“Gastro Marketplace” loyihasi: uy bekalari va tadbirkorlar uchun yangi daromad manbai
2026-09-29 09:10:00 / Yangiliklar
Loyiha O‘zbekistonning boy gastronomik salohiyatini turistik mahsulotga aylantirish, milliy taomlar va mahalliy oshxona an’analarini xorijiy hamda mahalliy sayyohlarga keng tanitish, shuningdek, bu yo‘nalishdagi xizmatlar ko‘lamini kengaytirishni maqsad qiladi.
Hozirda loyihada Buxoro, Samarqand, Xorazm viloyatlari va Toshkent shahri ishtirok etmoqda. Shu kungacha 42 nafar ko‘ngilli ro‘yxatdan o‘tgan.
Loyihaning muhim jihati — aholi uchun yangi daromad manbalarini yaratish. Xususan, uy bekalari uyda tayyorlangan milliy taomlar, oilaviy retseptlar va mehmondo‘stlik an’analarini sayyohlarga taklif etib, qo‘shimcha daromad topishi mumkin. Mehmon uylari egalari, hunarmandlar, oilaviy tadbirkorlar va mahalliy gastronomik mahsulot ishlab chiqaruvchilar esa faoliyatini gastronomik turizm bilan uyg‘unlashtirib, yangi xizmat va mahsulotlar taklif eta oladi.
Loyiha doirasida sayyohlar milliy taomlarni nafaqat tatib ko‘rishi, balki ularni tayyorlash jarayonida ishtirok etishi, mahalliy oilalar bilan muloqot qilishi, o‘zbek xalqining urf-odatlari va mehmondo‘stlik an’analari bilan yaqindan tanishishi mumkin bo‘lgan gastronomik tajribalarni shakllantirishga alohida e’tibor qaratilmoqda.
Tadbirda loyihaning faol ishtirokchilari ham so‘zga chiqib, gastronomik tajribalarni sayyohlarga taqdim etish borasidagi faoliyati va shu yo‘ldagi tajribasi bilan o‘rtoqlashdi.
“Gastro Marketplace” gastronomik merosni asrab-avaylash va uni zamonaviy turistik mahsulot sifatida targ‘ib qilish bilan birga, aholi va tadbirkorlarning turizm sohasidagi ishtirokini kengaytirishga xizmat qiladi.