Harakatlar rejasini amalga oshirish, Saudiya Arabistoni investorlarini turizm infratuzilmasi loyihalariga jalb etish, turizm hududlarining bosh rejalarini ishlab chiqish va davlat-xususiy sheriklikni rivojlantirish masalalari ko‘rib chiqildi.

Saudiya Arabistoni bozorida O‘zbekiston turizm salohiyatini targ‘ib qilish, raqamli PR kampaniyalarini o‘tkazish, mahalliy sayyohlar uchun mos turpaketlar yaratish, turizm kompaniyalari hamkorligini kuchaytirish hamda viza tartiblarini soddalashtirish yuzasidan fikr almashildi. Shuningdek, Ar-Riyoddagi “Boulevard World” majmuasida O‘zbekistonning madaniy merosi va turizm salohiyatini namoyish etuvchi, turpaketlarni bron qilish va xarid qilish imkonini beradigan doimiy pavilyon tashkil etish taklifi ilgari surildi.

2026-yil 25–27-noyabr kunlari Toshkentda o‘tkaziladigan 31-Toshkent xalqaro turizm yarmarkasi — “Ipak yo‘lida turizm” doirasida Saudiya Arabistoni turizm kompaniyalari vakillari va blogerlar uchun infoturlar, B2B uchrashuvlar hamda 5–7 kunlik sayyohlik yo‘nalishlarini tashkil etish masalalari ko‘rib chiqildi. To‘g‘ridan-to‘g‘ri aviaqatnovlar va mavsumiy charter reyslarini kengaytirish, shuningdek, Saudiya Arabistoni MICE kompaniyalarini O‘zbekistonda xalqaro konferensiyalar va biznes tadbirlarini o‘tkazishga jalb etish imkoniyatlari muhokama qilindi.

Bundan tashqari, ikki mamlakatdagi yirik turizm, madaniyat va ko‘ngilochar tadbirlar taqvimini almashish hamda Toshkent xalqaro turizm yarmarkasi doirasida ilk bor tashkil etiladigan Xalqaro turizm investitsiya forumiga Saudiya Arabistoni investorlarini taklif etish muhimligi qayd etildi.

Uchrashuv yakunida istiqbolli loyihalar bo‘yicha muzokaralarni davom ettirish, belgilangan vazifalarni amalga oshirish va ikki mamlakat o‘rtasidagi sayyohlar almashinuvini kengaytirishga qaratilgan amaliy hamkorlikni mustahkamlashga kelishib olindi.