O‘zbekiston Respublikasi Turizm qo‘mitasi

Muloqotda O‘zbekiston va “Air Arabia” o‘rtasidagi hamkorlikning bugungi holati, mavjud aviaqatnovlar, yangi yo‘nalishlarni yo‘lga qo‘yish hamda aviakompaniyaning keng xalqaro tarmog‘idan foydalangan holda O‘zbekistonning turistik imkoniyatlarini xorijiy bozorlarda ilgari surish masalalari ko‘rib chiqildi.

Bugungi kunda “Air Arabia”ning O‘zbekistondagi yo‘nalishlar tarmog‘ida Toshkent va Namangan shaharlari mavjud bo‘lib, Toshkentdan Sharja va Abu-Dabi yo‘nalishlarida haftasiga 13 ta aviaqatnov amalga oshirilmoqda.

Uchrashuv davomida Samarqand, Buxoro, Xiva va boshqa turistik markazlarga yangi to‘g‘ridan to‘g‘ri aviaqatnovlarni yo‘lga qo‘yish, Toshkent–Sharja va Toshkent–Abu-Dabi reyslari chastotasini oshirish, Yevropa, Yaqin Sharq, Osiyo va Shimoliy Afrika bozorlaridan O‘zbekistonga tranzit turistlarni jalb qilish bo‘yicha takliflar muhokama qilindi.

Shu bilan birga, “Air Arabia”ning raqamli platformalari va maqsadli bozorlarida O‘zbekiston turizmini targ‘ib qilish, maxsus turistik paketlar va qo‘shma marketing kampaniyalarini ishlab chiqish, blogerlar, inflyuyenserlar, turoperatorlar hamda OAV vakillari uchun infoturlar tashkil etish masalalariga alohida e’tibor qaratildi. Jumladan, “Air Arabia” tomonidan O‘zbekistonga infoturlarni tashkil etishda inflyuyenserlar va blogerlarning aviachipta xarajatlarini qoplash bo‘yicha amaliy ko‘mak ko‘rsatilishi ma’lum qilindi.

Shuningdek, Yevropadan O‘zbekistonga kelayotgan sayyohlar oqimining ortib borayotgani qayd etilib, ushbu bozorlarda mamlakatning turistik imkoniyatlarini yanada faol targ‘ib qilish muhimligi bildirildi. Tomonlar, aviakompaniya bortlarida O‘zbekistonning turistik salohiyati va mamlakatdagi turistik yo‘nalishlar haqida axborot materiallarini joylashtirish hamda ularni Yevropa va boshqa maqsadli bozorlardagi yo‘lovchilar orasida targ‘ib qilish bo‘yicha hamkorlik qilishga kelishib oldi.

Kompaniya “Umra plyus” loyihasini qo‘llab-quvvatlash va ushbu yo‘nalishni turistik mahsulot sifatida rivojlantirish bo‘yicha hamkorlik qilishga tayyor ekanini bildirdi.

“Air Arabia” vakillari O‘zbekistonning so‘nggi 10-yil davomida turizm sohasida tubdan o‘zgarganini qayd etdi. Mamlakatda zamonaviy va yuqori toifali mehmonxonalar soni ko‘paygani, joylashtirish vositalari tarmog‘i kengaygani hamda turistik obyektlar infratuzilmasi sezilarli darajada yaxshilangani ta’kidlandi.

Uchrashuv yakunida turistik oqimni oshirish va aviaqatnovlar orqali turizm sohasini rivojlantirishga qaratilgan qator amaliy kelishuvlarga erishildi. Erishilgan kelishuvlar “Air Arabia”ning xalqaro marshrutlar tarmog‘idan samarali foydalangan holda O‘zbekistonga yangi turistik bozorlardan tashrif buyuruvchilarni jalb qilish, aviaqatnovlar geografiyasini kengaytirish va mamlakatning turistik imkoniyatlarini xalqaro maydonda yanada keng targ‘ib etishga xizmat qiladi.

Bundan tashqari, “Air Arabia” vakillari noyabr oyida bo‘lib o‘tadigan «Ipak yo‘lida turizm» 31-Toshkent xalqaro turizm yarmarkasida ishtirok etishga taklif etildi. Kompaniya vakillariga yarmarka doirasida o‘tkaziladigan Investitsiya forumi hamda MICE-turizm konferensiyasida ishtirok etish bo‘yicha ham takliflar bildirildi.