O‘zbekiston Respublikasi Turizm qo‘mitasi

Muloqotda O‘zbekiston va Hindiston o‘rtasida turizm, madaniyat, san’at, hunarmandchilik, moda va kreativ iqtisodiyotdagi hamkorlikni yanada rivojlantirish, ikki mamlakat o‘rtasida sayyohlik almashinuvini kengaytirish hamda O‘zbekistonning Hindistondagi turizm salohiyatini keng targ‘ib qilish masalalari muhokama qilindi.

Uchrashuvda so‘nggi yillarda O‘zbekiston–Hindiston munosabatlari strategik ahamiyat kasb etayotgani, xususan, 2026-yil avgust oyida Hindiston Bosh vaziri Narendra Modining O‘zbekistonga davlat tashrifi hamda Prezident Shavkat Mirziyoyev bilan muzokaralari doirasida ikki tomonlama aloqalarni kompleks strategik sheriklik darajasiga olib chiqishga qaratilgan muhim kelishuvlarga erishilgani ta’kidlandi.

Shuningdek, tashrif doirasida 2026–2028-yillarga mo‘ljallangan Turizm sohasida hamkorlik dasturi imzolangani, mazkur hujjat turizm almashinuvini kengaytirish, qo‘shma loyihalarni amalga oshirish, madaniy tadbirlar o‘tkazish va yangi turizm yo‘nalishlarini shakllantirish uchun mustahkam institutsional asos yaratishi qayd etildi.

2026-yil 1-sentyabrdan Avstraliya, AQSh, Buyuk Britaniya va Shimoliy Irlandiya Birlashgan Qirolligi, Kanada, Koreya Respublikasi, Shengen kelishuvi ishtirokchilari bo‘lgan davlatlar, Yangi Zelandiya va Yaponiyaning amaldagi ko‘p martalik biznes va turizm toifasidagi kirish vizasiga ega bo‘lgan hamda o‘z yoki uchinchi mamlakatga uchish aviachiptasini taqdim qilgan Hindiston Respublikasi fuqarolari uchun ushbu xorijiy vizalardan birining amal qilish muddati mobaynida O‘zbekiston Respublikasi hududiga kirgan kundan e’tiboran 30 kungacha bo‘lgan muddatga vizasiz rejim amaliyoti joriy etildi.

2026-yil 28-sentyabrdan “Centrum Air” aviakompaniyasi tomonidan Toshkent–Haydarobod–Toshkent yo‘nalishida muntazam to‘g‘ridan-to‘g‘ri aviaqatnovlarning yo‘lga qo‘yilgani ikki mamlakat o‘rtasida turizm va ishbilarmonlik aloqalarini kengaytirish uchun yangi imkoniyatlar yaratayotgani ta’kidlandi. Yangi aviaqatnov munosabati bilan 2–5-oktyabr kunlari Haydarobod turizm sohasi vakillari uchun O‘zbekistonga tanishuv safari tashkil etildi. 5-oktyabr kuni esa Toshkent shahrida O‘zbekiston–Hindiston Travel & Tourism Business Forum hamda B2B uchrashuvlari o‘tkazildi.

Muloqot davomida Ritu Berining Hindiston moda, dizayn va kreativ industriyasidagi tajribasidan foydalangan holda qo‘shma loyihalarni amalga oshirish bo‘yicha takliflar ilgari surildi. Shu bilan birga, Hindistonning moda, dizayn va ixtisoslashgan media sohasi vakillari ishtirokida O‘zbekistonga kreativ tanishuv safarini tashkil etish taklif etildi.

O‘zbekistonning Hindistondagi zamonaviy sayyohlik imidjini shakllantirishga qaratilgan media va kreativ loyihalarni amalga oshirish, Hindistonning yetakchi dizaynerlari, ixtisoslashgan ommaviy axborot vositalari, madaniy platformalari va jamoatchilik fikriga ta’sir ko‘rsatuvchi shaxslarini O‘zbekistonni targ‘ib qilish jarayonlariga jalb etish muhimligi ta’kidlandi.

Uchrashuv yakunida tomonlar hamkorlikni amaliy loyihalar bilan boyitish bo‘yicha qator kelishuvlarga erishdi. Xususan, Hindistonning to‘y industriyasidagi yetakchi vakillari va nufuzli ekspertlarining O‘zbekistonga tashrifini tashkil etish, mamlakatimiz hududida hind filmini suratga olish bo‘yicha hamkorlik qilish, shuningdek, belgilangan qo‘shma tashabbuslarni tizimli amalga oshirish maqsadida alohida “Yo‘l xaritasi”ni ishlab chiqish va imzolashga kelishib olindi.

Tomonlar O‘zbekiston va Hindiston o‘rtasida turizm hamda madaniy-gumanitar aloqalarni yanada mustahkamlash, yangi sayyohlik mahsulotlarini shakllantirish va O‘zbekistonning turizm salohiyatini Hindiston bozorida keng targ‘ib qilish bo‘yicha amaliy hamkorlikni davom ettirishga tayyor ekanliklarini bildirdi.